.jpg)
អគារស្នាក់ការកណ្ដាលធនាគារអេស៊ីលីដា ស្ថិតនៅតាមមហាវិថីព្រះមុនីវង្ស រាជធានីភ្នំពេញកាលពីថ្ងៃម្សិលមិញ។ ហុង មិនា
ភ្នំពេញៈ Acleda Bank Plc ដែលជាធនាគារឈានមុខគេគ្រប់គ្រងដោយវិនិយោគិនក្នុងស្រុកនឹងក្លាយជាធនាគារពាណិជ្ជដំបូងក្នុងការចុះបញ្ជីនៅផ្សារមូលបត្រកម្ពុជា (CSX ) បន្ទាប់ពីធនាគារនេះទទួលបានលិខិតយល់ព្រមពីធនាគារជាតិនៃកម្ពុជា សម្រាប់ការធ្វើពិពិធកម្មប្រភពមូលនិធិរបស់ខ្លួនសម្រាប់ការពង្រីកអាជីវកម្ម។
សេចក្ដីប្រកាសព័ត៌មានរបស់ពីធនាគារអេស៊ីលីដាដែលបានទទួលដោយភ្នំពេញប៉ុស្ដិ៍កាលពីថ្ងៃអាទិត្យឲ្យដឹងថា ធនាគារនេះបានទទួលលិខិតផ្លូវការមួយពី NBC កាលពីថ្ងៃទី ២៦ ខែវិច្ឆិកា ដែលអនុញ្ញាតឲ្យធនាគារនេះ ដំណើរការផែនការរបស់ខ្លួនសម្រាប់ការបោះផ្សាយលក់មូលបត្រកម្មសិទ្ធិលើកដំបូងជាសាធារណៈ (IPO) នៅ CSX។ IPO របស់ធនាគារអេស៊ីលីដា ត្រូវបានចាត់ទុកជា «IPO ជូនប្រជាពលរដ្ឋ» ដែលលើកទឹកចិត្តដល់វិនិយោគិនរូបវន្តបុគ្គល និងសាធារណជនដើម្បីចូលរួមនៅក្នុង IPO អាស្រ័យតាមសមត្ថភាពហិរញ្ញវត្ថុពួកគេ។
លោក អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា បានឲ្យដឹងថា ការយល់ព្រមពី NBC ដើម្បីបើកផ្លូវឲ្យធនាគារនេះដំណើរការនីតិវិធីសម្រាប់ការងារ IPO និងធ្វើឲ្យហើយសម្រាប់ការចុះបញ្ជីនៅពេលឆាប់ៗនេះ។
លោកបានថ្លែងថា៖ «ធនាគារទើបនឹងទទួលបានលិខិតពីធនាគារជាតិនៃកម្ពុជា ដើម្បីបន្តនីតិវិធីស្នើសុំបោះផ្សាយ IPO នៅគណៈកម្មការមូលបត្រកម្ពុជា (គ.ម.ក.)។ ភាគហ៊ុនិករបស់ធនាគារបានឯកភាពគ្នាជាឯកច្ឆន្ទថា ធនាគារនេះគួរតែធ្វើការបោះផ្សាយ IPO ដើម្បីធ្វើពិពិធកម្មប្រភពទុនដ៏សម្បូរបែប និងប្រើប្រាស់ទីផ្សារមូលធនកម្ពុជាសម្រាប់កំណើននាពេលអនាគតរបស់យើង»។
លោកបន្តថា៖ «ក្នុងឱកាសនេះយើងខ្ញុំសូមជូនដំណឹងដល់អតិថិជន និងសាធារណជនទាំងអស់មេត្តាជ្រាបថា ភាគហ៊ុនរបស់ធនាគារ អេស៊ីលីដា នឹងត្រូវបានដាក់លក់ជូនសាធារណជន បន្ទាប់ពីទទួលបានការអនុញ្ញាតជាបន្តបន្ទាប់ពី ផ្សារមូលបត្រកម្ពុជា (CSX ) និងគណៈកម្មការ មូលបត្រកម្ពុជា (គ.ម.ក.)។ យើងខ្ញុំនឹងធ្វើការផ្សព្វផ្សាយអំពីកាលបរិច្ឆេទនៃការស្ទាបស្ទង់តម្លៃមូលបត្រជាសាធារណៈ និងការធ្វើបរិវិសកម្មក្នុងពេលដ៏ខ្លីខាងមុខនេះ។ នេះជាឱកាសដ៏ពិសេសសម្រាប់សាធារណជនក្នុងការចូលរួម វិនិយោគជាមួយធនាគារ ដើម្បីក្លាយជាភាគហ៊ុនិករបស់ធនាគារ អេស៊ីលីដា ភីអិលស៊ី»។
លោក Han Kyung Tae នាយកគ្រប់គ្រងទូទៅនៅក្រុមហ៊ុនមូលបត្រ Yuanta Securities (Cambodia) Plc ដែលនឹងគ្រប់គ្រងគម្រោង IPO សម្រាប់ធនាគារអេស៊ីលីដាបានឲ្យដឹងថា វត្តមានរបស់ធនាគារនេះនឹងផ្ដល់ឥទ្ធិពលវិជ្ជមានបំផុតលើផ្សារហ៊ុន ខណៈធនាគារនេះគឺជាធនាគារពាណិជ្ជកម្មឈានមុខគេមួយនៅកម្ពុជា។
លោកបានថ្លែងថា៖ «យើងរីករាយយ៉ាងខ្លាំងក្នុងការធ្វើជាផ្នែកមួយនៃគម្រោងដ៏ធំបែបនោះ ជាទីប្រឹក្សាហិរញ្ញវត្ថុតែមួយគត់។ ទំហំការជួញដូរដែលបានជំរុញ និងកំណើនចំនួនវិនិយោគិនដែលបណ្ដាលមកពី IPO របស់ធនាគារអេស៊ីលីដា ពិតណាស់នឹងផ្លាស់ប្តូរសក្ដានុពលរបស់ផ្សារហ៊ុននេះ និងការផ្លាស់ប្តូរជាមូលដ្ឋានផ្សារមូលធនកម្ពុជា ដើម្បីឈានទៅដល់ដំណាក់កាលថ្មីមួយនៃការអភិវឌ្ឍ»។ លោកបន្តថា មូលធនូបនីយកម្មទីផ្សារសរុប នៃ CSX អាចកើនឡើង ៣ ដងជាមួយនឹង IPO របស់ធនាគារអេស៊ីលីដា។
លោក Jong Weon HA ប្រធានប្រតិបត្តិការនៅ CSX ក៏បានឲ្យដឹងថា ការចុះបញ្ជីរបស់ធនាគារអេស៊ីលីដាលើផ្សារហ៊ុននេះនឹងជាសម្ទុះថ្មីនៃការទាក់ទាញវិនិយោគិនលើផ្សារហ៊ុនរបស់កម្ពុជាមួយនេះ ហើយវានឹងល្អសម្រាប់សេដ្ឋកិច្ចរបស់ប្រទេសនេះផងដែរ។
លោកបានថ្លែងថា៖ «យើងគឺជាគ្រឹះស្ថានហិរញ្ញវត្ថុឈានមុខគេ អាចប្រមូលមូលនិធិនៅផ្សារមូលបត្រកម្ពុជា និងការចុះបញ្ជីរបស់គ្រឹះស្ថានហិរញ្ញវត្ថុដ៏ល្អ អាចរួមចំណែកដល់ការអភិវឌ្ឍនៃសេដ្ឋកិច្ចរបស់កម្ពុជា។ ដរាបណាពួកគេអាចប្រមូលមូលនិធិក្នុងតម្លៃកាន់តែទាបនៅផ្សារមូលបត្រនេះ ពួកគេអាចផ្ដល់ប្រាក់កម្ចីដល់ប្រជាជន និងពាណិជ្ជករកម្ពុជាក្នុងតម្លៃកាន់តែទាប»។ លោក Ha ថ្លែងថា៖ «នេះមានន័យថា វិស័យមូលបត្រអាចមានឥទ្ធិពលលើសេដ្ឋកិច្ចកម្ពុជាក្នុងរបៀបវិជ្ជមាន»។
ទិន្នន័យបានពី CSX បង្ហាញថាក្នុងរយៈពេលជាង ៧ ឆ្នាំនៃប្រតិបត្តិការរបស់ទីផ្សារនេះ CSX ទទួលបានក្រុមហ៊ុន ៥ ចុះបញ្ជីនៅផ្សារគោល និងគ្រឹះស្ថានហិរញ្ញវត្ថុ និងធនាគារចំនួន ៣ ដែលបានចុះបញ្ជីជាក្រុមហ៊ុនបោះលក់មូលបត្របំណុល។ ក្រុមហ៊ុនចុះបញ្ជីទាំងនេះបានប្រមូលមូលនិធិរួមចំនួន ១២០ លានដុល្លារក្នុងរយៈពេល ៧ ឆ្នាំនេះ។
នៅក្នុងរយៈពេល ២៧ ឆ្នាំ អេស៊ីលីដា បានប្រែក្លាយពីអង្គការមិនមែនរដ្ឋាភិបាលទៅជាធនាគារពាណិជ្ជឈានមុខគេមួយនៅកម្ពុជា។
គិតត្រឹមចុងខែកញ្ញា ឆ្នាំ ២០១៩ នេះ អេស៊ីលីដា ជាធនាគារឈានមុខគេនៅកម្ពុជាទាក់ទងនឹងកម្ចីដុល (៣,៦១ ពាន់លានដុល្លារ) និងភាគហ៊ុនសរុប (៨៩៨,៥៦ លានដុល្លារ) និងជាធនាគារឈានមុខគេទី ២ ទាក់ទងនឹងទ្រព្យសកម្មសរុប (៦,០៩ ពាន់លានដុល្លារ) និងប្រាក់បញ្ញើសរុប (៤,២៤ ពាន់លានដុល្លារ)៕LA
