កំពង់ស្ពឺៈ ធនាគារ Export Import Bank (EXIM Bank) របស់ឥណ្ឌា និងរដ្ឋាភិបាលកម្ពុជាកាលពីថ្ងៃសៅរ៍មុន បានចុះហត្ថលេខាលើកិច្ចព្រមព្រៀងកម្ចី ៣៦,៩២ លានដុល្លារសម្រាប់ការអភិវឌ្ឍទំនប់ទឹកស្ទឹងស្វាហាប់ ដើម្បីប្រើប្រាស់ការស្រោចស្រព និងគ្រប់គ្រងទឹកជំនន់។
ទំនប់ទឹកស្ទឹងស្វាហាប់នេះមានទីតាំងនៅស្រុកភ្នំស្រួច ខេត្តកំពង់ស្ពឺ។
កិច្ចព្រមព្រៀងកម្ចីនេះត្រូវបានចុះហត្ថលេខានៅក្នុងប្រទេសឥណ្ឌារវាងលោក Preeti Saran រដ្ឋមន្ដ្រីក្រសួងកិច្ចការផ្ទៃក្នុងរបស់ប្រទេសឥណ្ឌា និងលោក ផាន ផល្លា អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ស្ថិតក្រោមវត្តមានរបស់លោកនាយករដ្ឋមន្ដ្រីឥណ្ឌា នរិន្រដា ម៉ូឌី និងលោក ហ៊ុន សែន នាយករដ្ឋមន្ដ្រីកម្ពុជា។ មិនមានព័ត៌មានលម្អិតបន្ថែមទៀតអំពីអត្រាការប្រាក់កម្ចី ឬរយៈពេលកម្ចីនោះទេ។
លោក ចាន់ យុត្ថា អ្នកនាំពាក្យក្រសួងធនធានទឹក និងឧត្តុនិយម បានប្រាប់ភ្នំពេញ ប៉ុស្តិ៍កាលពីម្សិលមិញថា ទំនប់ទឹកស្ទឹងស្វាហាប់ គឺជាប្រភពទឹកនៃស្ទឹងព្រែកត្នោត ដែលនឹងត្រូវសាងសង់ជាទំនប់ទឹកបម្រើជាអាងស្ដុកទឹកដើម្បីការពារទឹកជំនន់ក្នុងអំឡុងរដូវភ្លៀង និងដើម្បីបញ្ចេញទឹកសម្រាប់ការប្រើប្រាស់ប្រចាំថ្ងៃ និងវាលស្រូវកសិកម្មនៅរដូវប្រាំង។
លោកថ្លែងថា៖«នៅពេលមានទឹកភ្លៀងច្រើននៅក្នុងរដូវវស្សា ទំនប់នេះនឹងជួយក្នុងការស្ដុកទឹកដើម្បីគេចផុតពីទឹកជំនន់ដល់ខ្សែទឹកក្រោម [នៃស្ទឹងព្រែកត្នោត] ដែលនឹងជួយកាត់បន្ថយទឹកជំនន់»។
លោកបញ្ជាក់ថា៖ «នៅក្នុងរដូវប្រាំង ទំនប់នេះនឹងបញ្ចេញទឹកដល់ [ស្ទឹងព្រែកត្នោត] បន្ទាប់មកនឹងត្រូវប្រើប្រាស់សម្រាប់ការប្រើប្រាស់ និងសម្រាប់វាលស្រែកសិកម្ម»។
តាមលោក យុត្ថា ការសាងសង់រំពឹងថា នឹងអាចចាប់ផ្ដើមនៅចុងឆ្នាំនេះ ឬដើមឆ្នាំក្រោយ។ ទំនប់នេះអាចត្រូវការពេលវេលាប្រហែល៣ឆ្នាំក្នុងការបញ្ចប់។
ទំនប់ទឹកស្ទឹងស្វាហាប់ គឺជាគម្រោងទី ២ ក្នុងចំណោមគម្រោង ៣ នៅក្នុងផែនការដែលចុះបញ្ជីរបស់ក្រសួងក្នុងការសាងសង់ប្រព័ន្ធធារាសាស្ដ្រ និងការគ្រប់គ្រងទឹកជំនន់នៅតាមបណ្ដោយស្ទឹងព្រែកត្នោត។ ទំនប់ដំបូង ទំនប់ស្ទឹងតាសាល ត្រូវបានសាងសង់ស្ថិតក្រោមឥណទាន៣០លានដុល្លារពីប្រទេសឥណ្ឌាផងដែរ នៅពេលនេះកំពុងប្រតិបត្តិការ និងអាចស្ដុកទឹកបានប្រហែល ១២០ លានម៉ែត្រគុប។
លោកថ្លែងថា៖ «ទំនប់ទឹកទាំង២នេះនៅពេលរួចរាល់ដាក់ឲ្យដំណើរការទាំង២ អាចពង្រីកផ្ទៃដាំដុះស្រូវប្រាំងបានជាង១ម៉ឺន ទៅ១ម៉ឺន៥ពាន់ហិកតាបន្ថែមទៀតសម្រាប់ខេត្តកំពង់ស្ពឺ និងផ្នែកខ្លះទៀតនៅខេត្តកណ្តាល និងភ្នំពេញ»។
លោកបន្តថា ក្រសួងគ្រោងសាងសង់ទំនប់ស្តុកទឹកដែលជាផ្ទៃរងទឹកភ្លៀងសម្រាប់ស្ទឹងព្រែកត្នោតសរុប ៣ រួមមានស្ទឹងតាសាល ស្ទឹងស្វាហាប់ និង ស្ទឹងឃ្លៀច ដែលអាងស្តុកទឹកទាំង ៣ បូកបញ្ចូលគ្នាមានសមត្ថភាពស្តុកទឹកបានសរុបជិត ៤០០ លានម៉ែត្រគុប។
លោក យឹម ណន អនុប្រធានមន្ទីរកសិកម្មខេត្តកំពង់ស្ពឺ បានសាទរចំពោះគម្រោងនេះ។
តាមលោក ណន ខណៈខេត្តកំពង់ស្ពឺមានផ្ទៃដីដាំដុះសរុបជាង១៣ ម៉ឺនហិកតានារដូវវស្សា ផ្ទៃដីដាំដុះនៅខេត្តនេះបានធ្លាក់ចុះមកត្រឹមជាង ១ ០០០ ហិកតាវិញនារដូវប្រាំងដោយសារកង្វះប្រភពទឹក។ ដូច្នេះ ការបង្កើតទំនប់ទឹកដើម្បីប្រើប្រាស់នារដូវវស្សានឹងផ្តល់ប្រយោជន៍ច្រើនដល់កសិករ។
លោកថ្លែងថា៖ «កាលពីមុន បញ្ហាចោទគឺកង្វះទឹកស្រោចស្រពផ្ទៃដីដាំដុះ»៕ LA