ភ្នំពេញ៖ រដ្ឋាភិបាលកម្ពុជា បានប្រកាសកាលពីថ្ងៃទី ១៤ ខែមេសា បិទខ្ទប់ទីក្រុងភ្នំពេញទាំងមូល និងក្រុងតាខ្មៅ នៃខេត្តកណ្ដាល ដែលបានអនុវត្តចាប់ពីថ្ងៃទី ១៥ ខែ មេសា ឆ្នាំ ២០២១ ដល់ថ្ងៃទី ២៨ ខែ មេសា ឆ្នាំ ២០២១ ដើម្បីគ្រប់គ្រងការរីករាលដាលជំងឺកូវីដ ១៩ និងបិទបញ្ចប់ព្រឹត្តិការណ៍ ២០ កុម្ភះ។
ទន្ទឹមនឹងនេះ ធនាគារជាតិនៃកម្ពុជា បានចេញសេចក្ដីប្រកាសព័ត៌មានមួយកាលពីថ្ងៃទី ២០ ខែមេសា លើកទឹកចិត្តឲ្យគ្រឹះស្ថានហិរញ្ញវត្ថុ (FIs) ប្រើប្រាស់ការទូទាត់តាមប្រព័ន្ធអេឡិចត្រូនិកឲ្យបានច្រើនតាមដែលអាចពួកគេធ្វើទៅបាន ជាពិសេសការប្រើប្រាស់ការទូទាត់តាមទូរស័ព្ទចល័ត ដែលមានសុវត្ថិភាព ងាយស្រួល និងរហ័សបំផុត។
លោក អ៊ិន ចាន់នី ប្រធានសមាគមធនាគារកម្ពុជា (ABC) បានផ្តល់បទសម្ភាសជាមួយលោក ម៉ៃ គុណមករា ការីនិពន្ធព័ត៌មានសេដ្ឋកិច្ចនៅកាសែត ភ្នំពេញ ប៉ុស្ដិ៍ តាមរយៈសារអេឡិចត្រូនិកអំពីប្រតិបត្តិការរបស់វិស័យហិរញ្ញវត្ថុ ក្នុងអំឡុងពេលការបិទខ្ទប់នេះ។
NBC បានធ្វើសេចក្ដីប្រកាសមួយកាលពីថ្ងៃទី ២០ ខែមេសា ដើម្បីជំរុញឲ្យ FIs លើកកម្ពស់ការប្រើប្រាស់ការទូទាត់ដោយមិនមានសាច់ប្រាក់ ជាជាងការទូទាត់ដោយសាច់ប្រាក់ តើ ABC បានជូនដំណឹងអ្វីខ្លះដល់សមាជិករបស់ខ្លួន?
លោក ចាន់នី៖ ទាក់ទងនឹងការជំរុញឲ្យមានការប្រើប្រាស់ការទូទាត់ដោយមិនមានសាច់ប្រាក់នេះ សមាគមធនាគារនៅកម្ពុជាកំពុងជំរុញវា ដោយសារតែយើងមានក្រុមការងារ ដើម្បីជំរុញលើរបៀបវារៈនេះ។
ABC តែងតែគាំទ្រទិសដៅរបស់និយ័តករ និងរដ្ឋាភិបាល ក្នុងការជំរុញការទូទាត់ដោយមិនមានសាច់ប្រាក់ ឬការទូទាត់ឌីជីថលក្នុងសង្គម ជាពិសេសក្នុងអំឡុងពេលនេះ ដែលជាមធ្យោបាយមួយដើម្បីទប់ស្កាត់ការរីករាលដាលជំងឺកូវីដ ១៩។
យើងលើកទឹកចិត្តយ៉ាងខ្លាំងដល់សមាជិក និងអតិថិជនរបស់យើង សាធារណជន ម្ចាស់អាជីវកម្ម ត្រូវទូទាត់ និងទទួលយកការទូទាត់តាមអេឡិចត្រូនិក តាមរយៈកម្មវិធីឌីជីថល ដែលបច្ចុប្បន្នអាចធ្វើបានដោយសមាជិករបស់យើង។
សមាជិកសហគមន៍របស់យើង បានសហការ ហើយនឹងបន្តធ្វើការងារយ៉ាងជិតស្និទ្ធជាមួយធនាគារជាតិនៃកម្ពុជា ដើម្បីធ្វើឲ្យមានភាពកាន់តែងាយស្រួលក្នុងការធ្វើប្រតិបត្តិការឆ្លងកាត់គ្រឹះស្ថាន ការចំណាយតិច និងសុវត្ថិភាព ក្នុងអំឡុងពេលនេះ។
ABC សូមលើកទឹកចិត្តដល់សាធារណជន ត្រូវទាញយក និងប្រើប្រាស់កម្មវិធីធនាគារនិងការទូទាត់ឌីជីថល ដែលអាចធ្វើទៅបានដោយសមាជិកសហគមន៍របស់យើង។
ខ្ញុំនៅតែមើលឃើញថា គ្រឹះស្ថានហិរញ្ញវត្ថុមួយចំនួនមិនមានការទូទាត់ឌីជីថលសម្រាប់អតិថិជន ដើម្បីបង់ប្រាក់កម្ចីនោះទេ តើអ្វីដែលជាដំណោះស្រាយក្នុងអំឡុងពេលនៃការបិទខ្ទប់នេះ? តើ ABC បានអង្កេតពីនិន្នាការនៃការប្រើប្រាស់ការទូទាត់ឌីជីថលក្នុងអំឡុងពេលនៃការបិទខ្ទប់នេះដែរឬទេ?
លោក ចាន់នី៖ ធនាគារជាច្រើនផ្ដល់រយៈពេលអនុគ្រោះដោយស្វ័យប្រវត្តិ ដែលជាពិសេសបន្តដល់ប្រជាជនដែលស្ថិតនៅក្នុងតំបន់បិទខ្ទប់។ ដោយផ្អែកតាមការអង្កេតរបស់យើង ប្រជាជនភាគច្រើនដែលរស់នៅទីក្រុងភ្នំពេញយល់ដឹងពីការទូទាត់ឌីជីថលនេះច្បាស់ណាស់។ អតិថិជនអាចប្រើប្រាស់ធនាគារដោយមិនចាំបាច់ទៅកាន់សាខាណាមួយឡើយ។
អតិថិជនអាចផ្ទេរមូលនិធិ ទូទាត់វិក្កយបត្រ បញ្ចូលប្រាក់ទូរស័ព្ទ បង់ថ្លៃដឹកជញ្ជូន ឬការទិញទំនិញអនឡាញ និងអ្វីៗច្រើនទៀត។ អតិថិជនអាចទទួលបានអ្វីដែលចាំបាច់ប្រើប្រាស់ប្រចាំថ្ងៃទាំងអស់ តាមកម្មវិធី និងធ្វើការទូទាត់តាមរយៈកម្មវិធីទូរស័ព្ទចល័តរបស់ធនាគារ។
តើការបិទខ្ទប់ប៉ះពាល់ដល់ប្រតិបត្តិការអាជីវកម្មនៅក្នុងវិស័យហិរញ្ញវត្ថុកម្រិតណាដែរ?
លោក ចាន់នី៖ យើងបានអង្កេតឃើញថា មិនមានផលប៉ះពាល់លើធនាគារ និងគ្រឹះស្ថានហិរញ្ញវត្ថុនោះទេ ដោយសារតែរដ្ឋាភិបាល បានផ្ដល់អាទិភាពដល់វិស័យនេះ ជាមធ្យោបាយក្នុងការជំរុញសកម្មភាពសេដ្ឋកិច្ច និងជួយសម្រួលដល់ការរស់នៅប្រចាំថ្ងៃរបស់ប្រជាជននៅទីក្រុង និងនៅតាមជនបទ។
ស្ថិតក្នុងកាលៈទេសៈនេះ ធនាគារនៅតែមានប្រតិបត្តិការ ដើម្បីបម្រើតម្រូវការអតិថិជនលើសេវាហិរញ្ញវត្ថុក្នុងអំឡុងពេលការបិទខ្ទប់នេះ ខណៈដែលធនាគារមួយចំនួនកំពុងប្រើប្រាស់បច្ចេកវិទ្យាហិរញ្ញវត្ថុ និងកម្មវិធីឌីជីថល ធនាគារអ៊ីនធឺណិត និងកម្មវិធីធនាគារចល័ត ដើម្បីផ្ដល់សេវាដល់អតិថិជនតាមដែលអាចធ្វើទៅបាន។
ស្ថិតក្នុងឱកាសនេះ សមាគមធនាគារកម្ពុជា និងសមាគមមីក្រូហិរញ្ញវត្ថុកម្ពុជា សូមថ្លែងអំណរគុណយ៉ាងជ្រាលជ្រៅដល់រាជរដ្ឋាភិបាលកម្ពុជា អាជ្ញាធរ នៃគណៈកម្មការជាតិគ្រប់គ្រង នឹងដឹកនាំការអនុវត្តវិធានការបិទខ្ទប់ ធនាគារជាតិនៃកម្ពុជា និងអាជ្ញធរគ្រប់ជាន់ថ្នាក់ទាំងអស់ ក្នុងការជួយសម្រួលអនុញ្ញាតការធ្វើដំណើរសម្រាប់បុគ្គលិកធនាគារ ដើម្បីបំពេញភារកិច្ចរបស់ពួកគេ ក្នុងការផ្ដល់សេវាធនាគារ និងហិរញ្ញវត្ថុដល់សាធារណជន ជាពិសេសនៅតាមតំបន់បិទខ្ទប់នៅទីក្រុងភ្នំពេញ និងក្រុងតាខ្មៅខេត្តកណ្ដាល និងមួយផ្នែកនៃក្រុងព្រះសីហនុ៕LA