The Phnom Penh Post Search

Search form

Logo of Phnom Penh Post newspaper Phnom Penh Post - អំពើ​ពុករលួយ​នៅ​តែ​ជា​បញ្ហា​ដល់​អាជីវកម្ម​




អំពើ​ពុករលួយ​នៅ​តែ​ជា​បញ្ហា​ដល់​អាជីវកម្ម​

អំពើ​ពុករលួយ​នៅ​តែ​ជា​បញ្ហា​ដល់​អាជីវកម្ម​

121212_12
សិក្ខាសាលាបង្ហាញពីស្ថានភាពអំពើពុករលួយរបស់អង្គការតម្លាភាពកម្ពុជា ផា លីណា

ភ្នំពេញៈ របាយ​ការណ៍​មួយ​ចំនួន​ចេញ​ផ្សាយ​កាល​ពី​ថ្មី​ៗ​នេះ​បង្ហាញ​ថា​អំពើ​ពុក​រលួយ​នៅ​តែ​ជា​បញ្ហា​ប្រឈម និង​រាំង​ស្ទះ​ដល់​ការ​លើក​កម្ពស់​បរិយាកាស​ពាណិជ្ជកម្ម​នៅ​កម្ពុជា។

កាល​ពី​សប្តាហ៍​មុន​អង្គការ​តម្លាភាព​អន្តរជាតិ​កម្ពុជា បាន​ចេញ​របាយ​ការណ៍​ដោយ​បង្ហាញ​ថា កម្ពុជា​ស្ថិត​នៅ​ចំណាត់​ថ្នាក់​ទី​១៥៧ នៅ​ក្នុង​ចំណោម ១៧៦​ប្រទេស​ខាង​អំពើ​ពុក​រលួយ​។ របាយ​ការណ៍​បង្ហាញ​ថា កម្ពុជា​មាន​អំពើ​ពុក​រលួយ​តិច​ជាង​ប្រទេស​ឡាវ តែ​ច្រើន​ជាង​បង់​ក្លាដែស ប៉ាគីស្ថាន និង​ប្រទេស​នូវែលហ្គីណេ។

កាល​ពី​ខែ​មករា ធនាគារ​អភិវឌ្ឍន៍​អាស៊ី ADB​ចេញ​ផ្សាយ​របាយ​ការណ៍​ស្តី​ពី​អភិបាល​កិច្ច​ប្រចាំ​ប្រទេស ការ​វាយ​តម្លៃ​ហានិភ័យ និង​ផែន​ការ​គ្រប់​គ្រង​ហានិភ័យ ដោយ​បង្ហាញ​ថា អំពើ​ពុក​រលួយ នៅ​តែ​ជា​បញ្ហា​ដ៏​ធ្ងន់​ធ្ងរ និង​ពិបាក​កាត់​បន្ថយ​ក្នុង​រយៈ​ពេល​ខ្លី ហើយ​ការ​កាត់​បន្ថយ​អំពើ​ពុក​រលួយ​មក​នៅ​កម្រិត​ទាប ពិត​ជា​មាន​ការ​លំបាក​ខ្លាំង​ណាស់ ប៉ុន្តែ​របាយ​ការណ៍​នោះ មិន​បាន​បង្ហាញ​ថា ផែន​ការ​នេះ​នឹង​ត្រូវ​យក​ទៅ​អនុវត្ត​នៅ​ថ្នាក់​លើ​ឡើយ។

របាយកាណ៍ ដដែល​បាន​លើក​ឡើង​ថា អំពើ​ពុក​រលួយ​កើត​មាន​នៅ​ក្នុង​វិស័យ​អាទិភាព​របស់ ADB រួម​មាន​ការ​អប់រំ ការងារ​សាធារណៈ​វិស័យ​កសិកម្ម និង​ការ​អភិវឌ្ឍ​ជនបទ វិស័យ​ឯកជន និង​ហិរញ្ញវត្ថុ និង​ហានិភ័យ​អភិបាល​កិច្ច​បណ្តាល​ពី​ការ​គ្រប់​គ្រង​មន្ត្រី​រាជការ​មិន​បាន​គ្រប់​គ្រាន់​។

លោក Peter J. Brimble នាយក​រង​ប្រចាំ​ប្រទេស​របស់​ធនាគារ​អភិវឌ្ឍន៍​អាស៊ី​ប្រចាំ​នៅ​កម្ពុជា​បាន​លើក​ឡើង​ថា ការ​វាយ​តម្លៃ​ជារួម​របស់​រដ្ឋាភិបាល​និង ADB​ចេញ​ផ្សាយ​ឆ្នាំ​២០១២ បាន​បញ្ជាក់​យ៉ាង​ច្បាស់​ថា អំពើ​ពុក​រលួយ​នៅ​គ្រប់​កម្រិត​ទាំង​អស់ ជា​ក្តី​កង្វល់​ដ៏​សំខាន់​សម្រាប់​លើក​កម្ពស់​បរិយាកាស​អាជីវកម្ម និង​អភិបាល​កិច្ច​រួម​នៅ​កម្ពុជា ហើយ​បញ្ហា​នេះ​នៅ​តែ​ជា​ករណី​គួរ​បារម្ភ​។

លោក​បាន​ឲ្យ​ដឹង​ថា ដើម្បី​ដោះ​ស្រាយ​ក្តី​កង្វល់​ទាំង​នោះ​រដ្ឋាភិបាល​បាន​ធ្វើ​កំណែ​ទម្រង់​ច្បាប់ និង​គោល​នយោបាយ​មួយ​ចំនួន​ដូច​ជា​ច្បាប់​ប្រឆាំង​អំពើ​ពុករលួយ លទ្ធ​កម្ម ការ​គ្រប់​គ្រង​ហិរញ្ញវត្ថុ​សាធារណៈ វិមជ្ឈការ​។ល​។ ប៉ុន្តែ​លោក​អះអាង​ថា ការ​ងារ​ទាំង​នោះ​មិន​ទាន់​ទទួល​ផ្លែ​ផ្កា​នៅ​ឡើយ​ទេ។

កិច្ច​ខិតខំ​ជា​បន្ត​បន្ទាប់​របស់​រដ្ឋាភិបាល ដែល​ទទួល​បាន​ការ​គាំទ្រ​ពី​ដៃ​គូ​អភិវឌ្ឍន៍ និង​សហគមន៍​អាជីវកម្ម ជា​កត្តា​ចំា​បាច់​ដើម្បី​ធានា​ដល់​ការ​កាត់​បន្ថយ​អំពើ​ពុករលួយ​។

លោក Peter J. Brimble បាន​បន្ថែម​ថា​៖ «ប្រសិន​បើ​ស្ថានភាព​អភិបាល​កិច្ច ដែល​មិន​បាន​ឆ្លុះ​បញ្ចាំង​តាម​រយៈ​លំហូរ FDI ពី​ជប៉ុន និង​វិស័យ​កាត់​ដេរ ក៏​ដូច​ជា​កំណើន​សន្ទស្សន៍​ព័ត៌មាន​វិទ្យា នៅ​ឆ្នាំ​២០១២ កាន់​តែ​យ៉ាប់​យ៉ឺន​ទៅ​ៗ បរិយាកាស FDI នឹង​ទទួល​រង​ផល​ប៉ះ​ពាល់​អវិជ្ជមាន»។

ទោះបី​យ៉ាង​នេះក្តី លោក Peter J. Brimble​បាន​បញ្ជាក់​ថា លំហូរ​វិនិយោគិន​ជប៉ុន​យ៉ាង​ឆាប់​រហ័ស​កាល​ពី​ពេល​ថ្មី​ៗ​នេះ​មក​កម្ពុជា​ស​បញ្ជាក់​ឲ្យ​ឃើញ​ថា​សន្ទស្សន៍​មួយ​ចំនួន​អាច​នឹង​មិន​ឆ្លុះ​បញ្ចាំង​អំពី​ស្ថាន​ភាព​ជាក់​ស្តែង​។

លោក​ថ្លែង​ថា៖ «វិនិយោគិន​ជប៉ុន​ត្រូវ​បាន​គេ​ដឹង​ថា​មាន​ភាព​រសើប​ពី​រឿង​អភិបាល​កិច្ច និង​តម្លា​ភាព ហើយ​អ្នក​ទាំង​នោះ​បាន​បង្ហាញ​ទំនុក​ចិត្ត​របស់​ខ្លួន​ដោយ​ការ​គាំទ្រ​ដល់​ទឹក​ប្រាក់​ដែល​ខ្លួន​បាន​វិនិយោគ និង​ការ​សាង​សង់​រោង​ចក្រ​ទំនើប​ៗ​នៅ​កម្ពុជា។ ខ្ញុំ​បាន​ជួប​ជាមួយ​វិនិយោ​គិន​ជប៉ុន​ដែល​បាន​បង្ហាញ​ក្តី​បារម្ភ​ធ្ងន់​ធ្ងរ​ចំពោះ​តម្លាភាព និង​ថ្លៃ​ដឹក​ជញ្ជូន ការ​ចំណាយ​លើ​ថាមពល និង​កង្វះ​ខាត​ជំនាញ​តែ​មិន​មែន​បារម្ភ​អំពី​អំពើ​ពុក​រលួយ​ឡើយ​»​។

លោក​បាន​បន្ត​ថា​វិនិយោគិន​បរទេស​ដែល​មក​ទស្សនា​កម្ពុជា ហើយ​វាយ​តម្លៃ​ស្ថានភាព​នៅ​ទី​នេះ​យ៉ាង​យក​ចិត្ត​ទុក​ដាក់​អាច​ឬ​មិន​អាច​សម្រេច​ចិត្ត​មក​បណ្តាក់​ទុន​នៅ​ទី​នេះ ប៉ុន្តែ​ពួក​គេ​នឹង​ផ្អែក​លើ​លក្ខ​ខណ្ឌ​ដែល​ថា​កម្ពុជា​ជា​ទី​តាំង​វិនិយោគ មិន​មែន​ផ្អែក​តែ​លើ​សន្ទស្សន៍​អន្តរជាតិ​និង​ទិន្នន័យ​បន្ទាប់​បន្សំ​ទេ​។ លោក​បន្ថែម​ថា បរិយាកាស​អាជីវកម្ម​កម្ពុជា មាន​ភាព​វិជ្ជមាន​ដោយ​ក្រុមហ៊ុន​ថ្មី​ៗ​ជិត​១០០ បាន​មក​បណ្តាក់​ទុន​នៅ​កម្ពុជា​ក្នុង​រយៈ​ពេល​៨​ខែ​ដំបូង ឆ្នាំ​២០១២។

លោក ជាតិ ខេមរា មន្ត្រី​ជាន់​ខ្ពស់​ប្រចាំ​សមាគម​រោងចក្រ​កាត់​ដេរ​នៅ​កម្ពុជា​បាន​ឲ្យ​ដឹង​ថា សមាគម​របស់​លោក មិន​ធ្លាប់​ប្រឈម​នឹង​អំពើ​ពុក​រលួយ​ដែល​ប្រព្រឹត្ត​ដោយ​មន្ត្រី​មូល​ដ្ឋាន​ឡើយ។

លោក​បាន​ថ្លែង​ថា៖ «ជា​ការ​ពិត​ណាស់ យើង​មាន​ការ​ពន្យារ​ពេល​តិច​តួច​លើ​ការ​នាំ​ចេញ ដោយ​សារ​រោង​ចក្រ​ទាំង​នោះ​មិន​មាន​ឯកសារ​គ្រប់​គ្រាន់។​ខ្ញុំ​មិន​បាន​សំដៅ​ដល់​រោង​ចក្រ​មួយ​ៗ​នោះ​ទេ ប៉ុន្តែ​ខ្ញុំ​មិន​បាន​ទទួល​ឯកសារ​ពី​សមាជិក​ទាំង​នោះ»​។

លោក ឱម យ៉ិន​ទៀង​ប្រធាន​អង្គភាព​ប្រឆាំង​អំពើ​ពុក​រលួយ កាល​ពី​ថ្ងៃ​ទី​៩ បាន​ឲ្យ​ដឹង​ថា អង្គ​ភាព​ប្រឆាំង​អំពើ​ពុក​រលួយ​នឹង​ខំ​ប្រយុទ្ធ​ប្រឆាំង​អំពើ​ពុក​រលួយ​នៅ​ឆ្នាំ​២០១៣​ពិសេស​ការ​យក​ថ្លៃ​សេវា​ដោយ​ខុស​ច្បាប់​។

កម្ពុជា បាន​ទទួល​ការ​វិនិយោគ​ផ្ទាល់​ពី ប្រទេស​(FDI)​ជាង​៨៤៥​លាន​ដុល្លារ​ក្នុង​រយៈ​ពេល​៧​ខែ​ដំបូង ឆ្នាំ​នេះ។ នេះ​បើ​តាម​ទិន្នន័យ​ទទួល​បាន​ពី​ក្រុម​ប្រឹក្សា​អភិវឌ្ឍន៍​កម្ពុជា​(CDC)៕CS

អត្ថបទគួរចាប់អារម្មណ៍