ភ្នំពេញៈ ពាណិជ្ជករជាង ៨០ នាក់មកពីប្រទេស កម្ពុជា និងឥណ្ឌូនេស៊ី បានជួបប្រជុំគ្នាកាលពីថ្ងៃម្សិលមិញនៅទីក្រុងភ្នំពេញ ដើម្បីសម្លឹងទៅរកការសហការវិនិយោគលើវិស័យដែលមានសក្ដានុពលរបស់កម្ពុជា។
ការផ្គូផ្គងពាណិជ្ជកម្មនេះ ត្រូវបានរៀបចំឡើងដោយស្ថានទូតឥណ្ឌូនេស៊ីប្រចាំកម្ពុជា ស្របនឹងវេទិកាពាណិជ្ជកម្ម និងការលើកកម្ពស់ទេសចរណ៍របស់ប្រទេស ឥណ្ឌូនេស៊ី ឆ្នាំ ២០១៨។
លោក Sudiraman Haseng ឯកអគ្គរដ្ឋទូតឥណ្ឌូនេស៊ី បានឲ្យដឹងថា ខណៈការកត់សម្គាល់ពាណិជ្ជកម្មទ្វេភាគីរវាងប្រទេសទាំង ២ រក្សាបានកំណើន មានឱកាស និងកិច្ចសហប្រតិបត្តិការជាច្រើននៅតែកំពុងរង់ចាំសមភាគី និងភាពជាដៃគូរវាងប្រទេសទាំង ២។ លោកថ្លែងថា៖ «ឱកាស និងកិច្ចសហប្រតិបត្តិការនៅរង់ចាំក្នុងការស្វែងរកដើម្បីការរីកចម្រើន»។
លោកបន្ថែមថា មិត្តភាព និងកិច្ច សហប្រតិបត្តិការដ៏រឹងមាំ រវាងប្រទេសទាំង ២ នឹងឆ្ពោះទៅមុខ និងធ្វើការប្រកៀកស្មាគ្នា ក្នុងការបង្កើតព្រឹត្តិការណ៍ដ៏សំខាន់ថ្មីៗ ឆ្ពោះទៅរកភាពជាដៃគូដ៏សំខាន់នៅក្នុងវិស័យពាណិជ្ជកម្ម។
ក្រុមហ៊ុនជាង ៣០ មកពីប្រទេស ឥណ្ឌូនេស៊ី និងជាង ៥០ មកពីកម្ពុជា បានចូលរួមក្នុងវេទិកាផ្គូផ្គងពាណិជ្ជកម្មនេះ។ ក្រុមហ៊ុនឥណ្ឌូនេស៊ី គឺមកពីវិស័យឱសថ សិប្បកម្ម សម្លៀកបំពាក់ សំណង់ និងគ្រឿងបន្លាស់រថយន្ត។
លោក តាន់ យុវរដ្ឋ អគ្គនាយករង នៃអគ្គនាយកដ្ឋានជំរុញពាណិជ្ជកម្មនៃក្រសួងពាណិជ្ជកម្មកម្ពុជាបានឲ្យដឹងថា ការផ្គូផ្គងពាណិជ្ជកម្មគឺជាតួនាទីដ៏សំខាន់ក្នុងការពង្រីកទីផ្សារ និងការលើកកម្ពស់ពាណិជ្ជកម្ម រវាងប្រទេសទាំង ២។
លោកថ្លែងថា៖ «ការផ្គូផ្គងពាណិជ្ជកម្មនេះ នឹងនាំយកឱកាសសម្រាប់ពាណិជ្ជករមានសក្ដានុពលនីមួយៗ ដើម្បីយល់ដឹងពីគ្នាទៅវិញទៅមក អំពីលក្ខខណ្ឌ តម្រូវការ និងទីផ្សាររបស់ពួកគេ បន្ទាប់មកកិច្ចព្រមព្រៀងពាណិជ្ជកម្មនឹងធ្វើឡើង»។
ទំហំពាណិជ្ជកម្មរវាងប្រទេសទាំង ២ បានកើនឡើងដល់ជាង ៣១៨ លានដុល្លារ នៅរយៈពេល ៧ ខែដំបូងឆ្នាំនេះ កើនឡើង ៨,៣ ភាគរយ ធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមរបាយការណ៍បានពីស្ថានទូតឥណ្ឌូនេស៊ីប្រចាំកម្ពុជា។
តួលេខនេះបានបង្ហាញថា ការនាំចេញរបស់កម្ពុជាទៅឥណ្ឌូនេស៊ី បានកើនឡើងដល់ជាង ១៧ លានដុល្លារ កើន ១២,៤១ ភាគរយធៀបនឹងឆ្នាំមុន ខណៈការនាំចូលមកពីប្រទេស ឥណ្ឌូនេស៊ី មានជាង ៣០១ លានដុល្លារ កើនឡើង ៨,០៧ ភាគរយ។
ខណៈទំហំពាណិជ្ជកម្មទ្វេភាគីរវាងសមាជិកអាស៊ានទាំង ២ នេះបង្ហាញពីសញ្ញាល្អ ប្រទេសទាំង ២ នៅតែមិនទាន់មានជើងហោះហើរត្រង់នៅឡើយទេ។ លោក តាន់ យុវរដ្ឋ ថ្លែងថា៖ «បើជើងហោះហើរត្រង់នឹងកើតឡើង ពាណិជ្ជកម្មរបស់យើងនឹងកើនឡើងផងដែរ»។
លទ្ធផលនៃវេទិកានេះបាននាំឲ្យក្រុមហ៊ុនឧសថដ៏ធំរបស់ឥណ្ឌូនេស៊ី delto med នឹងចុះ MoU ជាមួយក្រុមហ៊ុនក្នុងស្រុក Dynamic Pharma Cambodia នៅថ្ងៃនេះ ក្នុងការនាំចូលផលិតផលឱសថមកទីផ្សារកម្ពុជា៕LA