.jpg)
អាល្លឺម៉ង់សន្យាផ្តល់ហិរញ្ញប្បទានឥតសំណងប្រមាណ ៦៣ លានដុល្លារ នៅឆ្នាំ ២០២១ នេះ ដើម្បីរួមចំណែកកាត់បន្ថយភាពក្រីក្រ និងលើកកម្ពស់ជីវភាពប្រជាពលរដ្ឋកម្ពុជា។ ហុង មិនា
ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា (CDC) ឲ្យដឹងថា រដ្ឋាភិបាលអាល្លឺម៉ង់សន្យាផ្តល់ហិរញ្ញប្បទានឥតសំណងប្រមាណ ៥៣ លានអឺរ៉ូ (៦៣ លានដុល្លារ) នៅឆ្នាំ ២០២១ នេះ ដើម្បីរួមចំណែកជាមួយរដ្ឋាភិបាលកម្ពុជាកាត់បន្ថយភាពក្រីក្រ និងលើកកម្ពស់ជីវភាពប្រជាពលរដ្ឋកម្ពុជាសម្រាប់ឆ្នាំ ២០២១-២០២២។ នេះបើតាមសេចក្តីប្រកាសព័ត៌មានរបស់ CDC។
ការផ្តល់ជំនួយឥតសំណងនេះ ត្រូវបានបង្ហាញនៅក្នុងលទ្ធផលនៃកិច្ចប្រជុំចរចាស្តីពីកិច្ចសហប្រតិបត្តិការអភិវឌ្ឍន៍ ឆ្នាំ ២០២១ រវាងរដ្ឋាភិបាលកម្ពុជា និងរដ្ឋាភិបាលសាធារណរដ្ឋសហព័ន្ធអាល្លឺម៉ង់ ដែលប្រព្រឹត្តទៅរយៈពេល ២ ថ្ងៃ ចាប់ពីថ្ងៃទី ៥-៦ ឧសភា ឆ្នាំនេះ តាមប្រព័ន្ធអនឡាញ។
សេចក្តីប្រកាសព័ត៌មានឲ្យដឹងទៀតថា ទំហំហិរញ្ញប្បន្នឥតសំណងនេះ រួមមាន ២៦ លានអឺរ៉ូ សម្រាប់កិច្ចសហប្រតិបត្តិការផ្នែកហិរញ្ញវត្ថុ និង ២៧ លានអឺរ៉ូ សម្រាប់កិច្ចសហប្រតិបត្តិការផ្នែកបច្ចេកទេស។
គិតត្រឹមខែមីនា ឆ្នាំនេះ ភាគីអាល្លឺម៉ង់បានផ្តល់ហិរញ្ញប្បទានឥតសំណងប្រមាណ ១៣,៨ លានអឺរ៉ូ (១៧ លានដុល្លារ) ដើម្បីគាំទ្រដល់វិធានការឆ្លើយតបបន្ទាន់ទៅនឹងការឆ្លងរាលដាលជំងឺកូវីដ ១៩ នៅកម្ពុជា។
CDC បានឲ្យដឹងទៀតថា បើបូកបញ្ចូលទាំងហិរញ្ញប្បទានដែលបានសន្យាក្នុងកិច្ចចរចានេះ ទំហំហិរញ្ញប្បទានសរុបបានកើនដល់ ៥៧,៨ លានអឺរ៉ូ ស្មើនឹង ៦៩ លានដុល្លារ៕
