.jpg)
លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ ក្នុងកិច្ចប្រជុំនាពេលកន្លងមក។ រូបថត ក្រសួងប្រៃសណីយ៍
ភ្នំពេញៈ ថ្នាក់ដឹកនាំជាន់ខ្ពស់ក្រសួងសេដ្ឋកិច្ច និងហិរញ្ញវត្ថុបានជំរុញឱ្យមន្ត្រីពាក់ព័ន្ឋ និងក្រុមការងារអន្តរក្រសួងពន្លឿនការងារដើម្បីឈានទៅបញ្ចប់សេចក្តីព្រាងឯកសារទស្សនទានគោលនយោបាយរដ្ឋាភិបាលឌីជីថល និងភាពស៊ីចង្វាក់គ្នាជាមួយគោលនយោបាយសេដ្ឋកិច្ចឌីជីថល។
ក្នុងអំឡុងកិច្ចប្រជុំជាមួយលោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ ផ្តោតលើការពិភាក្សាឯកសារទស្សនទានគោលនយោបាយរដ្ឋាភិបាលឌីជីថលកម្ពុជា លោក វង្សី វិស្សុត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុបានឲ្យដឹងថា រដ្ឋាភិបាលឌីជីថលគឺជាផ្នែកដ៏សំខាន់មួយរបស់សេដ្ឋកិច្ចឌីជីថល។
លោកថ្លែងថា៖ «ការអភិវឌ្ឍរដ្ឋាភិបាលឌីជីថលត្រូវដើរទន្ទឹមគ្នានឹងការរៀបចំនូវប្រព័ន្ធអភិបាលកិច្ចឯកភាពរួមមួយដែលគ្រប់ក្រសួងស្ថាប័ន្ចបំពេញមុខងាររៀងៗខ្លួនជាទម្រង់ឌីជីថល»។
លោកបន្ថែមថា ធាតុចូលទាំងអស់ត្រូវស៊ីចង្វាក់គ្នារវាងសេចក្តីព្រាងគោលនយោបាយរដ្ឋាភិបាលឌីជីថល និងសេចក្តីព្រាងគោលនយោបាយសេដ្ឋកិច្ចឌីជីថល។
លោក ជា វ៉ាន់ដេត បានឲ្យដឹងថារដ្ឋាភិបាលឌីជីថលគឺជាដំណើរការនៃការធ្វើទំនើបកម្មលើប្រព័ន្ធគ្រប់គ្រងរដ្ឋាភិបាល និងសេវាសាធារណៈតាមរយៈការប្រើប្រាស់បច្ចេកវិទ្យាឌីជីថលសំដៅជួយសម្រួលដល់ការគ្រប់គ្រងកិច្ចការរដ្ឋបាលរបស់រដ្ឋ ការសម្រេចចិត្ត និងការផ្តល់សេវាជូនប្រជាពលរដ្ឋ វិស័យឯកជន និងស្ថាប័នពាក់ព័ន្ធប្រកបដោយប្រសិទ្ធភាព តម្លាភាព គណនេយ្យភាព និងបរិយាប័ន្ន។
លោកបន្ថែមថា៖ «ការអភិវឌ្ឍរដ្ឋាភិបាលឌីជីថល គឺជាកិច្ចការអាទិភាពមួយដ៏ចាំបាច់សម្រាប់កម្ពុជានាពេលបច្ចុប្បន្ន និងអនាគត ដើម្បីត្រៀមខ្លួនក្នុងការចូលរួមអភិវឌ្ឍសេដ្ឋកិច្ចឌីជីថល បដិវត្តឧស្សាហកម្មទី ៤ ក៏ដូចជាសកលភាវូបនីយកម្ម ដោយប្រើប្រាស់បច្ចេកវិទ្យាឌីជីថល»។
សេចក្ដីព្រាងផែនការយុទ្ធសាស្ដ្ររដ្ឋាភិបាលអេឡិចត្រូនិកកម្ពុជា ឆ្នាំ ២០១៨-២០២៣ ត្រូវបានព្រាងដោយក្រសួងប្រៃសណីយ៍ និងទូរគមនាគមន៍ស្របជាមួយនឹងផែនការមេ ICT កម្ពុជាឆ្នាំ ២០២០ និងគោលនយោបាយ Telecom-ICT ឆ្នាំ ២០២០។
កាលពីសប្ដាហ៍មុន ក្រសួងពាណិជ្ជកម្មបានអនុម័តជាផ្លូវការយុទ្ធសាស្ដ្រអនុវត្តច្បាប់ពាណិជ្ជកម្មអេឡិចត្រូនិកកម្ពុជា ដែលបានដាក់ឲ្យប្រើប្រាស់ចាប់តាំងពីខែវិច្ឆិកា ឆ្នាំ ២០១៩ ដើម្បីត្រួសត្រាយផ្លូវក្នុងការលើកកម្ពស់គំរូអាជីវកម្មឌីជីថល ស្របជាមួយនឹងទិសដៅផ្លោះចូលទៅក្នុងបដិវត្តន៍ឧស្សាហកម្មទី ៤៕ LA
