.jpg)
ភ្នំពេញៈ អេមរុ រ៉ាយស៍ ជាក្រុមហ៊ុននាំចេញអង្ករឈានមុខមួយរបស់កម្ពុជាបានទទួលពានរង្វាន់ Golden AGROW ក្នុងនាមជាក្រុមហ៊ុន ដែលបានរួមចំណែកជួយដល់កសិករ ពីក្រុមប្រឹក្សាផ្ដល់យោបល់ពាណិជ្ជកម្មអាស៊ាន (ASEAN-BAC)។ នេះបើតាមលោក សុង សារ៉ន។
លោក សុង សារ៉ន ស្ថាបនិក និងជាអគ្គនាយកក្រុមហ៊ុននេះបានឲ្យដឹងថា ពានរង្វាន់នេះនឹងត្រូវផ្ដល់ក្នុងអំឡុងកិច្ចប្រជុំកំពូលកសិកម្មអាស៊ានលើកទី ២ ដែលនឹងត្រូវធ្វើឡើងនៅប្រទេស ហ្វីលីពីន នៅថ្ងៃទី១ ខែតុលា ឆ្នាំ២០១៨។
លោកថ្លែងថា៖ «យើងសប្បាយចិត្តខ្លាំងក្នុងការទទួលបានរង្វាន់នេះ ដោយសារតែវាឆ្លុះបញ្ចាំងថា កិច្ចខិតខំប្រឹងប្រែងរបស់យើងអស់រយៈពេលជាច្រើនឆ្នាំត្រូវទទួលស្គាល់ក្នុងតំបន់»។ លោកបន្ថែមថា នេះគឺជារង្វាន់លើកទី២ ដែលក្រុមហ៊ុនលោកបានទទួល។
កាលពីឆ្នាំ ២០១៥ លោក សុង សារ៉ន ត្រូវបានផ្ដល់រង្វាន់ភាពជាសហគ្រិនវ័យក្មេង ដែលត្រូវបានទទួលស្គាល់ដោយមូលនិធិ Takeda។ លោកបន្តថា៖ «រង្វាន់នេះលើកទឹកចិត្តពួកយើង ក្នុងការបន្តការងាររបស់ពួកយើងដើម្បីជួយកសិករកម្ពុជា»។
តាមលោក សុង សារ៉ន មានលក្ខណវិនិច្ឆ័យជាច្រើន ត្រូវបានវាយតម្លៃដែលអាចឲ្យ អេមរុ រ៉ាយស៍ទទួលបានរង្វាន់ ប៉ុន្តែចំណុចសំខាន់ គឺគម្រោងអភិវឌ្ឍប្រកបដោយចីរភាពសម្រាប់កសិកម្ម។
អេមរុ រ៉ាយស៍ បានចុះកិច្ចព្រមព្រៀងទិញស្រូវតាមរយៈការធ្វើកសិកម្មតាមកិច្ចសន្យាជាមួយកសិករអង្ករសរីរាង្គ ១០ ០០០ នាក់នៅកម្ពុជា និងទិញស្រូវសរីរាង្គប្រហែល ៦០ ០០០ តោន៕LA
