.jpg)
បុរសម្នាក់កំពុងរ៉ាប់រូបិយប័ណ្ណ របស់ប្រទេស ឥណ្ឌូនេស៊ី។ AFP
ហ្សាការតាៈ ប្រទេស ឥណ្ឌូនេស៊ី កាត់បន្ថយអត្រាការប្រាក់ជាលើកដំបូងនៅក្នុងរយៈពេលជិត ២ ឆ្នាំ កាលពីថ្ងៃព្រហស្បតិ៍ ខណៈដែលប្រទេសមានសេដ្ឋកិច្ចឈានមុខគេរបស់អាស៊ីអាគ្នេយ៍មួយនេះ ស្វែងរកការបង្កើនកំណើនសេដ្ឋកិច្ច។
ធនាគារកណ្ដាលរបស់ប្រទេស ឥណ្ឌូនេស៊ី (BI) បានកាត់បន្ថយអត្រាការប្រាក់ដ៏សំខាន់ ០,២៥ ភាគរយ មកនៅត្រឹម ៥,៧៥ ភាគរយ សេចក្ដីសម្រេចនេះ ធ្វើឡើងមុនការកាត់បន្ថយអត្រាការប្រាក់ដែលរំពឹងទុកដោយធនាគារកណ្ដាលអាមេរិកនៅចុងខែនេះ។
លោក Perry Warjiyo ប្រធានធនាគារកណ្ដាលរបស់ប្រទេស ឥណ្ឌូនេស៊ី បានឲ្យដឹងថា៖ «គោលនយោបាយនេះត្រូវបានធ្វើឡើង ខណៈយើងប៉ាន់ប្រមាណថា អតិផរណានឹងរក្សាកម្រិតទាប ហើយយើងចាំបាច់ត្រូវរក្សាសម្ទុះសម្រាប់កំណើនសេដ្ឋកិច្ច»។
BI ក៏បានបន្ទាបអត្រាការប្រាក់លើប្រាក់បញ្ញើ និងប្រាក់កម្ចីចំនួន ០,២៥ ភាគរយមកនៅត្រឹម ៦,៥ ភាគរយ និង ៥ ភាគរយផងដែរ។
សេដ្ឋកិច្ចរបស់ប្រទេស ឥណ្ឌូនេស៊ី បានកើនឡើង ៥,០៧ ភាគរយ នៅត្រីមាសទី១ ធៀបនឹងឆ្នាំ ២០១៧ ចំពេលតម្លៃទំនិញប្រើប្រាស់សំខាន់ៗចុះខ្សោយ ដែលរួមមាន ប្រេងដូង និងធ្យូងថ្ម និងសង្គ្រាមពាណិជ្ជកម្មដែលបន្តកើតឡើង រវាងអាមេរិក និងប្រទេស ចិន។
លោក Warjiyo បានឲ្យដឹងថា ទោះបីជាភាពមិនច្បាស់លាស់ពីពិភពលោកកំពុងប្រសើរឡើងក៏ដោយ ក៏ធនាគារនេះត្រៀមខ្លួនរួចហើយសម្រាប់ភាពតានតឹងរវាងទីក្រុងប៉េកាំង និងទីក្រុងវ៉ាស៊ីនតោន។
លោកបន្តថា៖ «ធនាគារកណ្ដាលរបស់ប្រទេស ឥណ្ឌូនេស៊ី នៅតែមើលឃើញឱកាសសម្រាប់គោលនយោបាយរូបិយវត្ថុដែលមានភាពសម្របសម្រួល»។
ការសម្លឹងឆ្ពោះទៅមុខ សេដ្ឋកិច្ចកាន់តែយឺត និងអតិផរណាមិនខ្លាំង អាចឈានទៅដល់ការកាត់បន្ថយអត្រាការប្រាក់បន្ថែមទៀត។
លោក Gareth Leather សេដ្ឋវិទូអាស៊ីមកពីក្រុមហ៊ុន Capital Economics បានថ្លែងថា៖ «ប៉ុន្តែចក្ខុវិស័យមិនច្បាស់លាស់សម្រាប់រូបិយប័ណ្ណនេះ មានន័យថា នេះមិនទំនងជាការចាប់ផ្ដើមនៃវដ្ដបន្ធូរបន្ថយរយៈពេលវែងនោះទេ»។
ប្រទេសនេះ កំពុងជម្នះនឹងតម្លៃប្រាក់រូពៀដ៏ចុះខ្សោយ ដែលបានធ្វើឲ្យប៉ះពាល់ដល់ការលក់ចេញរូបិយប័ណ្ណរបស់ទីផ្សារ។
ប៉ុន្តែប្រទេសនេះ បានស្ទុះងើបឡើងវិញជាថ្មី ក្នុងរយៈពេលប៉ុន្មានខែថ្មីៗនេះ ដែលបានគាំទ្រដោយការបង្កើនអត្រាការប្រាក់ម្ដងហើយ ម្ដងទៀតរបស់ធនាគារកណ្ដាលរហូតដល់ឆ្នាំ ២០១៨៕ AFP/LA
