ភ្នំពេញ៖ ធនាគារអេស៊ីលីដា ជាធនាគារក្នុងស្រុកឈានមុខគេរកបានប្រាក់ចំណេញសុទ្ធជាង ៤៤ លានដុល្លារ ក្នុងត្រីមាសទី១ ឆ្នាំ ២០២១ នេះ ពីប្រតិបត្តិការអាជីវកម្មរបស់ខ្លួន ដោយមានការកើនឡើង ២៨,៥៣ ភាគរយ ធៀបទៅនឹងត្រីមាសដូចគ្នាកាលពីឆ្នាំ ២០២០ មុន ទោះបីជាការរីករាលដាលនៃជំងឺកូវីដ ១៩ នៅមិនទាន់ត្រូវបានគ្រប់គ្រងបានក្តី។
យោងតាមរបាយការណ៍ហិរញ្ញវត្ថុរបស់ធនាគារអេស៊ីលីដាផ្ញើទៅកាន់ផ្សារមូលបត្រកម្ពុជាកាលពីថ្ងៃទី ១០ ឧសភា គិតត្រឹមដំណាច់ត្រីមាសទី១ ឆ្នាំ ២០២១ នេះ ធនាគារដែលកាន់កាប់ភាគច្រើនដោយវិនិយោគិនក្នុងស្រុកទទួលបានប្រាក់ចំណេញសុទ្ធជាង ៤៤ លានដុល្លារអាមេរិក កើនឡើងប្រមាណ ២៨,៥៣ ភាគរយពីជាង ៣៤ លានដុល្លារអាមេរិក ក្នុងត្រីមាសទី១ ឆ្នាំមុន។
«ការកើនឡើងនេះ ភាគច្រើនបណ្តាលមកពីការកើនឡើងនូវចំណូលការប្រាក់សុទ្ធចំនួន ១២,៤៧% ស្មើនឹង ៤៥,៦២ ប៊ីលានរៀល ធៀបនឹងត្រីមាសទី១ ឆ្នាំ ២០២០»។ នេះបើយោងតាមការបញ្ជាក់របស់ធនាគារ។
លោក អ៊ិន ចាន់នី ប្រធានអគ្គនាយករបស់ធនាគារអេស៊ីលីដាបានប្រាប់ ភ្នំពេញ ប៉ុស្តិ៍ កាលពីពេលថ្មីៗនេះថា ទោះបីជាមានការរីករាលដាលនៃជំងឺកូវីដ ១៩ ក្តី លោកសង្កេតឃើញថា វិស័យធនាគារ និងហិរញ្ញវត្ថុ មិនសូវមានផលប៉ះពាល់ទេ ដោយសារតែរដ្ឋាភិបាលបានផ្ដល់អាទិភាពដល់វិស័យនេះ ជាមធ្យោបាយក្នុងការជំរុញសកម្មភាពសេដ្ឋកិច្ច និងជួយសម្រួលដល់ការរស់នៅប្រចាំថ្ងៃរបស់ប្រជាជននៅទីក្រុង និងនៅតាមជនបទ។
លោកបានថ្លែងថា៖ «ស្ថិតក្នុងកាលៈទេសៈនេះ ធនាគារនៅតែមានប្រតិបត្តិការ ដើម្បីបម្រើតម្រូវការអតិថិជនលើសេវាហិរញ្ញវត្ថុ ខណៈដែលធនាគារមួយចំនួនកំពុងប្រើប្រាស់បច្ចេកវិទ្យាហិរញ្ញវត្ថុ និងកម្មវិធីឌីជីថល ធនាគារអ៊ីនធឺណិត និងកម្មវិធីធនាគារចល័ត ដើម្បីផ្ដល់សេវាដល់អតិថិជនតាមដែលអាចធ្វើទៅបាន»។
ធនាគារអេស៊ីលីដាជាធនាគារពាណិជ្ជដំបូងគេដែលចុះបញ្ជីលើផ្សារហ៊ុនដែលបានចុះបញ្ជីជាផ្លូវការនៅក្រុមហ៊ុនផ្សារមូលបត្រកម្ពុជា កាលពីចុងខែឧសភា ឆ្នាំ ២០២០ កន្លងមក។
ជាមួយនឹងបទពិសោធន៍ជាង ២៧ ឆ្នាំ ធនាគារអេស៊ីលីដា ភីអិលស៊ី បានចាប់ផ្តើមក្នុងនាមជាអង្គការមិនមែនរដ្ឋាភិបាលមួយកាលពីឆ្នាំ ១៩៩៣ ជាមួយដើមទុនវិនិយោគ ៦០០ ០០០ ដុល្លារ។ បច្ចុប្បន្នដើមទុនរបស់ធនាគារមួយនេះ បានកើនឡើង ៧០០ ដង ខណៈទ្រព្យសកម្មសរុបមានចំនួនប្រហែល ៦ ពាន់លានដុល្លារ កើនឡើងជាង ៩ ០០០ ដង និងប្រាក់ចំណេញសុទ្ធបានកើនឡើងជិត ២ ០០០ដង។ នេះបើយោងតាមលោក អ៊ិន ចាន់នី៕LA