ភ្នំពេញ: ផ្នែកឯកជនក្នុងវិស័យដឹកជញ្ជូនស្នើឲ្យរដ្ឋាភិបាលអភិវឌ្ឍហេដ្ឋារចនាសម្ព័ន្ធតាមគ្រប់មធ្យោបាយដើម្បីលើកកម្ពស់ការដឹកជញ្ជូន និងសមត្ថភាពប្រកួតប្រជែងរបស់កម្ពុជានៅក្នុងតំបន់ ខណៈរដ្ឋមន្ត្រីក្រសួងសាធារណការ និងដឹកជញ្ជូនបានសន្យាធ្វើទំនើបកម្មក្នុងមធ្យោបាយដឹកជញ្ជូននៅកម្ពុជា។
លោក ស៊ិន ចន្ធី ប្រធានសមាគមភ័ស្តុភារកម្មកម្ពុជា (CLA) បានឲ្យដឹងថា បើទោះជារដ្ឋាភិបាលបានធ្វើទំនើបកម្មក្នុងវិស័យភ័ស្តុភារកម្មមួយចំនួនរួចមកហើយ ប៉ុន្តែរដ្ឋាភិបាលត្រូវជំរុញបន្ថែមទៀតក្នុងការលើកកម្ពស់ហេដ្ឋារចនាសម្ព័ន្ធផ្លូវទឹក (ទឹកសាប និងសមុទ្រ) និងផ្លូវដែកបន្ថែមទៀត ដើម្បីរក្សាភាពប្រកួតប្រជែងជាមួយប្រទេសនៅក្នុងតំបន់។
លោកថ្លែងថា៖ «យើងអបអរសាទរចំពោះក្រសួងក្នុងការជំរុញវិស័យនេះ យើងចង់ឲ្យរដ្ឋាភិបាលអភិវឌ្ឍហេដ្ឋារចនាសម្ព័នពិសេសផ្លូវទឹក និងផ្លូវដែក ដែលវានឹងផ្តល់ផលចំណេញច្រើនដល់វិស័យឯកជន»។
លោក ឃុត សារឿន នាយកប្រតិបត្តិក្រុមហ៊ុនដឹកជញ្ជូន SHA Transport Express Co., Ltd ប្រាប់ភ្នំពេញប៉ុស្តិ៍កាលពីថ្ងៃពុធថា ការជំរុញលើកកម្ពស់វិស័យភ័ស្តុភារកម្មនេះនឹងជួយស្តារវិស័យដឹកជញ្ជូនទំនិញឡើងវិញ ខណៈវិស័យនេះបន្តរងផលប៉ះពាល់យ៉ាងខ្លាំងបណ្តាលមកពីការរីករាលដាលជំងឺកូវីដ ១៩។
លោកថ្លែងថា៖ «យើងស្វាគមន៍ និងគាំទ្រដែលក្រសួងធ្វើទំនើបកម្មហេដ្ឋារចនាសម្ព័ន្ធដឹកជញ្ជូននេះ ដែលជាពេលវេលាចាំបាច់សម្រាប់កែទម្រង់ដើម្បីធ្វើនិរន្តរភាពវិស័យភ័ស្តុភារកម្ម ខណៈយើងកំពុងប្រឈមនឹងជំងឺកូវីដ ១៩»។
លោកជឿថា ការធ្វើទំនើបកម្មក្នុងវិស័យភ័ស្តុភារកម្មនឹងរួមចំណែកទាក់ទាញវិនិយោគិនពីបរទេសបន្ថែមទៀតមកកម្ពុជា។
លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានបើកកិច្ចប្រជុំដោះស្រាយបញ្ហាប្រឈមនៅតាមច្រកព្រំដែនកម្ពុជា-វៀតណាម និងកម្ពុជា-ថៃកាលពីថ្ងៃអង្គារដោយបានសន្យាធ្វើទំនើបកម្មក្នុងវិស័យនេះ។
លោកអះអាងថា សព្វថ្ងៃរដ្ឋាភិបាលកំពុងសិក្សាលទ្ធភាពបង្កើតមជ្ឈមណ្ឌលប្រមូលផ្តុំប្រព័ន្ធភ័ស្តុភារកម្មភ្នំពេញឡូជីស្ទិកដែលគម្រោងនេះទើបនឹងបញ្ចប់ការសិក្សាលទ្ធភាពបឋមកាលពីថ្មីៗដោយការសិក្សានេះបានបង្ហាញថាគម្រោងនេះអាចធ្វើពាណិជ្ជកម្ម និងអាចរកប្រាក់ចំណេញបាន។
គម្រោងភ្នំពេញឡូជីស្ទិកនេះមានទីតាំងស្ថិតនៅក្នុងសង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញលើផ្ទៃដីសរុប ៩៨ ហិកតា ដែលជាទីតាំងយុទ្ធសាស្ដ្រតភ្ជាប់ទៅកាន់កំពង់ផែសមុទ្រទឹកជ្រៅក្នុងខេត្តព្រះសីហនុ និងផ្លូវដែកភាគខាងជើងដែលចេញពីរាជធានីភ្នំពេញឆ្ពោះទៅកាន់ក្រុងប៉ោយប៉ែត៕LA