.jpg)
ក្មេងប្រុសកំពុងជួយឪពុកម្តាយក្នុងការដាក់ចំណីឲ្យជ្រូកដែលចិញ្ចឹមជាលក្ខណៈគ្រួសារនៅខេត្តពោធិ៍សាត់ នាពេលកន្លងមក។ រូបថត ហេង ជីវ័ន
ភ្នំពេញៈ កសិករចិញ្ចឹមជ្រូកក្នុងស្រុកនៅតែស្ទាក់ស្ទើរ ក្នុងការចាប់ផ្ដើមអាជីវកម្មទោះបីជាលក្ខណៈគ្រួសារ ខណៈតម្លៃជ្រូករក្សាស្ថិរភាពរយៈពេលជាងកន្លះឆ្នាំ ស្របពេលដែលអ្នកនៅក្នុងឧស្សាហកម្មនេះបានបង្ហាញពីការយល់ឃើញផ្សេងគ្នាពីឧស្សាហកម្ម ដែលកង្វះបទប្បញ្ញត្តិនេះ។
បច្ចុប្បន្នតម្លៃជ្រូករស់គឺនៅក្នុងចន្លោះពី ៩ ០០០ រៀល ទៅ ៩ ២០០ រៀលក្នុង ១ គីឡូក្រាម ដែលតម្លៃនេះមានចាប់តាំងពីពាក់កណ្ដាលឆ្នាំមុន។ នេះបើតាមតម្លៃដកស្រង់ពីសមាគមអ្នកចិញ្ចឹមសត្វកម្ពុជា។
ភ្នំពេញប៉ុស្ដិ៍កាលពីមុនរាយការណ៍ថា តម្លៃជ្រូកបានធ្លាក់ចុះពី ៨ ០០០ រៀលមកនៅត្រឹម ៤ ០០០ រៀល ក្នុង ១ គីឡូក្រាមកាលពីឆ្នាំ ២០១៥ ដោយសារតែលំហូរចូលយ៉ាងគំហុកពីប្រទេសជិតខាង និងបន្តរហូតដល់ពាក់កណ្ដាលឆ្នាំ ២០១៨ មុនពេលកើនឡើងដល់ពី ៩ ០០០ រៀលដល់ ៩ ២០០ រៀលនៅពេលបច្ចុប្បន្ន។
លោក ជេត ភិរម្យ ប្រធានសមាគមអ្នកចិញ្ចឹមសត្វកម្ពុជា បានឲ្យដឹងកាលពីម្សិលមិញថា កសិករអាចនឹងចាប់ផ្ដើមជាថ្មីម្ដងទៀត ដោយសារតែតម្លៃកំពុងបង្ហាញពីស្ថិរភាព។
លោកថ្លែងថា៖ «វាប្រែក្លាយជាក្តីសង្ឃឹមសម្រាប់កសិករចិញ្ចឹមជ្រូករបស់យើងជាថ្មី នៅពេលនេះពួកគេកំពុងចាប់ផ្ដើមការចិញ្ចឹមជ្រូកម្ដងទៀត ចាប់តាំងពីពួកគេបានមើលឃើញតម្លៃរក្សាបានលំនឹងមក»។
ចិន ដែលជាប្រទេសប្រើប្រាស់ជ្រូកច្រើនបំផុតនៅក្នុងតំបន់ បានបញ្ឈប់ការនាំចូលសត្វជ្រូករស់ពីវៀតណាមកាលពីឆ្នាំ ២០១៥ ដោយបារម្ភអំពីសុវត្ថិភាព និងគុណភាព។
លោក ជេត ភិរម្យ បានឲ្យដឹងថា ហេតុផលនេះបណ្ដាលឲ្យមានសត្វតម្លៃទាប នៅក្នុងវៀតណាមហូរចូលមកក្នុងប្រទេស កម្ពុជា ដែលបានធ្វើឲ្យតម្លៃធ្លាក់ចុះរហូតដល់ ៤ ០០០ រៀលក្នុង ១ គីឡូក្រាមនៅពេលនោះ។
ប៉ុន្តែចក្ខុវិស័យរបស់កសិករក្នុងស្រុកបន្តមិនច្បាស់លាស់ ទោះបីជាតម្លៃបានកើនឡើង និងមានស្ថិរភាពក៏ដោយ។
លោក សឿន វីរៈ ជាអ្នកចិញ្ចឹមជ្រូក ១ រូបនៅខេត្តតាកែវ នៅតែស្ទាក់ស្ទើរក្នុងការចាប់ផ្ដើមការចិញ្ចឹមជ្រូកជាថ្មី។
លោកបានថ្លែងថា៖ «ខ្ញុំដឹងថា តម្លៃជ្រូកបានកើនឡើង នៅពេលនេះ ប៉ុន្តែខ្ញុំមិនចង់ចាប់ផ្ដើមជាថ្មីទៀតទេ ខ្ញុំគិតថាវានឹងមិនមានរយៈពេលវែងទេ»។ លោកបន្ថែមថា លោកកំពុងពិចារណាចិញ្ចឹមមាន់វិញ។
ខណៈមិនមានបទប្បញ្ញត្តិច្បាស់លាស់សម្រាប់ឧស្សាហកម្មនេះលោក លី ឡាវីល អ្នកគ្រប់គ្រងទូទៅនៅក្រុមហ៊ុន M’s Pig ACMC Cambodia co.,Ltd បានឲ្យដឹងថា ឧស្សាហកម្មនេះនៅតែកំពុងទទួលការគំរាមកំហែងពីការនាំចូល។
លោកថ្លែងថា៖ «ទោះបីជាតម្លៃមានស្ថិរភាពច្រើនក៏ដោយ ក៏វាមិនមានន័យថា វានឹងមានសុវត្ថិភាពនៅក្នុងទីផ្សារនេះទេ ដូច្នេះវានៅតែមានហានិភ័យសម្រាប់កសិករ»។
លោកបន្តថា៖ «វាជាទីផ្សារសេរី ដូច្នេះអ្នកចិញ្ចឹមមានដើមទុនបន្តិចបន្តួច អាចទទួលរងផលប៉ះពាល់រាល់ ពេលណាមានការហូរចូលច្រើនពីប្រទេសជិតខាង»។
លោក ធឿន ធន ជាកសិករចិញ្ចឹមជ្រូកផ្សេងទៀត នៅខេត្តកណ្ដាល ដែលទើបចាប់ផ្ដើមការចិញ្ចឹមជ្រូក ៣០ ក្បាល ជឿជាក់ថា ទីផ្សារនេះនឹងកាន់តែមានសុវត្ថិភាពនៅរយៈពេល ២-៣ ឆ្នាំក្រោយ។
លោកថ្លែងថា៖ «ដូចដែលខ្ញុំបានអង្កេតតម្លៃជ្រូក ទីផ្សារកំពុងកើនឡើង វាមិនគ្រាន់តែកើនឡើងនៅកម្ពុជា ប៉ុណ្ណោះទេ ប៉ុន្តែថែមទាំងបណ្ដាប្រទេសផ្សេងទៀត ជាពិសេសប្រទេសជិតខាង»។
លោកបន្តថា៖ «ខ្ញុំមិនចង់បោះបង់ចោលនោះទេ ដោយសារខ្ញុំនៅតែមានកសិដ្ឋានចិញ្ចឹមជ្រូក និងជំនាញបច្ចេកទេសខាងការចិញ្ចឹមជ្រូកខ្ញុំសង្ឃឹមថា ខ្ញុំនៅតែអាចរកប្រាក់ចំណេញបានទោះតិច ឬច្រើន»៕LA
