ក្រុងប៉េកាំងៈ ក្រុមអ្នកចរចាជាន់ខ្ពស់របស់សហរដ្ឋអាមេរិក និងប្រទេស ចិន បានជជែកគ្នាតាមទូរស័ព្ទកាលពីថ្ងៃអង្គារ និងបានព្រមព្រៀងគ្នារក្សាការទាក់ទងជុំវិញ «បញ្ហាដែលនៅសេសសល់» សម្រាប់កិច្ចព្រមព្រៀងពាណិជ្ជកម្ម «ដំណាក់កាលទី ១» ដែលសម្រេចបានដោយប្រទេសទាំង ២។ នេះបើយោងតាមប្រព័ន្ធផ្សព្វផ្សាយរដ្ឋរបស់ប្រទេស ចិន។
លោកប្រធានាធិបតីអាមេរិក ដូណាល់ ត្រាំ បានប្រកាសកាលពីខែមុនថា ភាគីទាំង ២ បានឈានដល់កិច្ចព្រមព្រៀងបឋមមួយ ប៉ុន្តែកិច្ចព្រមព្រៀងនេះមិនទាន់ត្រូវបានបញ្ចប់នៅឡើយទេ។
លោកឧបនាយករដ្ឋមន្ត្រីចិន Liu He បាននិយាយតាមទូរស័ព្ទកាលពីព្រឹកថ្ងៃអង្គារជាមួយលោក Robert Lighthizer អ្នកតំណាងពាណិជ្ជកម្មអាមេរិក និងលោក Steven Mnuchin រដ្ឋមន្ត្រីក្រសួងហិរញ្ញវត្ថុអាមេរិក។ នេះបើយោងតាមសេចក្តីរាយការណ៍របស់ទីភ្នាក់ងារព័ត៌មានរដ្ឋចិន ស៊ិនហួរ។
ទីភ្នាក់ងារព័ត៌មានរដ្ឋចិន ស៊ិនហួរ បានរាយការណ៍ដោយមិនផ្តល់ព័ត៌មានលម្អិតថា៖ «ភាគីទាំង ២ បានពិភាក្សាគ្នាអំពីការដោះស្រាយបញ្ហាទាក់ទងនឹងក្តីបារម្ភស្នូលរបស់ភាគីនីមួយៗដែលបានឈានដល់ការព្រមព្រៀងលើការដោះស្រាយសមស្របនូវបញ្ហាដែលពាក់ព័ន្ធនានា និងបានព្រមព្រៀងរក្សាការទាក់ទងសម្រាប់បញ្ហាដែលនៅសេសសល់ក្នុងការប្រឹក្សាយោបល់ស្តីពីកិច្ចព្រមព្រៀង «ដំណាក់កាលទី ១»។
ភាគហ៊ុនពិភពលោកបានឡើងថ្លៃនៅសប្តាហ៍នេះ ដោយសារភាពសុទិដ្ឋិនិយមថា ប្រទេសមានសេដ្ឋកិច្ចធំទាំង ២ នេះនឹងប្រកាសកិច្ចព្រមព្រៀងដោយផ្នែកមួយឆាប់ៗនេះ។
រដ្ឋាភិបាលចិនកាលពីថ្ងៃអាទិត្យបានចេញផ្សាយសារាចរណ៍ណែនាំមួយ ដើម្បីពង្រឹងការការពារកម្មសិទ្ធិបញ្ញា និងបង្កើនការពិន័យដល់ជនល្មើស ពោលគឺជាបញ្ហាដែលជាប់គាំងដ៏ធំមួយនៅក្នុងការចរចារវាងអាមេរិក និងចិន៕ KC