.jpg)
រដ្ឋមន្រ្តីក្រសួងសាធារការ និងដឹកជញ្ជូន លោក ស៊ុន ចាន់ថុល ក្នុងនាវេទិកាដឹកជញ្ជូនអន្តរជាតិ ដែលរៀបចំឡើងនៅប្រទេស អាល្លឺម៉ង់។ រូបថត ក្រសួងសាធារណការ និងដឹកជញ្ជូន
ភ្នំពេញៈ អេស៊ីលីដា ដែលជាធនាគារគ្រប់គ្រងដោយវិនិយោគិនក្នុងស្រុករបស់កម្ពុជា និងគ្រឹះស្ថាន ឃេស អ៊ិននើវេសិន ម.ក ដែលជាក្រុមហ៊ុនផ្តល់សេវាផ្ទេរមូលនិធិឌីជីថលបានប្រកាសជាផ្លូវការពីភាពជាដៃគូក្នុងការដាក់ឲ្យដំណើរការសេវាផ្ទេរប្រាក់ និងដាក់ដកប្រាក់ ដើម្បីពង្រីកសេវាទាំងនេះដល់អតិថិជនទាំងអស់ ជាពិសេសនៅតាមសហគមន៍។
កិច្ចព្រមព្រៀងភាពជាដៃគូនេះត្រូវបានប្រកាសកាលពីសប្ដាហ៍មុន ដើម្បីផ្ដល់ឲ្យអតិថិជន និងសាធារណជនទាំងអស់ចំណេញពេលវេលា កាត់បន្ថយការចំណាយក្នុងការផ្ទេរប្រាក់ និងដាក់ដកប្រាក់ដែលជាផ្នែកមួយនៃការពង្រឹង និង ពង្រីកសេវាកម្មឌីជីថលឲ្យមានភាពសម្បូរបែប និងសម្រួលដល់ប្រតិបត្តិការសាច់ប្រាក់របស់អតិថិជន និងសាធារណជន។
លោក អ៊ិន ចាន់នី ប្រធាននាយកប្រតិបត្តិធនាគាអេស៊ីលីដា ភីអិលស៊ី បានឲ្យដឹងថា គោលបំណងនៃកិច្ចសហប្រតិបត្តិការ គឺដើម្បីជួយសម្រួលដល់អតិថិជនក្នុងការធ្វើប្រតិបត្តិការ ការផ្ទេរមូលនិធិរវាងគណនី Core Banking របស់ធនាគារអេស៊ីលីដា និងគណនី E-Wallet របស់គ្រឹះស្ថាន ឃេស អ៊ិននើវេសិន ម.ក ការផ្ទេរប្រាក់រវាងគណនីអេស៊ីលីដាទាន់ចិត្ត និងគណនី E-Wallet របស់ ឃេស អ៊ិននើវេសិន ម.ក និងដាក់ប្រាក់ និងដកប្រាក់ពីគណនី E-Wallet របស់ ឃេស អ៊ិននើវេសិន ម.ក តាមរយៈម៉ាស៊ីន អេធីអឹម របស់ធនាគារអេស៊ីលីដា ភីអិលស៊ី។
លោកនិយាយថា៖ «កិច្ចព្រមព្រៀងនេះនឹងអាចឲ្យធនាគារអេស៊ីលីដា និងគ្រឹះស្ថាន ឃេស អ៊ិននើវេសិន ម.ក ពង្រីកឲ្យកាន់តែទូលំទូលាយសេវាផ្ទេរប្រាក់ និងដកដាក់ប្រាក់ទូទាំងប្រទេស និងលើកកម្ពស់ការអភិវឌ្ឍការប្រើប្រាស់បច្ចេកវិទ្យាហិរញ្ញវត្ថុ (FinTech) ប្រកបដោយប្រសិទ្ធភាព និងសុវត្ថិភាពខ្ពស់។
លោក Pes Kimsrean ប្រធាននាយកប្រតិបត្តិការ ឃេស អ៊ិននើវេសិន ម.ក បាននិយាយថា អតិថិជនរបស់ធនាគារអេស៊ីលីដាទាំងអស់នឹងទទួលបានបទពិសោធបច្ចេកវិទ្យាថ្មីៗពីក្រុមហ៊ុនរបស់លោកក្នុងការផ្តល់នូវភាពងាយស្រួល រហ័ស ទុកចិត្ត និងសុវត្ថិភាព។
លោកបន្តថា៖ «យើងរីករាយក្នុងការធ្វើជាដៃគូយុទ្ធសាស្ដ្រជាមួយធនាគារអេស៊ីលីដា។ គ្រឹះស្ថាន ឃេស បន្ទាប់ពីការខិតខំប្រឹងប្រែងអស់រយៈពេល ៣ ឆ្នាំយើងជឿជាក់ថា ទីផ្សារនេះនៅពេលនេះមានភាពចាស់ទុំក្នុងការប្រើប្រាស់ផលិតផលដ៏សំខាន់របស់យើង ដូចជា «KESS CHAT»។ KESS CHAT ផ្សារភ្ជាប់ជាមួយកសិករ អ្នកប្រើប្រាស់ អ្នកលក់ដូរ ឬអ្នកផ្គត់ផ្គង់អាចទទួលបានការទូទាត់តាមរយៈ Wechat/Alipay/Visa Card/MasterCard និងកាតអេធីអឹម ធនាគារអេស៊ីលីដាភីអិលស៊ី»។
គិតត្រឹមដំណាច់ខែមីនា ឆ្នាំ ២០២០ ធនាគារអេស៊ីលីដា មានទ្រព្យសកម្មសរុបប្រមាណ ៦,១៥ ពាន់លានដុល្លារ សមតុល្យឥណទានសរុបប្រមាណ ៣,៩៩ ពាន់លានដុល្លារ ប្រាក់បញ្ញើសន្សំសរុប ៤,៣៥ ពាន់លានដុល្លារ និងចំនួនអ្នកចុះឈ្មោះប្រើប្រាស់សេវាធនាគារ ឌីជីថល អេស៊ីលីដាទាន់ចិត្តជាង ១,៥ លាននាក់៕LA
