.jpg)
លោក Teh Sing ជាប្រធានសភាពាណិជ្ជកម្មប្រទេសម៉ាឡេស៊ី នៅកម្ពុជា បានទទួលមរណភាព នៅថ្ងៃទី ២៦ ខែមេសានេះ។
ភ្នំពេញ៖ «បងប្រុស Teh Sing ជាទីគោរពស្រឡាញ់ សូមបងទៅដោយស្ងប់ចិត្តចុះ បងបានចេញឆ្ងាយពីក្រសែភ្នែករបស់យើងក៏ពិតមែន ប៉ុន្តែស្ថិតនៅក្នុងក្រអៅបេះដូងរបស់យើងជានិច្ច»។ នេះជាសារចុងក្រោយរបស់លោកឯកអគ្គរាជទូតម៉ាឡេស៊ីប្រចាំនៅកម្ពុជា លោក Eldeen Husaini Mohd Hashim ជូនចំពោះមរណភាពលោក Teh Sing ជាជនល្បីល្បាញ និងជាអ្នកដឹកនាំពាណិជ្ជកម្មលេចធ្លោជាងគេរបស់ប្រទេសម៉ាឡេស៊ី
លោក Teh Sing ដែលជាប្រធានសភាពាណិជ្ជកម្មប្រទេសម៉ាឡេស៊ី នៅកម្ពុជា (MBCC) បានទទួលមរណភាពកាលពីថ្ងៃទី ២៦ ខែមេសា ដោយសាររោគាពាធក្នុងអាយុ ៦៩ ឆ្នាំ នៅទីក្រុងភ្នំពេញ ប្រទេសកម្ពុជា។
លោកឯកអគ្គរាជទូត Eldeen Husaini Mohd Hashim បានសរសេរមកកាន់ ភ្នំពេញ ប៉ុស្ដិ៍ តាមសារអេឡិចត្រូនិកកាលពីថ្ងៃទី ២៦ ខែមេសាថា៖ «បងប្រុស Teh Sing ស្ថិតក្នុងចំណោមអ្នកត្រួសត្រាយផ្លូវរបស់ប្រទេសម៉ាឡេស៊ី ដែលបានចូលមកកម្ពុជាដោយរស់នៅប្រកបដោយក្ដីសុបិន។ លោកមានបទពិសោធន៍ច្រើនខាងការងារទាំងល្អ និងអាក្រក់ និងរស់នៅក្នុងប្រទេសកម្ពុជាច្រើន ដូច្នេះលោក គឺជាព្រឹទ្ធបុរសមួយរូប ក្នុងចំណោមព្រឹទ្ធបុរសរបស់ប្រទេសម៉ាឡេស៊ីជា ច្រើននៅទីនេះ»។
លោកថ្លែងបន្តទៀតថា៖ «បងប្រុស Teh Sing មិនគ្រាន់តែប្រធានសភាពាណិជ្ជកម្មនៅកម្ពុជាប៉ុណ្ណោះទេ ប៉ុន្តែថែមទាំងជាមិត្តភ័ក្តិ និងជាបងប្រុសដែលគួរឲ្យគោរពស្រឡាញ់មួយរូបចំពោះរូបខ្ញុំ។ គំនិត និងការអធិដ្ឋានរបស់យើងស្ថិតនៅជាមួយរូបលោក។ ប្រសិនបើខ្ញុំសរសេរអំពីការរួមចំណែករបស់លោក ដើម្បីលើកកម្ពស់ទំនាក់ទំនងទ្វេភាគីរវាងប្រទេសទាំងពីរ វានឹងមិនចប់នោះទេ។ លោកបានសហការគ្នាយ៉ាងជិតស្និទ្ធជាមួយឯកអគ្គរាជទូតប្រទេសម៉ាឡេស៊ី ទាំងអស់ចំនួន ៩ រូប ដែលរួមទាំងរូបខ្ញុំផងដែរ ដើម្បីក្លាយជាស្ពានដែលតភ្ជាប់ពួកយើង»។
សម្រាប់ លោក Teh Sing មិនមែនជាមនុស្សថ្មីម្នាក់នោះទេ បើនិយាយពីប្រទេសកម្ពុជា ដែលបានឈានជើងជាន់ទឹកដីប្រទេសកម្ពុជា កាលពីឆ្នាំ ១៩៩២ ដែលមានរយៈពេល ២៩ ឆ្នាំកន្លងមកហើយ។ លោកបានចាប់ផ្ដើមធ្វើដំណើររបស់លោកមកប្រទេសកម្ពុជា ជានាយកផ្នែកលក់របស់ក្រុមហ៊ុន Cambrew Ltd ដែលជាក្រុមហ៊ុនផលិត និងចែកចាយស្រាបៀរអង្គរ និងទឹកក្រូចប៉ិបស៊ី។ លោកបានចូលនិវត្តន៍ពីក្រុមហ៊ុនស្រាបៀរនេះ ជាប្រធានផ្នែកប្រតិបត្តិការកាលពីខែមិថុនា ឆ្នាំ ២០០៦។ នេះបើយោងតាម MBCC។
ដោយបានបង្កើតទំនាក់ទំនងយ៉ាងជ្រៅជាមួយប្រទេសកម្ពុជា លោក Teh Sing បានស្នាក់នៅ និងបានចាប់ផ្ដើមក្រុមហ៊ុនផ្ទាល់ខ្លួនរបស់លោក ឈ្មោះថា Gangga Private Limited ដែលផ្ដោតការយកចិត្តទុកដាក់លើការពិគ្រោះយោបល់ ការផ្សព្វផ្សាយពាណិជ្ជកម្ម និងការផ្សព្វផ្សាយនានា។
លោក Teh Sing គឺជាឥស្សរជនដ៏សំខាន់មួយរូបនៅក្នុង MBCC ជាសមាជិកស្ថាបនិក និងប្រធានក្លិបម៉ាឡេស៊ីកាលពីឆ្នាំ ១៩៩៣ ហើយបន្ទាប់មកក្លាយជាប្រធានក្រុមប្រឹក្សាពាណិជ្ជកម្មប្រទេសម៉ាឡេស៊ី នៅកម្ពុជាចាប់ពីឆ្នាំ ១៩៩៧ រហូតដល់ឆ្នាំ ១៩៩៩។
កាលពីឆ្នាំ ២០០៦ លោក Teh Sing ត្រូវបានជ្រើសរើសជាប្រធាន MBCC ដែលជាតួនាទីមួយ ដែលលោកបានកាន់តំណែងរហូតមកដល់ពេលបច្ចុប្បន្ន។
លោកឯកអគ្គរាជទូត Eldeen Husaini Mohd Hashim បានថ្លែងថា៖ «ពិតប្រាកដណាស់ លោកមានការនឹករឭកដោយអ្នកដែលបានស្គាល់រូបលោកថា ជាមនុស្សសុភាពរាបសារ ប៉ុន្តែជាបុគ្គលមានភាពម៉ឹងម៉ាត់។ លោកតែងតែផ្ដល់ដល់ខ្ញុំនូវដំបូន្មាន និងការណែនាំដ៏មានតម្លៃគ្រប់ពេលវេលា និងគ្រប់ទីកន្លែងលើបញ្ហាជាច្រើន។ ទំនុកចិត្តរបស់ខ្ញុំមានលើគ្រួសារ និងសាច់ញាតិ និងមិត្តភ័ក្ដិជិតស្និទ្ធរបស់លោក។ លោក Teh Sing ពិតជាវីរៈបុរសមួយរូប និងជាជនជាតិម៉ាឡេស៊ីដ៏ល្បីល្បាញមួយរូប ដែលខ្ញុំមានមោទនភាពហៅថា «បងប្រុស»៕LA
