កម្មករលីបាវអង្ករក្នុងរោងចក្រ អេមរុរ៉ាយស៍ ដែលជាក្រុមហ៊ុននាំចេញអង្ករ និងផលិតស្រូវសរីរាង្គឈានមុខគេមួយនៅកម្ពុជា នាពេលកន្លងមក។ ហេង ជីវ័ន
ភ្នំពេញៈ អេមរុរ៉ាយស៍ ដែលជាក្រុមហ៊ុននាំចេញអង្ករ និងផលិតស្រូវសរីរាង្គឈានមុខគេមួយនៅកម្ពុជាបាននិងកំពុងសាកល្បងប្រើប្រាស់ថាមពលសូឡាក្នុងរោងម៉ាស៊ីនកិនស្រូវរបស់ខ្លួន ដើម្បីបង្កើននិរន្តរភាពថាមពលក្នុងខ្សែចង្វាក់ផលិតកម្មនារដូវប្រាំងដែលតែងប្រឈមនឹងដាច់ចរន្តអគ្គិសនីជាញឹកញាប់។
លោក កាន់ គន្ធី អគ្គនាយករងក្រុមហ៊ុន អេមរុរ៉ាយស៍ បានប្រាប់ភ្នំពេញប៉ុស្តិ៍កាលពីថ្ងៃអាទិត្យថា ថាមពលសូឡានេះត្រូវដំឡើងនៅលើដំបូលឃ្លាំងស្តុកស្រូវនៃផ្ទៃដីជាង ១០ ហិកតានៅស្រុកប្រាសាទបល័ង្ក ខេត្តកំពង់ធំ។ ថាមពលដើរដោយពន្លឺព្រះអាទិត្យនេះមានអនុភាព ២៦២ គីឡូវ៉ាត់ ជាប្រភេទគម្រោងសាងសង់ប្រតិបត្តិការ ផ្ទេរ (BOT) វិនិយោគដោយក្រុមហ៊ុនតូតាល់ក្នុងតម្លៃប៉ាន់ស្មាន ៥០ ម៉ឺនដុល្លារ។
លោកថ្លែងថា៖ «គម្រោងនេះ គឺក្រុមហ៊ុនអេមរុរ៉ាយស៍ មិនបានចំណាយប្រាក់សាងសង់ទេ ដោយយើងបានផ្តល់ទីតាំងសម្រាប់ការដំឡើងបន្ទះសូឡា ហើយយើងទិញថាមពលពីក្រុមហ៊ុនផ្គត់ផ្គង់ក្នុងរយៈពេលកំណត់។ នៅពេលក្រុមហ៊ុន [តូតាល់] ទទួលបានប្រាក់ពីការលក់ថាមពលគ្រប់ចំនួនវិញហើយនោះ ប្រព័ន្ធថាមពលសូឡានេះនឹងក្លាយជារបស់យើង [អេមរុរ៉ាយស៍] វិញ»។
លោក គន្ធី បន្តថា ថាមពលពន្លឺព្រះអាទិត្យនេះត្រូវបានដំឡើង និងតភ្ជាប់ (synchronize) ជាមួយនឹងខ្សែបណ្តាញបញ្ជូនអគ្គិសនីរបស់រដ្ឋដែលមានការអនុញ្ញាតពីអគ្គិសនីកម្ពុជា (EDC) តាមច្បាប់។
លោកថ្លែងថា៖ «ការប្រើប្រាស់ប្រព័ន្ធថាមពលសូឡានេះនឹងជួយជំរុញវិស័យកសិកម្មស្រូវអង្ករដូចជា ចំណាយរយៈពេលខ្លីជាងមុនក្នុងការកិន និងសម្ងួតស្រូវ ហើយវាក៏ជួយឱ្យចង្វាក់ផលិតកម្មផលិតបានលឿនទាន់តម្រូវការទាំងក្នុងប្រទេស និងក្រៅប្រទេសផងដែរ»។
បន្ថែមពីលើនេះការប្រើប្រាស់ប្រព័ន្ធថាមពលសូឡាក៏បានឆ្លើយតបទៅនឹងគោលដៅទី ៧ នៃគោលដៅអភិវឌ្ឍន៍ប្រកបដោយចីរភាព (SDG) ដែលផ្ដល់នូវតម្លៃសមរម្យ និងថាមពលដែលមិនប៉ះពាល់ដល់បរិស្ថាន ដូច្នេះការប្រើប្រាស់ថាមពលសូឡាក្នុងវិស័យស្រូវអង្ករ មិនត្រឹមតែផ្គត់ផ្គង់ថាមពលបានតាមតម្រូវការនោះទេ ថែមទាំងជួយទៅដល់ផែនដីទៀតផង។
លោកនិយាយថា៖ «ការប្រើប្រាស់ថាមពលកកើតឡើងវិញនឹងមិនមានការបំពុលបរិស្ថាន ហើយជួយកាត់បន្ថយការបំភាយឧស្ម័នផ្ទះកញ្ចក់ និងឧស្ម័នកាបូនឌីអុកស៊ីតផងដែរ»។
លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជាបានឱ្យដឹងថា ការដំឡើងថាមពលសូឡានេះនឹងជួយឱ្យមានស្ថិរភាពថាមពលនៅក្នុងរោងម៉ាស៊ីនកិនស្រូវ ប៉ុន្តែថ្លៃដើមផលិតនៅតែខ្ពស់ បើធៀបនឹងទិញថាមពលពីរដ្ឋ។
លោកថ្លែងថា៖ «ការដំឡើងថាមពលសូឡាវាល្អហើយ ប៉ុន្តែតម្លៃវិនិយោគធំ ដែលវាមិនទាន់អាចផ្តល់ផលចំណេញច្រើនទេដល់អ្នកក្នុងវិស័យស្រូវអង្ករ»។
លោកបន្ថែមថា សព្វថ្ងៃរដ្ឋាភិបាលមិនលើកទឹកចិត្តឱ្យមានការវិនិយោគដូចនេះទេ ប៉ុន្តែលោកសង្ឃឹមថា រដ្ឋនឹងផ្លាស់ប្តូរគោលនយោបាយដើម្បីលើកទឹកចិត្តឱ្យប្រើប្រាស់ថាមពលកកើតឡើងនៅពេលអនាគត។
លោកបន្តថា៖ «អ្វីដែលក្រុមហ៊ុនធ្វើ ជាគំរូល្អមួយដែលដើរស្របនឹងក្រុមហ៊ុនផលិតអង្ករសរីរាង្គដែលភ្ជាប់ទៅនឹងគម្រោងថាមពលសូឡា ប៉ុន្តែការដំឡើងនូវថាមពលនេះគឺមិនទាន់មានផលចំណេញទេ»។
លោក វិចទ័រ ហ្សូនា អគ្គនាយកនៃអគ្គនាយកដ្ឋានថាមពលក្រសួងរ៉ែ និងថាមពល ធ្លាប់ប្រាប់ភ្នំពេញប៉ុស្តិ៍ថា វិស័យឯកជនគួរតែប្រើថាមពលដែលទិញពីអគ្គិសនីកម្ពុជា ដែលបានភ្ជាប់បណ្តាញជាតិត្រឹមត្រូវ និងមានតម្លៃទាប។
លោកថ្លែងថា៖ «បើមានការផ្គត់ផ្គង់ត្រឹមត្រូវ និងមានអគ្គិសនីប្រកបដោយស្ថិរភាពប្រើប្រាស់វាទៅគឺមិនចាំបាច់វិនិយោគទេ»៕ LA
