.jpg)
អ្នកដំណើរកំពុងជិះម៉ូតូកាត់មុខធនាគារអេស៊ីលីដានៅតាមបណ្តោយមហាវិថីព្រះមុនីវង្សនាពេលកន្លងមក។ ហុង មិនា
ភ្នំពេញៈ អេស៊ីលីដា ភីអិលស៊ី ដែលជាធនាគារពាណិជ្ជ និងគ្រប់គ្រងដោយវិនិយោគិនក្នុងស្រុកឈានមុខគេនៅកម្ពុជាកាលពីថ្ងៃអង្គារបានទទួលការយល់ព្រមជាផ្លូវការពីគណៈកម្មការមូលបត្រកម្ពុជា (SECC) សម្រាប់ការបោះផ្សាយមូលបត្រជាសាធារណៈលើកដំបូង (IPO) ដែលបើកផ្លូវឲ្យធនាគារនេះចុះបញ្ជីលើផ្សារហ៊ុននេះក្នុងរយៈពេល ១ ខែខាងមុខ។
លោក ស៊ូ សុជាតិ អគ្គនាយក SECC បានប្រាប់ភ្នំពេញ-ប៉ុស្ដិ៍ថាជាមួយវត្តមានរបស់ធនាគារនេះនៅលើផ្សារហ៊ុននឹងទាក់ទាញចំណាប់អារម្មណ៍កាន់តែខ្លាំងពីសាធារណជនព្រមទាំងវិនិយោគិនបរទេស ដោយសារធនាគារនេះកំពុងប្រតិបត្តិការល្អប្រសើររយៈពេល ១ ទសវត្សរ៍ជាមួយនឹងតួនាទីហិរញ្ញវត្ថុដ៏រឹងមាំ។
លោកបានថ្លែងថា៖ «វត្តមានរបស់ធនាគារអេស៊ីលីដានឹងធ្វើឲ្យផ្សារហ៊ុនរបស់យើងទទួលបានទំនុកចិត្តកាន់តែខ្លាំងពីវិនិយោគិនក្នុងស្រុក និងវិនិយោគិនអន្តរជាតិ»។
លោក Jong Weon HA អនុប្រធាន និងជាប្រធានប្រតិបត្តិការនៅផ្សារមូលបត្រកម្ពុជា (CSX) បានប្រាប់ភ្នំពេញប៉ុស្ដិ៍កាលពីថ្ងៃអង្គារថា ការយល់ព្រមពី SECC បន្ទាប់ពីធនាគារមួយនេះសម្រេចបានតាមលក្ខខណ្ឌតម្រូវទាំងអស់ពីនិយតករ។
លោកថ្លែងថា៖ «យើងរីករាយយ៉ាងខ្លាំងដែលធនាគារអេស៊ីលីដាទទួលបានការអនុម័តនៅក្នុងកិច្ចប្រជុំនេះ។ សម្រាប់នីតិវិធីបន្ទាប់ពីការទទួលផ្ដល់ការយល់ព្រមជាគោលការណ៍ អ្នកដាក់ពាក្យសុំត្រូវបានអនុញ្ញាតឲ្យបន្តធ្វើរ៉ូតសូជាសាធារណៈរយៈពេល ១ ថ្ងៃបន្ទាប់។ បន្ទាប់មកនឹងមានអំឡុងពេលការស្ទាបស្ទង់តម្លៃមូលបត្រជាសាធារណៈប្រហែល ២ សប្ដាហ៍ និងការធ្វើបរិសកម្មរយៈពេល ២ សប្ដាហ៍ផ្សេងទៀត»។ លោកបន្ថែមថាក្នុងអំឡុងដំណើរការនេះអ្នកដាក់ពាក្យត្រូវបានតម្រូវឲ្យដាក់ពាក្យសុំទៅ CSX ព្រមទាំងរាយការណ៍ដល់ SECC ផងដែរ។
លោកឲ្យដឹងថា ធនាគារនេះនឹងត្រូវការពេលវេលាប្រហែល ១ ខែកន្លះ ដើម្បីចុះបញ្ជីនៅ CSX។ ទោះបីយ៉ាងនេះក្តីអំឡុងពេលនេះអាចផ្លាស់ប្តូរអាស្រ័យលើតម្រូវការពីក្រុមវិនិយោគិន។
លោកបានបញ្ជាក់ថា៖ «បច្ចុប្បន្នមានក្រុមហ៊ុនចុះបញ្ជីភាគហ៊ុន ៥ នៅលើផ្សារហ៊ុននេះជាមួយនឹងឧស្សាហកម្មខុសគ្នាដែលមិនទាន់បានបំពេញតម្រូវការដ៏ធំពេញលេញនៅក្នុងទីផ្សារនេះទេ។ ដូច្នេះយើងរំពឹងថានឹងទទួលបានក្រុមហ៊ុនកាន់តែច្រើនមកពីគ្រប់វិស័យក្នុងការបង្ហាញអាជីវកម្មរបស់ ពួកគេនៅលើផ្សារហ៊ុនបានច្រើនតាមដែលអាចធ្វើទៅបាន»។
លោកបន្តថា៖ «វត្តមានរបស់ធនាគារអេស៊ីលីដា គឺជាផលិតផលដ៏ទាក់ទាញថ្មីមួយដល់វិនិយោគិនសាធារណៈ ជាពិសេសប្រជាជនកម្ពុជាដែលមិនទាន់មានទំនុកចិត្តពេញលេញនៅឡើយ និងចំណេះដឹងនៅមានកម្រិតលើផ្សារហ៊ុនរបស់យើង»។
លោកថ្លែងថា៖ «វាជាជំហានមួយផ្សេងទៀតសម្រាប់ផ្សារមូលធន។ ក្រៅពីនេះ នៅក្នុងឆ្នាំនេះយើងរំពឹងថា ក្រុមហ៊ុនមួយចំនួននឹងឡើងផ្សារហ៊ុន និងចេញបណ្ណបំណុលសាជីវកម្ម។ យើងមានសុទិដ្ឋិនិយមលើកំណើនរបស់ផ្សារហ៊ុននេះព្រមទាំងកំណើនសេដ្ឋកិច្ចខ្ពស់របស់កម្ពុជាផងដែរ»។
អេស៊ីលីដា គឺជាធនាគារពាណិជ្ជកម្មដំបូងគេត្រូវបានផ្ដល់ការអនុញ្ញាតជាគោលការណ៍ក្នុងការចេញមូលបត្រលើផ្សារហ៊ុនកម្ពុជា។
ធនាគារនេះត្រូវបានផ្ដល់ការអនុញ្ញាតជាផ្លូវការដោយធនាគារជាតិនៃកម្ពុជាកាលពីថ្ងៃទី ២៦ ខែវិច្ឆិកា៕LA
