ភ្នំពេញៈ គណៈកម្មការមូលបត្រកម្ពុជា (SECC) បានយល់ព្រមជាគោលការណ៍អនុញ្ញាតឲ្យក្រុមហ៊ុន អេស៊ីលីដា ស៊ីឃ្យូរីធី របស់ធនាគារ អេស៊ីលីដា ធ្វើជាក្រុមហ៊ុនចែកចាយលក់មូលបត្រ។ នេះបើតាមលទ្ធផលនៃកិច្ចប្រជុំគណៈកម្មការមូលបត្រកាលពីថ្ងៃអង្គារ។
បច្ចុប្បន្នក្រុមហ៊ុន ACLEDA Securities Plc. កំពុងប្រតិបត្តិការជាក្រុមហ៊ុនឈ្មួញជើងសាមូលបត្រ និងជាភ្នាក់ងារតំណាងម្ចាស់មូលបត្របំណុល។
លោក ហោ ស៊ីម៉េត នាយកប្រតិបត្តិនៃក្រុមហ៊ុន ACLEDA Securities Plc. បានឲ្យដឹងថា ការទទួលបានការអនុម័តពី SECC ឲ្យ ACLEDA Securities Plc. ធ្វើជាក្រុមហ៊ុនចែកចាយលក់មូលបត្រអាចនិយាយថា ជាដំណើរវិវឌ្ឍន៍ថ្មីមួយទៀតរបស់ក្រុមហ៊ុនក្នុងការចូលរួមជំរុញ និងលើកកម្ពស់វិស័យមូលបត្រនៅកម្ពុជា។
លោកថ្លែងថា៖ «ការទទួលបានការយល់ព្រមជាគោលការណ៍ពី SECC គឺជាឱកាសមួយដែលអាចធ្វើឲ្យក្រុមហ៊ុន ACLEDA Securities Plc. ផ្តល់សេវាឲ្យអតិថិជនបានកាន់តែទូលំទូលាយ»។
លោកបន្តថា៖ «តាមរយៈកំណើននៃក្រុមហ៊ុនចុះបញ្ជីក្នុងផ្សារហ៊ុន និងទំហំជួញដូរប្រចាំថ្ងៃ ដែលមានការកើនឡើងជាបន្តបន្ទាប់នេះ យើងរំពឹងថា ដំណើរវិវឌ្ឍន៍នឹងកាន់តែមានភាពល្អប្រសើរនាពេលអនាគត»។
យោងតាមលទ្ធផលនៃកិច្ចប្រជុំគណៈកម្មការមូលបត្រកម្ពុជា លើកទី៥៦ ដែលដឹកនាំដោយលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ SECC ក៏បានអនុម័តជាគោលការណ៍លើសំណើរបស់ក្រុមហ៊ុនមួយចំនួនពាក់ព័ន្ធនឹងទីផ្សារមូលបត្រកម្ពុជា ដូចជា ការអនុញ្ញាតជាគោលការណ៍លើសំណើសុំបោះផ្សាយលក់មូលបត្របំណុលជាសាធារណៈរបស់ធនាគារ ABA យល់ព្រមលើសំណើសុំអាជ្ញាប័ណ្ណឈ្មួញជើងសាឧបករណ៍និស្សន្ទរបស់ក្រុមហ៊ុន Ganatrader Intellisystem Co., Ltd.និងការសុំអាជ្ញាប័ណ្ណក្រុមហ៊ុនគ្រប់គ្រងមូលនិធិរបស់ក្រុមហ៊ុន S.J Asset Management Co., Ltd. និងក្រុមហ៊ុន OBOR Management Co., Ltd.ផងដែរ។
SECC ក៏បានយល់ព្រមទទួលស្គាល់ធនាគារ B.I.C (Cambodia) Bank Plc. ជាភ្នាក់ងារទូទាត់សាច់ប្រាក់ពាក់ព័ន្ធនឹងមូលបត្រផងដែរ។
គណៈកម្មការមូលបត្រកម្ពុជា ក៏បានធ្វើវិសោធនកម្មលើសេចក្តីព្រាងប្រកាសស្តីពីការដាក់ឲ្យអនុវត្តវិធានប្រតិបត្តិការទីផ្សារមូលបត្ររបស់ក្រុមហ៊ុនផ្សារមូលបត្រកម្ពុជា ដោយបន្ថែមម៉ោងជួញដូរពីម៉ោង ៨:០០ នាទីព្រឹក រហូតដល់ម៉ោង ៣:០០ រសៀលផងដែរ។
លោក សុខ ដារ៉ា អគ្គនាយករង SECC បាននិយាយថា កំណើននៃការដាក់ពាក្យស្នើសុំចុះបញ្ជី និងកំណើនការវិនិយោគរបស់ក្រុមហ៊ុនដែលមានវិជ្ជាជីវៈនៅក្នុងផ្សារមូលបត្រ គឺជាសញ្ញាណវិជ្ជមានថ្មីបន្ថែមទៀត សម្រាប់វិស័យមូលបត្រកម្ពុជា។
លោកបានថ្លែងថា៖ «អាទិភាពនៃក្រុមហ៊ុនថ្មីៗទាំងនេះ គឺជាសញ្ញានៃកំណើនរបស់ក្រុមហ៊ុនជំនាញដែលមានដើមទុន និងគុណវឌ្ឍន៍ហើយនឹងមានទំនុកចិត្ត ចំពោះការវិនិយោគក្នុងវិស័យមូលបត្រកម្ពុជា»។
បច្ចុប្បន្នផ្សារមូលបត្រកម្ពុជា មានក្រុមហ៊ុនចុះបញ្ជី ៧ ក្នុងនោះ ៥ ជាក្រុមហ៊ុនបោះផ្សាយលក់ភាគហ៊ុន និង ២ ជាក្រុមហ៊ុនបោះផ្សាយមូលបត្របំណុល៕