.jpg)
អតិថិជននៃធនាគារដៃគូទាំងអស់អាចប្រើប្រាស់ភ្នាក់ងារវីងដើម្បីដកប្រាក់។
ជាមួយ វីង អតិថិជនអាចដកប្រាក់ពីធនាគារចំនួន ១៨ ទូទាំងប្រទេសតាមរយៈបាគង។
អតិថិជនដៃគូធនាគារនៃបាគងដែលជាប្រព័ន្ធបច្ចេកវិទ្យា Blockchain ប្រកបដោយភាពច្នៃប្រឌិតដំណើរការដោយប្រព័ន្ធឌីជីថលដែលត្រូវបានបង្កើតឡើងដោយធនាគារជាតិកម្ពុជា ឥឡូវនេះពួកគេអាចផ្ទេរប្រាក់បានយ៉ាងងាយស្រួលតាមរយៈប្រព័ន្ធហិរញ្ញវត្ថុរបស់វីងនៅទូទាំងប្រទេស។
អ្នកឧកញ៉ា គិត ម៉េង ប្រធានក្រុមប្រឹក្សាភិបាលនៃធនាគារឯកទេស វីង បានមានប្រសាសន៍ថា៖ «ក្នុងរយៈពេល ១២ ឆ្នាំកន្លងមកនេះ វីង នៅតែប្រកាន់ខ្ជាប់នូវចក្ខុវិស័យរបស់យើងក្នុងការផ្តល់ជូនពលរដ្ឋកម្ពុជាគ្រប់រូបនូវសេវាកម្មហិរញ្ញវត្ថុចល័តដែលធ្វើឱ្យប្រសើរឡើងនូវជីវភាពរស់នៅប្រចាំថ្ងៃរបស់ពួកគេ។ តាមរយៈការរួមសហការវាងបាគង និងវីង យើងនឹងជំរុញចក្ខុវិស័យនេះឱ្យកាន់តែរីកចម្រើនបន្ថែមទៀត»។
បាគងដែលបានដាក់ឱ្យដំណើរការកាលពីចុងខែតុលាឆ្នាំនេះ ជាកម្មវិធីអន្តរធនាគារមួយដែលជំរុញការទូទាត់សាច់ប្រាក់យ៉ាងរលូនរវាងធនាគារ និងស្ថាប័នហិរញ្ញវត្ថុផ្សេងទៀតនៅក្នុងប្រទេសកម្ពុជា។ ការរួមបញ្ចូលគ្នានូវហិរញ្ញវត្ថុឌីជីថលនេះនឹងធ្វើឱ្យប្រសើរឡើងនូវប្រសិទ្ធភាព និងសុវត្ថិភាពនៃការទូទាត់ចំណាយ និងការជំរុញបរិយាប័ន្នហិរញ្ញវត្ថុក៏ដូចជាលើកកម្ពស់ប្រតិបត្តិការគ្មានសាច់ប្រាក់នៃប្រាក់រៀលដែលជារូបិយប័ណ្ណជាតិផងដែរ។
លោក ម៉ានូ រ៉ាចាន់ អគ្គនាយកនៃធនាគារឯកទេស វីង បានមានប្រសាសន៍ថា៖ «នេះជាលើកទី ១ ហើយដែលប្រព័ន្ធហិរញ្ញវត្ថុប្រកបដោយភាពច្នៃប្រឌិតបែបនេះ ត្រូវបានដាក់ឱ្យដំណើរការ ដើម្បីភ្ជាប់ធនាគារ ស្ថាប័នហិរញ្ញវត្ថុ និងអ្នកផ្តល់សេវាទូទាត់ផ្សេងទៀតសម្រាប់ប្រជាជនកម្ពុជាគ្រប់រូប។ តាមរយៈភាពជាដៃគូនេះ យើងអាចជួយសម្រួលដល់ការផ្ទេរប្រាក់តាមបែបឌីជីថល ដល់ស្ថាប័នផ្សេងៗបានយ៉ាងរហ័ស និងងាយស្រួល។ ជាមួយប្រព័ន្ធបាគង អតិថិជននៃធនាគារដៃគូទាំងអស់ឥឡូវនេះនឹងអាចប្រើប្រាស់បណ្តាញភ្នាក់ងារវីងទូទាំងប្រទេសដើម្បីដកប្រាក់របស់ពួកគេ»។
អ្នកឧកញ៉ា គិត ម៉េង ប្រធានក្រុមប្រឹក្សាភិបាលនៃធនាគារឯកទេស វីង។
សម្រាប់អ្នកប្រើប្រាស់ទូទៅ បាគងកែលម្អរបៀបនៃការទូទាត់សាច់ប្រាក់ និងធនាគារចល័តតាមរយៈការរួមបញ្ចូលនូវសេវាកម្មធនាគារ និងសេវាហិរញ្ញវត្ថុ ចូលក្នុងទម្រង់តែមួយ។ ដោយសារតែរូបិយប័ណ្ណឌីជីថលនេះអាចធ្វើប្រតិបត្តិការបានយ៉ាងងាយស្រួលរវាងប្រជាជន និងស្ថាប័នទើបធ្វើឱ្យអ្នកប្រើប្រាស់អាចទទួល និងផ្ទេរប្រាក់ទៅមិត្តភក្តិ សមាជិកគ្រួសារ និងដៃគូអាជីវកម្មគ្រប់ពេលវេលា គ្រប់ទីកន្លែងនៅប្រទេសកម្ពុជា។ សព្វថ្ងៃនេះ អតិថិជនរបស់ស្ថាប័នហិរញ្ញវត្ថុដែលជាសមាជិករបស់បាគង អាចធ្វើការផ្ទេរប្រាក់តាមរយៈស្កេន QR កូដ វាយបញ្ចូលលេខទូរស័ព្ទ ឬគ្រាន់តែជ្រើសរើសឈ្មោះអ្នកទទួលពីបញ្ជីទំនាក់ទំនងរបស់ពួកគេ។
អ្នកប្រើប្រាស់ប្រព័ន្ធបាគងអាចជ្រើសរើសស្ថាប័នហិរញ្ញវត្ថុណាមួយនៅក្នុងបណ្តាញប្រព័ន្ធបាគងដើម្បីផ្ទេរប្រាក់រវាងគ្នាទៅវិញទៅមក ហើយថែមទាំងអាចធ្វើការត្រួតពិនិត្យប្រវត្តិប្រតិបត្តិការប្រើប្រាស់ទៀតផង។ នៅពេលផ្ទេរប្រាក់ហើយអ្នកប្រើប្រាស់អាចផ្ទេរប្រាក់តាមរយៈប្រព័ន្ធបាគងទៅគណនីវីង ហើយពួកគេអាចប្រើប្រាស់ភ្នាក់ងារវីងទូទាំងប្រទេសដើម្បីដកប្រាក់។
ប្រទេសកម្ពុជាកំពុងជំរុញបច្ចេកវិទ្យាហិរញ្ញវត្ថុរបស់ខ្លួនតាមរយៈរូបិយប័ណ្ណឌីជីថល ហើយក្នុងនាមជាអ្នកផ្តល់សេវាហិរញ្ញវត្ថុឌីជីថលដ៏ធំមួយនៅក្នុងប្រទេស វីងកំពុងរួមចំណែកធ្វើឱ្យការខំប្រឹងប្រែងមួយនេះជោគជ័យ។
លោក ម៉ានូ រ៉ាចាន់ បានបន្តថា៖ «បាគងនិង វីង កំពុងរួមគ្នាជំរុញប្រព័ន្ធហិរញ្ញវត្ថុរបស់កម្ពុជាឱ្យឈានដល់ការអភិវឌ្ឍកម្រិតថ្មីមួយទៀត។ សម្រាប់យើង វាជាការបើកឱ្យមានការផ្តល់សេវាដាក់ប្រាក់ និងដកប្រាក់ដែលប្រកបដោយភាពងាយស្រួលដល់អតិថិជនរបស់ដៃគូធនាគារនៃបាគង»។
នោះមានន័យថា អតិថិជនទាំងនេះឥឡូវអាចប្រើប្រាស់សេវារបស់បណ្តាញភ្នាក់ងារវីងជាង ៨២០០ គ្រប់ទីកន្លែងពីរាជធានីភ្នំពេញរហូតដល់តាមស្រុកនានាក្នុងព្រះរាជាណាចក្រកម្ពុជា។
ឥឡូវនេះមានស្ថាប័នហិរញ្ញវត្ថុចំនួន ១៨ ទូទាំងប្រទេសហើយដែលបានក្លាយជាសមាជិករបស់ប្រព័ន្ធបាគង។ សម្រាប់អ្នកប្រើប្រាស់ថ្មី លោកអ្នកអាចស្វែងរកកម្មវិធីប្រព័ន្ធបាគងនៅក្នុង App Store និង Google Play Store ឬតាមរយៈគេហទំព័រ៖ https://bakong.nbc.org.kh ៕
