.jpg)
អ្នកនាំភ្ញៀវកំពុងប្រាប់ពីប្រវត្តិចម្លាក់លើជញ្ជាំងប្រាសាទអង្គរវត្តដល់ភ្ញៀវទេសចរ។ ហុង មិនា
ភ្នំពេញៈ គម្រោងដាក់ឲ្យប្រើប្រាស់កម្មវិធីមគ្គុទ្ទេសក៍ទេសចរណ៍ជាសំឡេងរបស់ក្រុមហ៊ុន Angkor Audio នៅតំបន់ទេសចរណ៍ប្រវត្តិសាស្ត្ររបស់ប្រទេសកម្ពុជាកំពុងប្រឈមនឹងការតវ៉ាពីសំណាក់មគ្គុទ្ទេសក៍ទេសចរណ៍ក្នុងស្រុក ដោយពួកគេអះអាងថាកម្មវិធីនេះនឹងធ្វើឲ្យប៉ះពាល់ការងាររបស់ពួកគេ។
ក្រុមហ៊ុន Angkor Audio គឺជាក្រុមហ៊ុនបង្កើតឡើងក្នុងស្រុកដែលបានអភិវឌ្ឍកម្មវិធីមគ្គុទ្ទេសក៍ទេសចរណ៍ជាសំឡេងដែលមាន ១៤ ភាសាសម្រាប់ទេសចរបរទេសដោយមិនបាច់ជួលមគ្គុទ្ទេសក៍ទេសចរណ៍ក្នុងការនាំផ្លូវនោះឡើយ។
កម្មវិធីនេះគ្រោងនឹងដាក់ឲ្យដំណើរការផ្លូវការនៅឆ្នាំ ២០១៩ ដែលនឹងផ្តល់តម្លៃ ២,៩៩ ដុល្លារប៉ុណ្ណោះ សម្រាប់រយៈពេល ១ ខែដំបូង។ បច្ចុប្បន្នក្រុមហ៊ុននេះបានដាក់ឲ្យដំណើរការសាកល្បងកម្មវិធីនេះរួចហើយដោយមានអ្នកប្រើប្រាស់ជាង ៣ ម៉ឺននាក់។
លោក ហែម សោភ័ន្ត មគ្គុទេ្ទសក៍ទេសចរណ៍ជាតិដែលទទួលបានអាជ្ញាប័ណ្ណនាំភ្ញៀវទេសចរកម្រិតជាតិតាំងពីឆ្នាំ ២០០៨ បានប្រាប់ភ្នំពេញ ប៉ុស្តិ៍ថាការប្រើប្រាស់ឧបករណ៍មគ្គុទេ្ទសក៍សំឡេងសម្រាប់ពន្យល់ណែនាំដល់ភ្ញៀវទេសចរបរទេសជំនួសមគ្គុទ្ទេសក៍ទេសចរណ៍កំពុងធ្វើឲ្យប៉ះពាល់ការងារអ្នកធ្វើការក្នុងវិស័យនេះ។
លោកបន្តថា៖ «ក្រសួងទេសចរណ៍គួរតែពិចារណាក្នុងការប្រើប្រាស់មគ្គុទ្ទេសក៍ឲ្យបានច្រើន ខណៈជារៀងរាល់ឆ្នាំក្រសួងតែងតែបើកវគ្គបណ្តុះបណ្តាលដល់មគ្គុទ្ទេសក៍ជាបន្តបន្ទាប់។ តើមគ្គុទ្ទេសក៍ទាំងនោះមានអ្វីធ្វើ?»។
តាមលោក ហែម សោភ័ន្ត បច្ចុប្បន្នកម្ពុជាមានមគ្គុទ្ទេសក៍ទេសចរណ៍ប្រមាណជិត ១០ ០០០ នាក់កំពុងប្រកបការងារក្នុងវិស័យនេះ។ លោកបន្តថា បើឧបករណ៍នេះដាក់ឲ្យដំណើរទូលំទូលាយ វាអាចធ្វើឲ្យខូចប្រយោជន៍ដល់ក្រុមមគ្គុទ្ទេសក៍។
លោក កែស ថេង មគ្គុទេ្ទសក៍ភាសាអេស្ប៉ាញនៅខេត្តសៀមរាបបានឲ្យដឹងថា លោកប្រឆាំងចំពោះការដាក់ឲ្យប្រើប្រាស់កម្មវិធីនេះដែលធ្វើឲ្យពួកលោកប្រឈមនឹងការបាត់បង់ការងារ។
លោកថ្លែងថា៖ «ក្នុងនាមជាមគ្គុទេ្ទសក៍ទេសចរណ៍ ១ រូប ខ្ញុំសូមធ្វើការជំទាស់យ៉ាងដាច់អហង្ការចំពោះក្រុមហ៊ុន ១ ដែលគ្រោងដំណើរការ App មគ្គុទេ្ទសក៍សំឡេងនៅក្នុងតំបន់ប្រវត្តិសាស្ត្រនៅកម្ពុជា»។
លោកបានបន្តថានេះមិនមែនជាវិធីក្នុងការកាត់បន្ថយភាពក្រីក្ររបស់ប្រជាពលរដ្ឋទេ៖ «ប៉ុន្តែវាជាវិធីសាស្ត្រជាន់កប្រជាពលរដ្ឋបន្ថែម។ តើលោកអ្នកចង់ឃើញប្រជាពលរដ្ឋដែលប្រកបមុខរបរជាមគ្គុទេ្ទសក៍ទេសចរណ៍ទាំងតំបន់ប្រវត្តិសាស្ត្រក្នុងសារមន្ទីររាប់ពាន់នាក់អត់ការងារធ្វើមែនទេ?»។
មិនអាចទាក់ទងរដ្ឋមន្ត្រីក្រសួងទេសចរណ៍ដើម្បីចង់ដឹងពីវិធានការលើបញ្ហានេះបានទេកាលពីថ្ងៃម្សិលមិញ ខណៈអ្នកនាំពាក្យក្រសួងនេះមិនលើកទូរស័ព្ទ។
ជាមួយនឹងការស្វាគមន៍លើការបង្កើតឧបករណ៍នេះដើម្បីជួយជំរុញដល់កំណើននៃវិស័យទេសចរណ៍នៅកម្ពុជាលោក ហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជាលើកឡើងថា ឧបករណ៍នេះក៏អាចធ្វើឲ្យមគ្គុទ្ទេសក៍ទេសចរណ៍មួយចំនួនអាចបាត់បង់អាជីព។
លោកថ្លែងថា៖ «ខ្ញុំជឿថាក្រសួងនឹងធ្វើការត្រិះរិះពិចារណាដើម្បីធ្វើយ៉ាងណាសម្របសម្រួលការងារនេះជាមួយក្រុមមគ្គុទ្ទេសក៍ទេសចរណ៍។ វានឹងមិនមានបញ្ហាអ្វីនោះទេ»។
បើតាមលោក វណ្ឌី ការប្រើប្រាស់ឧបករណ៍នេះមានច្រើនមកហើយនៅតាមតំបន់ប្រវត្តិសាស្ត្រក្នុងរាជធានីភ្នំពេញ ខណៈនៅតាមតំបន់ប្រវត្តិសាស្ត្រក្នុងខេត្តសៀមរាបទើបមានតិចតួចប៉ុណ្ណោះ។
ទិន្នន័យពីក្រសួងទេសចរណ៍បង្ហាញថាក្នុងរយៈពេល ៥ ខែដំបូងឆ្នាំ ២០១៨ កម្ពុជាទទួលបានភ្ញៀវទេសចរបរទេស ២,៦ លាននាក់កើនឡើង ១៣,៥ ភាគរយធៀបនឹងរយៈពេលដូចគ្នាកាលពីឆ្នាំ ២០១៧។ តាមការព្យាករនៅឆ្នាំ ២០១៨ នេះកម្ពុជានឹងទទួលបានភ្ញៀវទេសចរ ៦,២ លាននាក់ និង ៧ លាននាក់ក្នុងឆ្នាំ ២០២០៕LA
