ភ្នំពេញៈ សហភាពអឺរ៉ុប (EU) សន្យាថា ខ្លួននឹងគាំទ្រយ៉ាងពេញលេញដល់ប្រទេសកម្ពុជា ក្នុងការចូលរួមគម្រោងអនុវត្តន៍ច្បាប់ស្តីពីព្រៃឈើ អភិបាលកិច្ច និងពាណិជ្ជកម្ម (FLEGT) ដើម្បីអនុញ្ញាតឲ្យកម្ពុជាមានលទ្ធភាពនាំឈើចូលក្នុងទីផ្សារអឺរ៉ុប ព្រមទាំងកែលម្អអភិបាលកិច្ចរបស់ខ្លួនលើធនធានព្រៃឈើផងដែរ។
ក្នុងអ៊ីមែលឆ្លើយតបមួយមកកាន់ ភ្នំពេញ ប៉ុស្ដិ៍ ពីពេលថ្មីៗនេះ លោក Jean-François Cautain ឯកអគ្គរដ្ឋទូតសហភាពអឺរ៉ុបប្រចាំប្រទេសកម្ពុជា បានថ្លែងថា EU នឹងផ្ដល់ការគាំទ្រចាំបាច់ដល់រដ្ឋាភិបាលកម្ពុជា នៅក្នុងដំណើរការចូលរួម FLEGT បន្ទាប់ពីកិច្ចប្រជុំផ្លូវការមួយជាមួយលោក អ៊ុក រ៉ាប៊ុន រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ នៅរាជធានីភ្នំពេញ កាលពីថ្ងៃ ទី២៣ ខែមករា។
ដីសម្បទានសេដ្ឋកិច្ច និងការគ្រប់គ្រងព្រៃឈើប្រកបដោយនិរន្តរភាពនៅកម្ពុជាគឺជាកម្មវត្ថុដ៏សំខាន់នៅក្នុងកិច្ចប្រជុំនេះ។ លោកបានសរសេរថា៖ «ការប្ដេជ្ញាចិត្តដ៏សំខាន់គឺឆន្ទៈខាងនយោបាយរបស់រដ្ឋាភិបាល។ បើរាជរដ្ឋាភិបាលកម្ពុជាសម្រេចចិត្តចូលរួមក្នុងកម្មវិធី FLEGT សហភាពអឺរ៉ុបនឹងផ្ដល់ការគាំទ្រសម្រាប់ការពង្រឹងអភិបាលកិច្ចស្តីពីព្រៃឈើ»។
លោកឯកអគ្គរដ្ឋទូតបានសរសេរថា៖ «EU ជាប្រទេសនាំចូលឈើ និងផលិតផលធ្វើពីឈើដ៏ធំបំផុតមួយនៅលើពិភពលោក។ ការចូលក្នុងគម្រោងរបស់ FLEGT និងការចេញអាជ្ញាប័ណ្ណ FLEGT នឹងបើកចំហឱកាសទីផ្សារដល់កម្ពុជា និងការពង្រឹងអភិបាលកិច្ចព្រៃឈើរបស់ខ្លួន»។
បើកម្ពុជាសម្រេចចិត្តថា នឹងចូលរួមចរចាជាមួយ EU ក្នុងកម្មវិធី FLEGT ដៃគូទាំងពីរនឹងមានបំណងសម្រេចបានកិច្ចព្រមព្រៀងដៃគូស្ម័គ្រចិត្ត (VPA) ដែលជាកិច្ចព្រមព្រៀងពាណិជ្ជកម្មស្របច្បាប់។
VPA នឹងជួយធានាឲ្យប្រាកដថាឈើ និងផលិតផលធ្វើពីឈើនាំចេញទៅកាន់ EU ចេញមកពីធនធានស្របច្បាប់។ លោកបន្តថា វានឹងជួយដល់កម្ពុជាបញ្ឈប់ការកាប់ឈើខុសច្បាប់តាមរយៈការកែលម្អបទប្បញ្ញត្តិ និងអភិបាលកិច្ចលើវិស័យព្រៃឈើ។
បណ្ដាប្រទេសផលិតឈើដែលបានចូលរួមជាដៃគូរបស់ FLEGT ជាមធ្យោបាយការពារមួយ និងបង្កើនលទ្ធភាពចូលក្នុងទីផ្សារអឺរ៉ុបរបស់ពួកគេ ហើយលើកកម្ពស់កេរ្តិ៍ឈ្មោះប្រទេសនិងផលិតផលព្រៃឈើរបស់ពួកគេផងដែរ។
លោកឯកអគ្គរដ្ឋទូតអះអាងថា VPA អាចគាំទ្រកម្មវិធីកែទម្រង់វិស័យនេះ និងបង្កើនការប្រមូលប្រាក់ចំណូលពីវិស័យព្រៃឈើ ដែលបំណងនេះមិនគ្រាន់តែកាត់បន្ថយការកាប់បំផ្លាញព្រៃឈើខុសច្បាប់ប៉ុណ្ណោះទេ ប៉ុន្តែថែមទាំងដោះស្រាយភាពក្រីក្រ និងជំរុញឲ្យមានការអភិវឌ្ឍ ខណៈអភិបាលកិច្ចព្រៃឈើអាចកាត់បន្ថយជម្លោះ ធ្វើអាជីវកម្មនៅតាមតំបន់ព្រៃឈើ និងបង្កើតបរិយាកាសកាន់តែល្អប្រសើរសម្រាប់ការអភិវឌ្ឍរយៈពេលវែងនៅក្នុងការគ្រប់គ្រងព្រៃឈើប្រកបដោយស្ថិរភាពផងដែរ។
កាលពី ឆ្នាំ២០១២ កិច្ចព្រមព្រៀងដៃគូស្ម័គ្រចិត្តត្រូវបានចុះហត្ថលេខាដោយប្រទេសចំនួន ៦ ដែលរួមមានដូចជា ប្រទេសហ្គាណា សាធារណរដ្ឋកុងហ្គោ ប្រទេសកាមេរូន សាធារណរដ្ឋអាហ្វ្រិកកណ្ដាល ឥណ្ឌូនេស៊ី និងប្រទេសលីប៊ី។ យោងតាមគេហទំព័រមូលនិធិសត្វព្រៃពិភពលោក ប្រទេសពីរ ហ្គាណា និងកាមេរូន បានផ្ដល់សច្ចាប័ន។
បច្ចុប្បន្នប្រទេសវៀតណាម កំពុងចរចាជាមួយ EU ដើម្បីកា្លយជាប្រទេសប្រកាន់យកស្ដង់ដាររបស់ FLEGT ខណៈប្រទេសឡាវ នឹងចាប់ផ្ដើមធ្វើការចរចាផងដែរ។
លោក អ៊ុន ចក្រី អ្នកនាំពាក្យមូលនិធិសត្វព្រៃពិភពលោកបានថ្លែងថា៖ «តម្រូវការឈើស្របច្បាប់កំពុងកើនឡើង ហើយមិនគ្រាន់តែនៅក្នុងសហភាពអឺរ៉ុបប៉ុណ្ណោះទេ។ ប្រទេសប្រើប្រាស់ឈើនៅអាស៊ី កំពុងសម្លឹងមើលផលិតផលពណ៌បៃតងស្អាត មិនមានផលប៉ះពាល់ដល់បរិស្ថាន។ វាជាពេលវេលាដ៏ត្រឹមត្រូវសម្រាប់ប្រទេសកម្ពុជា ដើម្បីឆ្លើយតបនឹងតម្រូវការនេះ»។ លោកបន្ថែមថា៖ «ការទទួលបាន VPA នឹងអនុញ្ញាតឲ្យប្រទេសកម្ពុជា កែលម្អប្រព័ន្ធស្របច្បាប់ជាប់ពាក់ព័ន្ធជាមួយព្រៃឈើរបស់ខ្លួនព្រមទាំងការគ្រប់គ្រងរបស់ខ្លួន។ ក្នុងនីតិវិធីរបស់ VPA នេះមានឱកាសច្រើនដើម្បីត្រួតពិនិត្យឡើងវិញពីគម្លាត និងបញ្ហាប្រឈមដែលបានរារាំងដល់ការអភិវឌ្ឍរបស់ឧស្សាហកម្មព្រៃឈើប្រកបដោយស្ថិរភាព និងដោយប្រសិទ្ធភាព»។
ថ្លែងទៅកាន់អ្នកយកព័ត៌មានកាលពី ខែវិច្ឆិកា កាលពីឆ្នាំមុន បន្ទាប់ពីត្រូវបានសួរដោយគណៈកម្មការ ទី៣ របស់រដ្ឋសភា រដ្ឋមន្ដ្រីកសិកម្មបានថ្លែងថា កម្ពុជានៅសល់ព្រៃឈើ ៦០ ភាគរយ ដែលតួលេខនេះផ្ទុយនឹងរូបភាពផ្កាយរណបពីអង្គការ Open Development Cambodia ចេញផ្សាយកាលពី ខែមីនា ឆ្នាំ២០១៤ ថា ព្រៃឈើគ្របដណ្ដប់លើប្រទេសកម្ពុជា មានជិត ៤៦ ភាគរយ រួមទាំងឈើដាំ ពោលគឺបានធ្លាក់ចុះពី ៧២ ភាគរយកាលពី ឆ្នាំ១៩៧៣។
លោក អំ សំអាត អ្នកសម្របសម្រួលជាន់ខ្ពស់អង្គការសិទ្ធិមនុស្សលីកាដូ បានស្វាគមន៍ដល់គម្រោង FLEGT។ ប៉ុន្តែលោកបានស្នើឲ្យរដ្ឋាភិបាលប្ដេជ្ញាចិត្តក្នុងការចូលរួមនៅក្នុងផែនការនេះ។ លោកថ្លែងថា៖ «FLEGT នឹងលើកកម្ពស់ដល់ការនាំចេញឈើស្របច្បាប់ និងតម្លាភាពសម្រាប់វិស័យនេះ។ ទោះបីយ៉ាងណាក៏ដើម្បីអាចអនុវត្តគម្រោងនេះបាន រដ្ឋាភិបាលកម្ពុជាចាំបាច់ត្រូវចាត់វិធានការកាន់តែតឹងរ៉ឹងចំពោះការកាប់ព្រៃខុសច្បាប់ និងការពង្រឹងបទប្បញ្ញត្តិលើការគ្រប់គ្រងព្រៃឈើ។ បច្ចុប្បន្នករណីនាំចេញឈើខុសច្បាប់ពីប្រទេសកម្ពុជានៅតែមានបញ្ហាដែលចាំបាច់ត្រូវតែដោះស្រាយ។ ព្រៃឈើនៅក្នុងប្រទេសកម្ពុជា បំផ្លាញដោយសារតែការកាប់ព្រៃឈើខុសច្បាប់»។
លោកបារម្ភថា កម្ពុជាអាចជាអ្នកផ្គត់ផ្គង់ឈើឲ្យវៀតណាម ប្រសិនបើប្រទេសវៀតណាម ទទួលបាន VPA មុនកម្ពុជា។ លោកបន្តថា៖ «នៅក្នុងករណីនេះ ឈើខុសច្បាប់ចេញពី ប្រទេសកម្ពុជា នឹងក្លាយទៅជាឈើស្របច្បាប់នៅក្នុងប្រទេសវៀតណាម»។
តួលេខក្រសួងកសិកម្មបានឲ្យដឹងថា បានបង្ក្រាបបទល្មើសព្រៃឈើ និងសត្វព្រៃយ៉ាងហោចណាស់ ២ ៤០០ ករណី កាលពី ឆ្នាំ២០១៤ ក្នុងចំនួននោះជិត ១ ៨០០ ករណីត្រូវបានបញ្ជូនទៅតុលាការ ខណៈមនុស្សតិចជាង ១០ រូបត្រូវបានកាត់ទោស និងអប់រំ។
ប្រាក់ចំណូលបានពីពន្ធ និងការលក់ឈើដែលរឹបអូសបានកាលពីឆ្នាំមុនមានតម្លៃជាង ១៧,៥ លានដុល្លារអាមេរិក។
រដ្ឋមន្ដ្រីក្រសួងកសិកម្មមិនអាចទាក់ទងសុំការធ្វើអត្ថាធិប្បាយបានទេ កាលពីម្សិលមិញ។ ប៉ុន្តែលោកបានប្រាប់ ភ្នំពេញ ប៉ុស្ដិ៍ កាលពីសប្ដាហ៍មុនថា លោកទទួលបានឯកសារ FLEGT ពីឯកអគ្គរដ្ឋទូត EU ហើយ គ្រាន់តែមិនទាន់បានត្រួតពិនិត្យ។
លោកស្រី ចន្ធី អ្នកវិភាគសេដ្ឋកិច្ចឯករាជ្យបានថ្លែងថា របាយការណ៍បានពីក្រសួងកសិកម្មបង្ហាញថា ប្រាក់ចំណូលបានពីពន្ធ និងការលក់ឈើដែលរឹបអូសបានកាលពីឆ្នាំមុនមិនឆ្លុះបញ្ចាំងពីចំនួនឈើត្រូវបាននាំចេញនោះទេ។
លោកថ្លែងថា ប្រទេសកម្ពុជា កំពុងខាតបង់ប្រាក់ចំណូលលើតម្លៃបន្ថែមបានពីវិស័យព្រៃឈើតាមរយៈការនាំចេញឈើមិនទាន់កែច្នៃនៅក្នុងតម្លៃទាបទៅបណ្ដាប្រទេសជិតខាង។ លោកបន្តថា តាមរយៈគម្រោងនេះអភិបាលកិច្ចព្រៃឈើនឹងត្រូវបានពង្រឹង ហើយកម្ពុជានឹងមើលឃើញការកើនឡើងប្រាក់ចំណូលបានពីព្រៃឈើពី ២០ ដល់ ៣០ ភាគរយប្រសិនបើឈើកែច្នៃរបស់កម្ពុជាត្រូវបានលក់នៅទីផ្សារអឺរ៉ុប។ លោកថ្លែងថា៖ «អតិថិជននៅក្នុង EU ដឹងពីតម្លៃធនធានធម្មជាតិ។ ពួកគេមានបំណងផ្ដល់តម្លៃកាន់តែខ្ពស់។ វានឹងបង្កើតការងារនៅពេលជាមួយគ្នានឹងការបង្កើនតម្លៃកាន់តែខ្ពស់ (តម្លៃបន្ថែម) សម្រាប់ឈើកែច្នៃពាក់កណ្ដាលសម្រេច និងកែច្នៃសម្រេចសម្រាប់ប្រទេសកម្ពុជា»។
លោក ស្រី ចន្ធី បានលើកឡើងថា៖ «គម្រោងនឹងជំរុញដល់ការគ្រប់គ្រងព្រៃឈើប្រកបដោយស្ថិរភាពដែលនឹងអនុញ្ញាតឲ្យប្រទេសកម្ពុជា ទទួលបានអត្ថប្រយោជន៍ពីការលក់ឥណទានកាបូន»៕
