ភ្នំពេញៈ អ្នកពាក់ព័ន្ធនៅក្នុងវិស័យកសិកម្ម បានឲ្យដឹងថា ការស្នើឲ្យភាគីវៀតណាមជួយទិញស្រូវកសិករខ្មែរក្នុងតម្លៃសមរម្យមួយពីសំណាក់រដ្ឋមន្ត្រីក្រសួងកសិកម្មកម្ពុជា គឺជាយុទ្ធសាស្ត្ររយៈពេលខ្លី ហើយថា កម្ពុជាត្រូវរៀបចំការគ្រប់គ្រងវិស័យនេះដោយខ្លួនឯងឲ្យបានល្អ។
ក្នុងឱកាសជួបពិភាក្សាជាមួយនឹងលោក Vu Quang Minh ឯកអគ្គរដ្ឋទូតវៀតណាម ប្រចាំកម្ពុជា កាលពីសប្តាហ៍មុន លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានស្នើឲ្យវៀតណាមជួយប្រមូលទិញស្រូវអង្ករ ពីកម្ពុជាឲ្យបានសមស្របទៅនឹងតម្លៃលើទីផ្សារនៅប្រទេស វៀតណាម។
តាមរយៈលទ្ធផលនៃការពិភាក្សានោះ ភាគីវៀតណាមនឹងរៀបចំកិច្ចប្រជុំបន្ទាន់មួយជាមួយនឹងពាណិជ្ជករវៀតណាម បន្ទាប់មកនឹងធ្វើរបាយការណ៍លម្អិតជូនទៅនាយករដ្ឋមន្ត្រីវៀតណាមដើម្បីជំរុញឲ្យពាណិជ្ជករវៀតណាមជួយប្រមូលទិញស្រូវពីកម្ពុជាក្នុងតម្លៃសមរម្យ។
ធនាគារ AGRI BANK នឹងពិនិត្យលទ្ធភាព និងធ្វើការសម្រួលបែបបទផ្សេងៗដើម្បីផ្តល់កម្ចីឥណទានដល់ពាណិជ្ជករវៀតណាមសម្រាប់ជាទុនប្រមូលទិញស្រូវក្នុងរដូវប្រមូលផលនេះព្រមទាំងគាំទ្រដល់ការផ្តល់ឥណទានដល់ពាណិជ្ជករកម្ពុជា ដែលខ្វះទុនក្នុងការប្រមូលទិញកសិផលផង។
ភាគីទាំង ២ នឹងបន្តពង្រឹង និងពង្រីកការអនុវត្តផលិតកម្មកសិកម្មតាមកិច្ចសន្យាឲ្យបានទូលំទូលាយ និងមានប្រសិទ្ធភាពដើម្បីរក្សានិរន្តរភាពនៃភាពជាដៃគូរវាងអ្នកផលិត និងអ្នកទិញ។
លោក ហ៊ុន ឡាក់ អនុប្រធានសហព័ន្ធស្រូវអង្ករកម្ពុជា កាលពីថ្ងៃម្សិលមិញ បាននិយាយថា ការស្នើឲ្យវៀតណាមជួយទិញស្រូវគឺជាការល្អ ខណៈសមត្ថភាពនៃការប្រមូលទិញពីឈ្មួញក្នុងស្រុក ឡសម្ងួត និងឃ្លាំងស្តុកមានកម្រិត ដែលធ្វើឲ្យកសិករជួបបញ្ហាប្រឈមជាច្រើន។
ទោះជាយ៉ាងនេះក្តី លោកបន្តថា ខណៈការជួយប្រមូលទិញក្នុងតម្លៃសមរម្យពីសំណាក់វៀតណាម នឹងរួមចំណែកជួយដោះស្រាយផលប៉ះពាល់សម្រាប់ប្រជាកសិករខ្មែរ បានមួយកម្រិតក៏ដោយ តែវាគ្រាន់តែជាការដោះស្រាយមួយគ្រាប៉ុណ្ណោះ។
លោកបញ្ជាក់ថា៖ «សម្រាប់ខ្ញុំរយៈពេលខ្លីគឺល្អ ព្រោះវាអាចជួយដោះស្រាយឧបសគ្គបានមួយរយៈ ប៉ុន្តែសម្រាប់យុទ្ធសាស្រ្តរយៈពេលវែងមិនសូវល្អទេ ហើយកម្ពុជាគួរតែមានផែនការជាក់លាក់របស់ខ្លួន តាមរយៈការរៀបចំឲ្យមានយន្តការរក្សាទុកស្តុកស្រូវក្នុងស្រុកឲ្យបានច្រើន ដើម្បីធានាការផ្គត់ផ្គង់សម្រាប់ការកែច្នៃអង្ករសម្រេចនាំចេញ បន្ទាប់ពីរដូវប្រមូលផល»។
បើតាមលោក ហ៊ុន ឡាក់ កាលពីឆ្នាំ ២០១៧ និង ២០១៨ វិស័យឯកជនបានវិនិយោគលើឡសម្ងួត និងឃ្លាំងស្តុកស្រូវធំៗចំនួន ៣ កន្លែងក្នុងខេត្តបាត់ដំបង កំពង់ធំ និងព្រៃវែង។
លោកបញ្ជាក់ថា៖ «សរុបសេចក្តីមក ឡសម្ងួត និងឃ្លាំងស្តុកនៅកម្ពុជា នៅមិនទាន់អាចឆ្លើយតបបានចំពោះបរិមាណនៃការផលិតស្រូវនៅកម្ពុជាទេ ហើយវានៅតែហូរចេញទៅប្រទេសជិតខាងខ្លះ ដើម្បីជួយឲ្យកសិករនៅពេលរដូវច្រូតកាត់ចូលមកដល់ គាត់អាចលក់ចេញទាន់ពេលវេលា»។
សម្រាប់តម្លៃស្រូវនាពេលនេះលោក អះអាងថា បានធ្លាក់ចុះស្ទើរនៅគ្រប់ប្រទេសទាំងអស់ បើធៀបនឹងរយៈពេលដូចគ្នាកាលពីឆ្នាំមុន។ បច្ចុប្បន្ននេះស្រូវជាមធ្យមមានតម្លៃប្រមាណជាង ៧០០ រៀល ក្នុង ១ គីឡូក្រាម។
លោក ច័ន្ទ សុផល នាយកមជ្ឈមណ្ឌលសិក្សាគោលនយោបាយ បានប្រាប់ថា វៀតណាមជាប្រទេសជាប់ចំណាត់ថ្នាក់លេខ ២ ក្នុងការនាំចេញអង្ករទៅទីផ្សារពិភពលោក បន្ទាប់ពីប្រទេស ថៃ ហើយឈ្មួញវៀតណាមតែងមកប្រមូលទិញស្រូវពីកម្ពុជា ដើម្បីកិនជាអង្ករសម្រាប់ប្រើប្រាស់ក្នុងស្រុក និងនាំចេញបន្តទៅបរទេស។
លោកបន្តថា ដោយសារវៀតណាម ជាប្រទេសធំ មានដៃគូពាណិជ្ជកម្មច្រើន មានទីផ្សារធំ និងមានប្រសិទ្ធភាពខ្ពស់ជាងកម្ពុជាក្នុងការកែច្នៃ (ថ្លៃដើមផលិតទាប) ជាហេតុធ្វើឲ្យផលិតផលកម្ពុជាជាច្រើនត្រូវបានឈ្មួញប្រមូលទិញយកទៅកែច្នៃ និងវេចខ្ចប់នៅប្រទេស វៀតណាម មុនពេលយកចេញទៅលក់នៅទីផ្សារអន្តរជាតិ។
លោកថ្លែងថា៖ «បើវៀតណាមជួយប្រមូលទិញស្រូវជាការល្អ តែកម្ពុជាក៏ត្រូវពង្រឹងខ្លួនឯងផងដែរ តាមរយៈការខិតខំកែច្នៃ និងការជួយសម្រួលក្នុងការកាត់បន្ថយថ្លៃដើមផ្សេងៗ»។
ភ្នំពេញ ប៉ុស្តិ៍ មិនអាចទាក់ទងទៅលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ដើម្បីពន្យល់បន្ថែមពីបញ្ហានេះបានទេ។
ទោះជាបីយ៉ាងនេះក្តី លោកបានលើកឡើងក្នុងទំព័រហ្វេសប៊ុកក្រសួងកសិកម្មកាលពីថ្ងៃសៅរ៍ថា តម្លៃស្រូវនឹងល្អប្រសើរឡើងវិញក្រោយពេលចូលឆ្នាំចិន វៀតណាមរួច។ លោកបានចាត់ទុកថា តម្លៃស្រូវធ្លាក់ចុះនាពេលនេះ ដោយសារឈ្មួញវៀតណាមមិនបានចុះប្រមូលទិញស្របពេល ដែលកម្ពុជាខ្វះឃ្លាំងស្តុក ឡសម្ងួត។
លោកថ្លែងថា៖ «ទោះយ៉ាងណាការធ្លាក់ចុះតម្លៃស្រូវនាពេលនេះមិនទាន់ដល់កម្រិតមួយថា ខាតបង់កម្រៃនៅឡើយទេ គ្រាន់តែថាចំណូលបានតិចជាងបើប្រៀបធៀបទៅឆ្នាំ ២០១៨»។
ទិន្នន័យរដ្ឋាភិបាលកម្ពុជាបង្ហាញថា ក្នុងឆ្នាំ ២០១៨ កម្ពុជាបាននាំចេញអង្ករសរុប ៦២៦ ២២៥ តោន ធ្លាក់ចុះ ១,៥ ភាគរយបើធៀបនឹងឆ្នាំ ២០១៧។ ទីផ្សារសហភាពអឺរ៉ុប មានបរិមាណច្រើនជាងគេគឺចំនួន ២៦៩ ១២៧ តោន និងប្រទេស ចិន មានចំនួន ១៧០ ១៥៤ តោន។ សហភាពអឺរ៉ុប បានសម្រេចយកពន្ធនាំចូលអង្ករពីកម្ពុជា និងមីយ៉ាន់ម៉ា ទៅតាមបណ្តឹងរបស់ប្រទេស អ៊ីតាលី និងអេស្ប៉ាញ ដែលធ្វើឲ្យវិស័យនាំចេញអង្កររបស់កម្ពុជា កាន់តែប្រឈមមុខនឹងការប្រកួតប្រជែង។
ទោះយ៉ាងនេះក្តី ក្នុងដំណើរទស្សនកិច្ចទៅកាន់ប្រទេស ចិន លោកនាយករដ្ឋមន្ត្រី ហ៊ុន សែន បានឲ្យដឹងថា ចិនបានយល់ព្រមបង្កើនកូតានាំចូលអង្ករពីកម្ពុជា ១០ ម៉ឺនតោនបន្ថែមទៀត ដែលធ្វើឲ្យកម្ពុជាអាចនាំចេញអង្ករទៅទីផ្សារចិនក្នុងកូតាបានរហូតដល់ ៤០ ម៉ឺនតោន ស្មើនឹងជាង ៦០ ភាគរយនៃការនាំចេញសរុបរបស់កម្ពុជា កាលពីឆ្នាំ ២០១៨៕ LA