.jpg)
ក្រុងប្រ៊ុចសែលៈ ម្ចាស់បំណុលរបស់ប្រទេសក្រិកបានព្រមព្រៀងចំពោះកម្មវិធីកំណែទម្រង់មួយ ខណៈដែលកម្មវិធីថវិកាសង្គ្រោះលើកទី ៣ និងលើកចុងក្រោយរបស់ប្រទេសនេះជិតមកដល់ទីបញ្ចប់។ នេះបើយោងតាមគណៈកម្មាធិការអឺរ៉ុបកាលពីថ្ងៃសៅរ៍។
រដ្ឋាភិបាលក្រុងអាថែនត្រូវបានសង្គ្រោះ ៣ លើកដោយម្ចាស់ឥណទានអឺរ៉ុប និងអន្តរជាតិដោយបានទប់ស្កាត់មិនឲ្យប្រទេសនេះចាកចេញពីតំបន់ប្រើប្រាស់ប្រាក់អឺរ៉ូ។
ប្រទេសនេះបានវិលត្រឡប់មករកកំណើនសេដ្ឋកិច្ចវិញនៅឆ្នាំ ២០១៧ បន្ទាប់ពីបានធ្លាក់ចូលក្នុងស្ថានភាពដើរថយក្រោយនៃសេដ្ឋកិច្ចខ្លាំងរយៈពេល ៩ ឆ្នាំ ហើយកម្មវិធីថវិកាសង្គ្រោះនេះនឹងបញ្ចប់នៅខែសីហាខាងមុខនេះ។
លោក Pierre Moscovici ស្នងការសហភាពអឺរ៉ុបបានឲ្យដឹងថា៖ «បន្ទាប់ពីឆ្លងកាត់ការលំបាកការខិតខំប្រឹងប្រែង និងការលះបង់អស់រយៈពេលជាច្រើនឆ្នាំមក ទីបំផុតប្រទេសក្រិកឈានដល់ដំណាក់កាលចុងក្រោយហើយ»។
ដោយសារកិច្ចព្រមព្រៀងរដ្ឋមន្ត្រីហិរញ្ញវត្ថុនៅតំបន់ប្រើប្រាស់ប្រាក់អឺរ៉ូគ្រោងនឹងរៀបចំឡើងនៅថ្ងៃទី ២១ ខែមិថុនាខាងមុខនេះក្រុមអ្នកជំនាញមកពីសហភាពអឺរ៉ុប ធនាគារកណ្តាលអឺរ៉ុប (ECB) និងមូលនិធិរូបិយវត្ថុអន្តរជាតិ បានជួបប្រជុំជាមួយរដ្ឋាភិបាលក្រិកក្នុងរយៈពេលប៉ុន្មានថ្ងៃចុងក្រោយនេះដើម្បីពិភាក្សាពីគោលនយោបាយជំរុញការធ្វើឯកជននីយកម្មរបស់ខ្លួន ដែលជាកំណែទម្រង់សេវាស៊ីវិល និងការបញ្ចប់ការគ្រប់គ្រងទីផ្សារថាមពលដោយរដ្ឋក្រិក។
ក្នុងសេចក្តីថ្លែងការណ៍មួយដែលពុំបានផ្តល់ព័ត៌មានលម្អិតស្តីពីកិច្ចព្រមព្រៀងនេះ មន្ត្រីប្រតិបត្តិសហភាពអឺរ៉ុបរូបនេះឲ្យដឹងថាកិច្ចព្រមព្រៀងកម្រិតបុគ្គលិកបានឈានដល់កិច្ចព្រមព្រៀងហើយ៕ BP
