ភ្នំពេញៈ ធនាគារអេស៊ីលីដា (ABC) ដែលជាក្រុមហ៊ុនចុះបញ្ជីនៅក្រុមហ៊ុនផ្សារមូលបត្រកម្ពុជា (CSX) បានរាយការណ៍ពីប្រតិបត្តិការអាជីវកម្មល្អប្រសើរនៅក្នុងត្រីមាសទី ១ ឆ្នាំនេះជាមួយនឹងប្រាក់ចំណេញកើនជាង ១៧ ភាគរយបើធៀបនឹងរយៈពេលដូចគ្នាឆ្នាំ ២០១៩។
យោងតាមរបាយការណ៍ហិរញ្ញវត្ថុប្រាក់ចំណេញរបស់ធនាគារនេះមានប្រហែល ៣៦ លានដុល្លារនៅត្រីមាសទី ១ ឆ្នាំនេះធៀបនឹង ២៩ លានដុល្លារកាលពីត្រីមាសទី ១ ឆ្នាំមុនកើនឡើងជាង ១៧ ភាគរយ។
លោក Jong Weon Ha អនុប្រធាន CSX បានប្រាប់ភ្នំពេញប៉ុស្ដិ៍កាលពីថ្ងៃព្រហស្បតិ៍ថា ប្រតិបត្តិការហិរញ្ញវត្ថុដ៏ល្អរបស់ធនាគារអេស៊ីលីដា បង្ហាញថា ធនាគារនេះមានសមត្ថភាពដ៏រឹងមាំក្នុងការរកប្រាក់ចំណេញនៅគ្រប់ស្ថានការណ៍សេដ្ឋកិច្ច។
លោកថ្លែងថា៖ «អេស៊ីលីដា ក៏នឹងទទួលបានអតិថិជនក្នុងស្រុកកាន់តែច្រើន និងកេរ្តិ៍ឈ្មោះកាន់តែល្អ ដោយសារការទទួលអត្ថប្រយោជន៍ពីការចុះបញ្ជី CSX»។
ធនាគារអេស៊ីលីដាដែលចុះបញ្ជីនៅ CSX កាលពីថ្ងៃទី ២៥ ខែឧសភាបានប្រមូលនិធិប្រហែល ១៧,៥ លានដុល្លារពីការបោះផ្សាយលក់មូលបត្រកម្មសិទ្ធិលើកដំបូងជាសាធារណៈ (IPO)។ ធនាគារនេះក្លាយជាក្រុមហ៊ុនចុះបញ្ជីភាគហ៊ុនទី ៦ និងជាធនាគារពាណិជ្ជលើកដំបូងចេញលក់ភាគហ៊ុននៅលើផ្សារហ៊ុននេះជាមួយនឹងភាគហ៊ុនសរុប ៤,៣៤ លាន។ នេះបើតាមឯកសារធនាគារនេះផ្ញើទៅ CSX។
លោក Ha បានឲ្យដឹងទៀតថា ចាប់តាំងពីការចុះបញ្ជីរបស់ ABC ទីផ្សារនេះមានសកម្មភាពខ្លាំង។ ទំហំជួញដូរប្រចាំថ្ងៃជាមធ្យមរបស់ ABC មាន ២៧៣ ៤០៥ ភាគហ៊ុន ខណៈតម្លៃជួញដូរជាមធ្យមមាន ៥,៧៨ ពាន់លានរៀល។
លោកថ្លែងថា៖ «ABC បានបង្កើតក្រុមវិនិយោគិនរាប់ពាន់នាក់ឲ្យចូលមកក្នុងប្រព័ន្ធជួញដូររបស់យើងក្នុងពេលតែមួយ ហើយវាជាប្រវត្តិសាស្ដ្រសម្រាប់ទីផ្សាររបស់យើង។ ក្នុងរយៈពេលប៉ុន្មានឆ្នាំនេះ ភាគច្រើននៃភាគហ៊ុនចុះបញ្ជីនៅ CSX គឺជាភាគហ៊ុនដែលមានត្រឹមតម្លៃ ដូច្នេះទីផ្សារនេះមិនមានសកម្មភាពខ្លាំងទេ»។
លោកបន្តថា៖ «បន្ទាប់ពីការចុះបញ្ជី ABC បានក្លាយជាភាគហ៊ុនមានសម្ទុះខ្លាំង ដែលក្រុមវិនិយោគិនកំពុងព្យាយាមទទួលបានប្រាក់ចំណេញពីការជួញដូរ។ វិនិយោគិនជាច្រើនកំពុងបើកគណនីជួញដូរជារៀងរាល់ថ្ងៃ ដើម្បីចូលរួមក្នុងការវិនិយោគនេះ»៕LA