ក្រុងញូវដែលីៈ ប្រទេស ឥណ្ឌា បានផ្អាកការធ្វើពាណិជ្ជកម្មឆ្លងព្រំដែននៅរដ្ឋកាស្មៀរដែលមានជម្លោះរបស់ខ្លួនជាមួយប្រទេស ប៉ាគីស្ថាន ដោយចោទប្រកាន់ថា សព្វាវុធ និងថ្នាំញៀនត្រូវបានរត់ពន្ធខុសច្បាប់ឆ្លងកាត់ព្រំដែននេះ ខណៈដែលភាពតានតឹងឡើងកម្តៅរវាងប្រទេសជិតខាងទាំង ២ នេះ។
រដ្ឋកាស្មៀរ ស្ថិតក្នុងសម្ពាធចាប់ពីការវាយប្រហារអត្តឃាតកាលពីខែកុម្ភៈ ដែលបានសម្លាប់ទាហានប៉ារ៉ាឥណ្ឌា ៤០ នាក់ និងបាននាំឲ្យប្រទេសទាំង ២ ហៀបធ្លាក់ចូលក្នុងភ្លើងសង្គ្រាមជាមួយនឹងការវាយប្រហារតាមផ្លូវអាកាសឆ្លងព្រំដែន។
កាលពីថ្ងៃព្រហស្បតិ៍សប្តាហ៍មុន រដ្ឋាភិបាលឥណ្ឌា ដែលកំពុងស្ថិតក្នុងការបោះឆ្នោត បានឲ្យដឹងថា ខ្លួនបានរាយការណ៍ថា ពាណិជ្ជកម្មនៅតាមព្រំដែននេះ «ត្រូវបានប្រើប្រាស់ខុសដោយសមាសភាពនានាមានមូលដ្ឋាននៅប៉ាគីស្ថាន ដើម្បីរត់ពន្ធអាវុធ ថ្នាំណាកូទិក និងរូបិយប័ណ្ណក្លែងក្លាយ»។
រដ្ឋាភិបាលឥណ្ឌាក៏បានឲ្យដឹងផងដែរ ពាណិជ្ជកម្មជាច្រើននៃពាណិជ្ជកម្មទាំងនោះដែលឆ្លងកាត់ខ្សែបន្ទាត់ត្រួតពិនិត្យព្រំដែន ដែលខណ្ឌចែកគ្នានូវរដ្ឋកាស្មៀរទៅជាតំបន់ចំនួន ២ ដែលស្ថិតក្រោមការគ្រប់គ្រងរបស់ប្រទេសឥណ្ឌា និងប៉ាគីស្ថាន មានទំនាក់ទំនងទៅនឹងអង្គការយោធានានា។
ក្រសួងមហាផ្ទៃឥណ្ឌាបានថ្លែងថា ពាណិជ្ជកម្មនឹងត្រូវបានផ្អាករហូតទាល់តែមានការដាក់ដំណើរការយន្តការអធិការកិច្ចកាន់តែតឹងរ៉ឹងជាងនេះ។
ពាណិជ្ជកម្មឆ្លងព្រំដែននេះធ្វើឡើងដោយមានមូលដ្ឋានប្រព័ន្ធដោះដូរ ដោយពាណិជ្ជករដោះដូរទំនិញនានាដូចជា ម្ទេស ឃ្យូមីន (cumin) ស្វាយ និងផ្លែឈើក្រៀម។
ពាណិជ្ជកម្មនេះបានចាប់ផ្តើមក្នុងឆ្នាំ ២០០៨ ដើម្បីធ្វើជាមធ្យោបាយមួយដើម្បីលើកកម្ពស់ទំនាក់ទំនងដែលមិនល្អរវាងរដ្ឋាភិបាលក្រុងញូវដែលី និងក្រុងអ៊ីស្លាម៉ាបាដ ដែលបានបង្កសង្គ្រាមនឹងគ្នា ដើម្បីកាន់កាប់តំបន់កាស្មៀរ៕ AFP/KC