ក្រុងរ៉ូមៈ កាលពីថ្ងៃសៅរ៍ ប្រទេស អ៊ីតាលី បានចុះហត្ថលេខាលើពិធីការ «មិនចងភ្ជាប់កាតព្វកិច្ច» មួយជាមួយប្រទេស ចិន ដើម្បីចូលរួមក្នុងគម្រោង «ផ្លូវសូត្រ» សម្រាប់ការដឹកជញ្ជូន និងភ្ជាប់ពាណិជ្ជកម្មថ្មីមួយរបស់ទីក្រុងប៉េកាំង ដែលលាតសន្ធឹងពីទ្វីបអាស៊ីទៅដល់អឺរ៉ុប។
ការចុះហត្ថលេខានេះបានធ្វើឲ្យ អ៊ីតាលី ក្លាយជាប្រទេសទី១ ក្នុងចំណោមសមាជិករបស់ក្រុមប្រទេសមានឧស្សាហកម្មរីកចម្រើនទាំង ៧ (G7) ដែលបានចុះហត្ថលេខាសម្រាប់គម្រោងដ៏ធំបែបនេះ ដែលបានបង្កឲ្យមានភាពមិនសប្បាយចិត្តនៅអាមេរិក និងសហភាពអឺរ៉ុប ខណៈចិនព្យាយាមសម្រេចឲ្យបានតួនាទីលំដាប់ពិភពលោកកាន់តែខ្លាំងជាងនេះ។
ប្រធានាធីបតី ស៊ី ជីនភីង ដែលបានធ្វើដំណើរទស្សនកិច្ចទៅកាន់ប្រទេស អ៊ីតាលី និងលោកនាយករដ្ឋមន្ត្រីអ៊ីតាលី Giuseppe Conte បានចូលរួមក្នុងពិធីមួយសម្រាប់ការចុះហត្ថលេខាលើអនុស្សរណៈនៃការយោគយល់ចំនួន ២៩ ដែលប្រព័ន្ធផ្សព្វផ្សាយអ៊ីតាលីបានឲ្យដឹងថាមានតម្លៃចន្លោះពី ៥ ទៅ ៧ ពាន់លានអឺរ៉ូ (៥,៦ ទៅ ៨ ពាន់លានដុល្លារ)។
កិច្ចព្រមព្រៀងទាំងនេះមានការចូលរួមចុះហត្ថលេខាផងដែរពីលោក He Lifeng ប្រធានគណៈកម្មការអភិវឌ្ឍន៍ជាតិចិន និងលោក Luigi Di Maio ឧបនាយករដ្ឋមន្ត្រីអ៊ីតាលី។
សារព័ត៌មានហិរញ្ញវត្ថុប្រចាំថ្ងៃ Il Sole 24 Ore របស់ប្រទេស អ៊ីតាលី បានរាយការណ៍ថា តម្លៃនៃការវិនិយោគរបស់ចិន អាចកើនឡើងដល់ ២០ ពាន់លានអឺរ៉ូ ប៉ុន្តែបច្ចុប្បន្ននឹងត្រូវបានកម្រិតត្រឹមកំពង់ផែយុទ្ធសាស្រ្តនៅទីក្រុង Genoa និង Trieste។
ប្រទេស អ៊ីតាលី បានទទួលស្វាគមន៍លោក ប្រធានាធិបតីចិន ស៊ី ដែលកាលពីថ្ងៃសុក្រសប្តាហ៍មុន បានធ្វើដំណើរទស្សកិច្ចទៅកាន់ប្រទេសស្ថិតនៅតំបន់អឺរ៉ុបមួយនេះ ដើម្បីបន្ធូរបន្ថយភាពភ័យខ្លាចរបស់ប្រទេសលោកខាងលិចជុំវិញគំនិតផ្តួចផ្តើមហេដ្ឋារចនាសម្ព័ន្ធដឹកជញ្ជូនរបស់លោក ដោយលោក ស៊ី បានបញ្ជាក់ពីការទទួលបានអត្ថប្រយោជន៍ទៅវិញទៅមកពីគម្រោងដែលមានទឹកប្រាក់ ១ ពាន់ពាន់លានដុល្លារនេះ៕ AFP/KC