ភ្នំពេញៈ អស់រយៈពេលប្រមាណ ២ ខែមកហើយ បន្ទាប់ពីរដ្ឋាភិបាលបានដាក់ចេញនូវ «គម្រោងសហហិរញ្ញប្បទានទ្រទ្រង់សហគ្រាសធុនតូច និងមធ្យម» ដើម្បីផ្តល់កម្ចីក្នុងអត្រាការប្រាក់អនុគ្រោះដល់សហគ្រាសធុនតូច និងមធ្យម ក្នុងការរក្សាដំណើការអាជីវកម្ម និងខ្សែចង្វាក់ផលិតកម្មរបស់ពួកគេ បណ្តាធនាគារ និងគ្រឹះស្ថានមីក្រូហិរញ្ញវត្ថុដៃគូបានឲ្យដឹងថា គម្រោងនេះកំពុងទទួលបានការចាប់អារម្មណ៍កាន់តែច្រើនពីម្ចាស់សហគ្រាសនៅក្នុងការដាក់ពាក្យស្នើសុំឥណទាន។
គម្រោងសហហិរញ្ញប្បទានទ្រទ្រង់សហគ្រាសធុនតូច និងមធ្យមបានបង្កើតឡើងដោយក្រសួងសេដ្ឋកិច្ច និងហិរញ្ញវត្ថុកាលពីដើមខែមេសាក្នុងគោលបំណងផ្តល់ឥណទានមានការប្រាក់ទាបដើម្បីជំរុញការអភិវឌ្ឍសហគ្រាសធុនតូច និងមធ្យមក្នុងវិស័យអាទិភាពរួមមានផ្នែកកម្មន្តសាល និងសិប្បកម្ម។
មូលនិធិក្រោមគម្រោងសហហិរញ្ញប្បទាននេះមានទំហំទឹកប្រាក់ ១០០ លានដុល្លារ ដែលជាការផ្តល់សហហិរញ្ញប្បទានបដិភាគស្មើគ្នារវាងធនាគារសហគ្រាសធុនតូច និងមធ្យមកម្ពុជា (SME Bank) ជាមួយនឹងគ្រឹះស្ថានធនាគារ និងមីក្រូហិរញ្ញវត្ថុចំនួន ៣៣ ក្នុងនោះរួមមាន ធនាគារពាណិជ្ជចំនួន ២៣ ធនាគារឯកទេស ៣ គ្រឹះស្ថានមីក្រូហិរញ្ញវត្ថុទទួលប្រាក់បញ្ញើ ៥ និងគ្រឹះស្ថានមីក្រូហិរញ្ញវត្ថុ ២។
លោកស្រី តាន់ លីនណា អគ្គនាយិការងធនាគារសហគ្រាសធុនតូច និងមធ្យមកម្ពុជាបានប្រាប់ភ្នំពេញប៉ុស្តិ៍កាលពីថ្ងៃអង្គារថា គម្រោងសហហិរញ្ញប្បទានទ្រទ្រង់សហគ្រាសធុនតូច និងមធ្យមត្រូវបានបង្កើតឡើងនៅចំពេលដែលប្រទេសកម្ពុជាកំពុងមានការរីករាលដាលជំងឺកូវីដ ១៩។
លោកស្រីបន្តថា បច្ចុប្បន្ន SME Bank បានរឹតបន្តឹង និងរក្សាទំនាក់ទំនងពាណិជ្ជកម្មជាមួយនឹងស្ថាប័នហិរញ្ញវត្ថុចូលរួម និងបានធ្វើការជាមួយសមាគមជាច្រើនដូចជា CWEA,FASMEC, YEAC, WTM ដើម្បីធ្វើការផ្សព្វផ្សាយពីគម្រោងសហហិរញ្ញប្បទាននេះ។
លោកស្រីបន្ថែមថា៖ «តាមរយៈការអនុវត្តកន្លងមក SME Bank ទទួលបានព័ត៌មានថា មានសហគ្រាសធុនតូច និងមធ្យមជាច្រើនដែលកំពុងមានតម្រូវការផ្នែកហិរញ្ញវត្ថុសម្រាប់ទ្រទ្រង់ដល់និរន្តរភាពអាជីវកម្មរបស់ពួកគេ ជាជាងការពង្រីក ឬបង្កើតអាជីវកម្មថ្មី»។
យោងតាមលោកស្រី លីនណា គិតត្រឹមថ្ងៃទី ២៣ ខែមិថុនានេះ SME Bank ទទួលបានសំណើសុំឥណទានចំនួន ១៩ ពីស្ថាប័នហិរញ្ញវត្ថុដែលចូលរួមចំនួន ១០ និងបានអនុម័តឥណទានជាទឹកប្រាក់សរុបបានចំនួន ៣,១ លានដុល្លារ។
លោកស្រីបានប្រាប់ទៀតថា តាមរយៈស្ថាប័នហិរញ្ញវត្ថុដែលជាដៃគូ SME Bank ក៏ទទួលបានព័ត៌មានពីការត្អូញត្អែររបស់អតិថិជនខ្លះៗដែរទាក់ទងនឹងលក្ខខណ្ឌនៃកម្ចីឥណទាន ប៉ុន្តែទោះយ៉ាងណាបញ្ហាទាំងអស់នោះត្រូវបានដោះស្រាយរួចហើយតាមរយៈការអនុញ្ញាតរបស់ក្រសួងសេដ្ឋកិច្ច និងហិរញ្ញវត្ថុ។
លោក សឹង ភន នាយកប្រតិបត្តិឥណទាននៃធនាគារអេស៊ីលីដាដែលជាធនាគារដៃគូធ្វើការក្នុងគម្រោងនេះបានប្រាប់ភ្នំពេញប៉ុស្តិ៍ថា គម្រោងសហហិរញ្ញប្បទាននេះ កំពុងទទួលបាននូវការចាប់អារម្មណ៍ជាច្រើនពីម្ចាស់សហគ្រាសធុនតូច និងមធ្យមដោយមកដល់ពេលនេះធនាគារអេស៊ីលីដា ទទួលបានពាក្យស្នើសុំឥណទានតាមរយៈគម្រោងនេះចំនួន ១១ រួចមកហើយ។ លោកបន្តថា មានអតិថិជនជាច្រើនបានមកទំនាក់ទំនង ដើម្បីទទួលបានឥណទានពីគម្រោងនេះ។
លោកថ្លែងថា៖ «គម្រោងសហហិរញ្ញប្បទានទ្រទ្រង់សហគ្រាសធុនតូច និងមធ្យមកំពុងផ្តល់នូវផលវិជ្ជមានច្រើនសម្រាប់អតិថិជន ព្រោះមិនត្រឹមតែទទួលបានអត្រាការប្រាក់ទាបប៉ុណ្ណោះទេ ប៉ុន្តែថែមទាំងមិនមានការចំណាយសោហ៊ុយឥណទានឡើយ»។
បើតាមលោក ភន សំណើ ទាំង ១១ ដែលបានដាក់ពាក្យមកធនាគារអេស៊ីលីដា រួមមាននៅក្នុងវិស័យមួយចំនួនដូចជា កសិកម្ម ទេសចរណ៍ សិប្បកម្មម្ហូបអាហារ និង ផលិតសំឡីកែវ ជាដើម។ ឥណទានដែលដាក់ស្នើនោះមានខ្លះគ្រោងខ្ចីប្រាក់រហូតដល់ ៣០ ម៉ឺនដុល្លារ។
លោកបន្ថែមថា៖ «បច្ចុប្បន្នគម្រោងចំនួន ២ ក្នុងចំណោម ១១ កំពុងស្ថិតក្នុងដំណាក់កាលវាយតម្លៃផ្តល់ឥណទាន»។
លោក សាយ សូនី នាយកប្រតិបត្តិនៃគ្រឹះស្ថានមីក្រូហិរញ្ញវត្ថុប្រាសាក់បាននិយាយថា នៅពេលនេះមានអតិថិជនមួយចំនួនបានមកដាក់ពាក្យសុំកម្ចីសហគ្រាសធុនតូច និងមធ្យម។ ផែនការសហហិរញ្ញវត្ថុសម្រាប់សហគ្រាសធុនតូច និងមធ្យមដែលផ្តួចផ្ដើមដោយរដ្ឋាភិបាលកម្ពុជាគឺមានបំណងផ្ដល់កម្ចីអត្រាការប្រាក់ទាប ដើម្បីបង្កើន និងអភិវឌ្ឍសហគ្រាសធុនតូច និងមធ្យមនៅក្នុងប្រទេសកម្ពុជា។
លោកបន្ថែមថា ប្រាសាក់តែងផ្ដោតការយកចិត្តទុកដាក់លើការគាំទ្រ SME ជាមួយនឹងទុនវិនិយោគរហូតដល់ ១,២៦ ពាន់លានរៀល (ឬ ៣០០ ០០០ ដុល្លារ) ឬជាមួយនឹងទុនបង្វិលរហូតដល់ ៨៤០ លានរៀល (ឬ ២០០ ០០០ ដុល្លារ) សម្រាប់អាជីវកម្មរបស់ពួកគេជាមួយនឹងអត្រាការប្រាក់ជាពិសេស ០,៥៨ ភាគរយក្នុង ១ ខែតែប៉ុណ្ណោះ និងរយៈពេលកម្ចីរហូតដល់ ៧ ឆ្នាំ ដូច្នេះប្រសិនបើ SME ដែលចង់ស្វែងរកការវិនិយោគ និងទុនបង្វិលសូមទាក់ទងមកការិយាល័យណាមួយនៅទូទាំងប្រទេស។
លោកថ្លែងថា៖ «ដោយសារការរីករាលដាលជំងឺកូវីដ ១៩ ប្រាសាក់ នៅតែផ្ដល់កម្ចីដល់អតិថិជនជាធម្មតា និងផ្ដល់ជាពិសេសដល់ SME»។
យោងតាមក្រសួងសេដ្ឋកិច្ច និងហិរញ្ញវត្ថុ សហគ្រាសធុនតូច និងមធ្យមអាចខ្ចីប្រាក់ចំនួន ២០ ម៉ឺនដុល្លារ សម្រាប់ទុនបង្វិល និង ៣០ ម៉ឺនដុល្លារ សម្រាប់ទុនវិនិយោគដែលមានអត្រាការប្រាក់អតិបរមា ៧ ភាគរយក្នុង ១ ឆ្នាំ និងមានរយៈពេលសងត្រឡប់មិនលើសពី ៧ ឆ្នាំ។
ដើម្បីអាចទទួលបានឥណទាននេះ សហគ្រាសធុនតូច និងមធ្យមត្រូវតែជាសហគ្រាសដែលចុះបញ្ជីផ្លូវការស្របច្បាប់នៅប្រទេសកម្ពុជា។ សហគ្រាសធុនតូចសំដៅដល់សហគ្រាសអាជីវកម្មគ្រប់ប្រភេទដែលមានផលរបរប្រចាំឆ្នាំចាប់ពី ២៥០ លានរៀល ឬមានចំនួននិយោជិតចាប់ពី ១០ នាក់ ទៅដល់ ៥០ នាក់។ ចំណែកសហគ្រាសធុនមធ្យមសំដៅដល់សហគ្រាសអាជីវកម្មគ្រប់ប្រភេទដែលមានផលរបរប្រចាំឆ្នាំចាប់ពី ៧០០ លានរៀល ឬមានចំនួននិយោជិតចាប់ពី ៥១ នាក់ ទៅដល់ ១០០ នាក់៕ LA