រយៈពេលប៉ុន្មានសប្តាហ៍ចុងក្រោយនេះ តម្លៃគូរូបិយប័ណ្ណដុល្លារ និងស្វ៊ីស ហ្វ្រង់ (USD/CHF) មានការឡើងពី ០.៨៧៩៩ រហូតដល់ ០.៩៣៣០ ក្នុង ១ ដុល្លារ។ ផ្អែកទៅលើកត្តាព័ត៌មាន និងកត្តាបច្ចេកទេស តម្លៃគូរូបិយប័ណ្ណដុល្លារ និងស្វ៊ីស ហ្វ្រង់ នៅតែមានសុទិដ្ឋិនិយមខ្ពស់ថានឹងបន្តកើនឡើងនៅក្នុងសបា្តហ៍ក្រោយទៀត។
ចំពោះកត្តាព័ត៌មាន ការអនុម័ត «គម្រោងសង្គ្រោះសហរដ្ឋអាមេរិក» ឬ American Rescue Plan ចំនួន ១,៩ ពាន់ពាន់លានដុល្លាររបស់សហរដ្ឋអាមេរិក គឺជាចំណុចដ៏សំខាន់ដែលធ្វើឱ្យដំណើរសេដ្ឋកិច្ច និងទីផ្សារទាំងមូលរបស់សហរដ្ឋអាមេរិកមានដំណើរការ ល្អប្រសើរឡើងវិញ ដែលជាសញ្ញាវិជ្ជមានទៅលើតម្លៃតម្រូវការប្រាក់ដុល្លារអាមេរិក។
បើយោងតាមសេចក្តីរាយការណ៍របស់ទីភ្នាក់ងារព័ត៌មាន AP បានឱ្យដឹងថា ប្រាក់ជំនួយ ១ ៤០០ ដុល្លារសហរដ្ឋអាមេរិកតាមរយៈ «គម្រោងសង្គ្រោះសហរដ្ឋអាមេរិក នឹងចូលក្នុងគណនេយ្យធនាគាររបស់ពលរដ្ឋអាមេរិកាំងភាគច្រើននៅចុងសប្តាហ៍នេះ។ ក្រៅពីនេះ គម្រោងសង្គ្រោះសហរដ្ឋអាមេរិករួមមានកញ្ចប់ប្រាក់សម្រាប់ការចែកចាយវ៉ាក់សាំងបង្ការជំងឺកូវីដ១៩ ជំនួយដល់ម្ចាស់គេហដ្ឋាន និងអ្នកជួលផ្ទះ ជំនួយសម្រាប់ការបើកដំណើរការសាលារៀនឡើងវិញ ការផ្តល់ជំនួយដល់រដ្ឋ និងរដ្ឋាភិបាលថ្នាក់មូលដ្ឋាន។ យន្ដការទាំងអស់នេះ គឺជាផ្នែកយ៉ាងសំខាន់នឹងជួយឱ្យសេដ្ឋកិច្ចអាមេរិកកាន់តែមានភាពល្អប្រសើរ។
តាំងពីដើមខែមីនានេះ បើយោងតាមគេហទំព័រសារព័ត៌មាន forexfactory.com យើងអាចសង្កេតឃើញពីកំណើន និងសម្ទុះសេដ្ឋកិច្ច ក៏ដូចជា កំណើនការងារនៅសហរដ្ឋអាមេរិក មានលទ្ធផលល្អលើសពីការរំពឹងទុក។ ជាក់ស្ដែង លទ្ធផលអត្រាអ្នកមានការងារសម្រាប់ខែកុម្ភៈមានចំនួន ៣៧៩ ០០០ នាក់ លើសពីខែមករា ដែលមានត្រឹមតែ ១៦៦ ០០០ នាក់។ ជាមួយកត្ដាព័ត៌មានខាងលើ តម្លៃប្រាក់ដុល្លារនឹងមានការកើនតម្លៃ ហើយក៏ជាកត្ដារុញឱ្យតម្លៃគូរូបិយប័ណ្ណដុល្លារ និងស្វ៊ីស ហ្វ្រង់ ស្ថិតនៅក្នុងទំនោរកើនឡើងក្នុងសប្តាហ៍ខាងមុខនេះ។
ដូច្នេះ អ្នកជួញដូរអាចទិញនៅតម្លៃ ០,៩២៦០ ដោយកំណត់មុខងារកាត់យកប្រាក់ចំណេញទី ១ នៅតម្លៃ ០,៩៣១០០ ឬ ទី ២ នៅតម្លៃ ០,៩៣៥០ និងកំណត់មុខងារបញ្ឈប់ហានិភ័យនៅក្នុងតម្លៃ ០,៩២៣៣ ក្នុង ១ ដុល្លារ៕