ទីកុ្រងព័រតូ៖ សហភាពអឺរ៉ុប និងឥណ្ឌាបានព្រមព្រៀងគ្នាកាលពីថ្ងៃសៅរ៍ ដើម្បីចាប់ផ្តើមកិច្ចពិភាក្សាពាណិជ្ជកម្មដែលជាប់គាំងជាយូរមកហើយក្នុងកម្រិតខ្ពស់ ដើម្បីជំរុញទំនាក់ទំនងនៅឯកិច្ចប្រជុំកំពូលតាមវីដេអូមួយដែលធ្វើឡើងក្រោមស្រមោលនៃការរីករាលដាលនៃជំងឺកូវីដ ១៩ ដែលកំពុងបង្កជាមហន្តរាយដល់ប្រទេសធំនៅអាស៊ីខាងត្បូងនេះ។
ប្រធានក្រុមប្រឹក្សាអឺរ៉ុបលោក Charles Michel បាននិយាយថា៖ «សហភាពអឺរ៉ុប និងឥណ្ឌា កំពុងបើកទំព័រសំខាន់ថ្មីមួយនៅក្នុងទំនាក់ទំនងរបស់យើង។ យើង គឺជាប្រទេសប្រជាធិបតេយ្យធំជាងគេទាំងពីររបស់ពិភពលោក។ យើង គឺជាដៃគូពិតប្រាកដ»។
រលកនៃការឆ្លងរាលដាលប្រកបដោយការបំផ្លិចបំផ្លាញពាសពេញប្រទេសឥណ្ឌា បានជះឥទ្ធិពលដល់កិច្ចប្រជុំ ដោយបង្ខំឲ្យនាយករដ្ឋមន្រ្តីឥណ្ឌា លោក Narendra Modi បញ្ចប់ផែនការហោះហើរទៅកាន់ប្រទេសព័រទុយហ្កាល់ ដើម្បីជួបសមភាគីអឺរ៉ុបរបស់លោក។
ប៉ុន្តែប្លុកដែលមានប្រទេសទាំង ២៧ និងប្រជាធិបតេយ្យធំបំផុតនៅលើពិភពលោកនៅតែប្តេជ្ញាធ្វើឲ្យមានសារៈសំខាន់ដល់សន្ទុះកើនឡើងសម្រាប់ទំនាក់ទំនងកាន់តែជិតស្និទ្ធដែលរុញច្រាន់ដោយការព្រួយបារម្ភរួមគ្នាអំពីការងើបឡើងរបស់ចិន។
ប្រធានគណៈកម្មាធិការអឺរ៉ុប លោកស្រី Ursula von der Leyen បានសាទរចំពោះការសម្រេចចិត្តនេះ ដើម្បីចាប់ផ្តើមកិច្ចពិភាក្សាពាណិជ្ជកម្មឡើងវិញ បន្ទាប់ពីការខកខានអស់រយៈពេល ៨ ឆ្នាំ ដោយចាត់ទុកជា “ការផ្លាស់ប្តូរជាប្រវតិ្តសាស្រ្ត”។
បណ្តាប្រទេសសហគមន៍អឺរ៉ុបបានបញ្ជូនឧបករណ៍ និងថ្នាំពេទ្យ ដែលមានតម្លៃប្រមាណ ១០០ លានអឺរ៉ូ (១២០ លានដុល្លារ) ដល់ប្រទេសឥណ្ឌា ដែលជាផ្នែកមួយនៃកិច្ចខិតខំប្រឹងប្រែងអន្តរជាតិ ដើម្បីជួយប្រទេសនេះក្នុងការប្រយុទ្ធប្រឆាំងនឹងជំងឺកូវីដ ១៩។
លោកស្រី Von der Leyen បានទទូចថា ប្លុកនេះ "មានជំហររឹងមាំនៅខាងឥណ្ឌាក្នុងពេលដ៏លំបាកបំផុតនេះ "និងបានសន្យាផ្តល់ជំនួយបន្ថែមទៀត។
មន្ត្រីជាន់ខ្ពស់ម្នាក់នៃក្រសួងកិច្ចការបរទេសរបស់ប្រទេសឥណ្ឌា បាននិយាយថា លោក Modi បានជំរុញសហភាពអឺរ៉ុបឱ្យគាំទ្រសំណើរបស់ឥណ្ឌា និងអាហ្វ្រិកខាងត្បូងក្នុងការព្យួរប៉ាតង់វ៉ាក់សាំងកូវីដ ១៩ បន្ទាប់ពីប្រធានាធិបតីអាមេរិក Joe Biden មិនផ្តល់ទម្ងន់ដល់ផែនការនេះទេ។
មន្ត្រីជាន់ខ្ពស់ឥណ្ឌា លោក Vikas Swarup បានមានប្រសាសន៍ថា “យើងនឹងតាមដានជំហររបស់សហភាពអឺរ៉ុប ដែលកំពុងវិវឌ្ឍលើបញ្ហាពិសេសនេះ”៕AFP/RR