The Phnom Penh Post Search

Search form




Logo of Phnom Penh Post newspaper Phnom Penh Post - ឧស្សាហកម្ម​ធានា​រ៉ាប់រង​នៅ​ក្នុង​ប្រទេស​កម្ពុជា​កំពុង​ត្រូវ​បាន​ពង្រឹង

ឧស្សាហកម្ម​ធានា​រ៉ាប់រង​នៅ​ក្នុង​ប្រទេស​កម្ពុជា​កំពុង​ត្រូវ​បាន​ពង្រឹង

ឧស្សាហកម្ម​ធានា​រ៉ាប់រង​នៅ​ក្នុង​ប្រទេស​កម្ពុជា​កំពុង​ត្រូវ​បាន​ពង្រឹង

ភ្នំពេញៈ សមាគម​ធានា​រ៉ាប់រង​កម្ពុជា (IAC) ដែល​កំពុង​សហ​ប្រតិបត្តិការ​ជាមួយ​វិទ្យាស្ថាន​ធានា​រ៉ាប់រង ម៉ាឡេស៊ី (MII) នឹង​ផ្ដល់​វគ្គ​បណ្ដុះ​បណ្ដាល​រយៈ​ពេល​ខ្លី​ដល់​អ្នក​ជំនាញ​ក្នុង​ស្រុក​មក​ពី​ឧស្សាហកម្ម​ធានា​រ៉ាប់​រង​ធ្វើ​ជា​គ្រូ​បង្គោល​នៅ​ខែ មីនា។

ការ​បណ្ដុះ​បណ្ដាល​នេះ​គឺជា​ជំហាន​ទី​មួយ​ក្នុង​ការ​ឆ្លើយ​តប​ទៅ​នឹង​ការ​កើន​ឡើង​យ៉ាង​ខ្លាំង​នៃ​ឧស្សាហកម្ម​នេះ​ក្នុង​រយៈ​ពេល​ប៉ុន្មាន​ឆ្នាំ​ថ្មីៗ​នេះ។

លោក ឆាយ រតនៈ ប្រធាន IAC បាន​ចុះ​ហត្ថលេខា​លើ​កិច្ច​ព្រម​ព្រៀង​សហ​ប្រតិបត្តិការ​ជាមួយ​លោក Khadijiah Abdullah អគ្គ​នាយក​របស់ MII កាល​ពីថ្ងៃ ទី២៦ ខែ កម្ភៈ ស្ដី​ពី​ការ​ផ្ដល់​អ្នក​ជំនាញ​ដោយ​ផ្ដល់​ឯកសារ​ប្រឡង​និង​កម្មវិធី​សិក្សា​ដែល​បាន​ទទួល​ស្គាល់​ជា​អន្តរជាតិ​ដល់ IAC។

បង្កើត​ឡើង​កាល​ពី​ឆ្នាំ ១៩៦៨ ជា​អង្គការ​មិន​ស្វែង​រក​ប្រាក់​ចំណេញ MII គឺជា​ស្ថាប័ន​អាជីព​ឈាន​មុខ​គេ និង​ជា​គ្រឹះស្ថាន​អប់រំ​សម្រាប់​ឧស្សាហកម្ម​ធានា​រ៉ាប់​រង ម៉ាឡេស៊ី។ MII ផ្ដល់​នូវ​សមត្ថភាព​ដែល​ទទួល​ស្គាល់​ជា​លក្ខណៈ​អន្តរជាតិ​ខាង​ធានា​រ៉ាប់រង ការ​គ្រប់​គ្រង​ហានិភ័យ និង​ការ​ធ្វើ​ផែនការ​ហិរញ្ញវត្ថុ។

លោក ឆាយ រតនៈ បាន​ប្រាប់ ភ្នំពេញ ប៉ុស្ដិ៍ កាល​ពីថ្ងៃ​ព្រហស្បត៍​ថា កិច្ច​សហ​ប្រតិបត្តិការ​នេះ​គឺ​ក្នុង​គោល​បំណង​កសាង​ធនធាន​មនុស្ស​សម្រាប់​ឧស្សាហកម្ម​នេះ​ដែល​កំពុង​រីក​ចម្រើន និង​ដើម្បី​រក្សា​និរន្តរភាព​របស់​ខ្លួន​ជាមួយ​ធនធាន​មនុស្ស​ដ៏​ល្អ។

លោក​និយាយ​ថា៖ «ប្រធាន​ប្រតិបត្តិ​មក​ពី​ក្រុមហ៊ុន​ធានា​រ៉ាប់រង​ក្នុង​ស្រុក​នឹង​ធ្វើ​ជា​គ្រូ​បង្គោល​ដើម្បី​បង្រៀន​សិស្ស​ដោយ​សារ​តែ​យើង​គ្រោង​នឹង​ផ្ដល់​សញ្ញាបត្រ​សម្រាប់​ឧស្សាហកម្ម​នេះ​ផង​ដែរ»។

លោក​ថ្លែង​ថា មន្ដ្រី​ប្រតិបត្តិ​ទាំង​នេះ​ទាមទារ​ឲ្យ​មាន​ការ​បណ្ដុះ​បណ្ដាល​ហើយ​យ៉ាង​ហោច​ណាស់​មាន​បទ​ពិសោធ ៣ឆ្នាំ ខាង​វិស័យ​នេះ។

លោក​បន្ថែម​ថា៖ «វា​គឺជា​វគ្គ​បណ្ដុះ​បណ្ដាល​មាន​រយៈ​ពេល​ពីរ​ថ្ងៃ​ដោយ​សារ​តែ​មន្ដ្រី​ប្រតិបត្តិ​ភាគ​ច្រើន​របស់​ក្រុមហ៊ុន​ធានា​រ៉ាប់​រង​នៅ​ទីនេះ​បាន​សិក្សា​នៅ​បរទេស​រួច​ហើយ​និង​បាន​ទទួល​ស្គាល់​ជា​អន្តរជាតិ​ដូច្នេះ​អ្នក​ជំនាញ ម៉ាឡេស៊ី គ្រាន់​តែ​បណ្ដុះ​បណ្ដាល​ពួក​គេ​ស្ដី​ពី​របៀប​បង្រៀន​ដល់​ប្រជាជន​របស់​យើង​ប៉ុណ្ណោះ»។

លោក​បន្ត​ថា វគ្គ​បណ្តុះ​បណ្តាល​នេះ​នឹង​ធ្វើ​ឡើង​នៅ​ពេល​ណា​មួយ​ក្នុង​ខែ មីនា។

លោក យក់ ចំរើនរិទ្ធ អ្នក​គ្រប់​គ្រង​ទូទៅ​ក្រុមហ៊ុន Forte ដែល​ជា​ក្រុមហ៊ុន​ធានា​រ៉ាប់រង​ទូទៅ​ឈាន​មុខ​គេ​នៅ កម្ពុជា បាន​ស្វាគមន៍​ដល់​គំនិត​នេះ។

លោក​បាន​បន្ថែម​ថា៖ «ការ​អភិវឌ្ឍ​ធនធាន​មនុស្ស​មាន​សារៈ​សំខាន់​ពិត​ប្រាកដ។ វគ្គ​បណ្ដុះ​បណ្ដាល​នេះ​នឹង​ធ្វើ​ឲ្យ​ឧស្សាហកម្ម​នេះ​មាន​ស្ថិរភាព។ វា​គឺជា​ការ​ចាំ​បាច់​ត្រូវ​កែ​លម្អ​ធនធាន​មនុស្ស​សម្រាប់​ឧស្សាហកម្ម​នេះ»។

ទិន្នន័យ​របស់ AIC បាន​បង្ហាញ​ពី​ប្រាក់​ចំណូល​របស់​ឧស្សាហកម្ម​ធានា​រ៉ាប់រង​បាន​កើន​ឡើង ដល់ ១៥,៧៥ ភាគរយ​ពី​ឆ្នាំ​មុន​បាន​កើន​ឡើង​ដល់​ប្រហែល ៤២ លាន​ដុល្លារ​បើ​ធៀប​ទៅ​នឹង​ចំនួន ៣៦ លាន​ដុល្លារ​កាល​ពី​ឆ្នាំ ២០១២៕ PB

អត្ថបទគួរចាប់អារម្មណ៍