ក្រុងវ៉ាស៊ីនតោនៈ ឱនភាពថវិកាសហរដ្ឋអាមេរិកបានកើនឡើងដល់ ៧៧៩ ពាន់លានដុល្លារដែលជាកម្រិតខ្ពស់បំផុតក្នុងរយៈពេល ៦ ឆ្នាំ ក្នុងឆ្នាំសារពើពន្ធថ្មីបំផុតនេះ ដែលបង្ហាញឲ្យឃើញពីការខាតបង់ដោយសារការកាត់បន្ថយពន្ធដ៏ច្រើនកាលពីឆ្នាំមុន។ នេះបើយោងតាមក្រសួងហិរញ្ញវត្ថុអាមេរិកកាលពីថ្ងៃចន្ទ។
ក្រសួងហិរញ្ញវត្ថុបានឲ្យដឹងថា លោក ដូណាល់ ត្រាំ បានហៅការកាត់បន្ថយពន្ធនេះថាជាកត្តាអំណោយផលមួយចំពោះសេដ្ឋកិច្ច ប៉ុន្តែទឹកប្រាក់ដែលបានពីពន្ធសាជីវកម្មបានធ្លាក់ចុះខ្លាំង ហើយបន្ទុកបំណុលដែលចេះតែកើនឡើង ដើម្បីផ្តល់ហិរញ្ញវត្ថុដល់ឱនភាព បានក្លាយជាការចំណាយដែលចេះតែកើនឡើង។
ក្នុងឆ្នាំសារពើពន្ធ ២០១៨ ដែលបានបញ្ចប់កាលពីថ្ងៃទី ៣០ ខែកញ្ញា អាមេរិកទទួលបានចំណូល ៣,៣ ពាន់ពាន់លានដុល្លារ តែចំណាយវិញ ៤,១ ពាន់ពាន់លានដុល្លារ។
ការណ៍នោះ បានធ្វើឲ្យឱនភាពកើនឡើង ១៧ ភាគរយ ឬចំនួន ១១៣ ពាន់លានដុល្លារ ដែលជាកម្រិតខ្ពស់បំផុតរបស់ខ្លួនគិតចាប់តាំងពីឆ្នាំ ២០១២ មក។ នេះបើយោងតាមរបាយការណ៍របស់ក្រសួងហិរញ្ញវត្ថុ។
របាយការណ៍នេះបានបង្ហាញថា ឱនភាពនេះក៏បានកើនឡើងផងដែរបើគិតជាចំណែកភាគរយនៃសេដ្ឋកិច្ច ដោយស្ទុះងើបដល់ ៣,៨ ភាគរយនៃផលិតផលក្នុងស្រុកសរុបកើនឡើងពី ៣,៥ ភាគរយក្នុងឆ្នាំសារពើពន្ធ ២០១៧ ដែលខ្ពស់ជាងកម្រិតជាមធ្យម ៣,២ ភាគរយក្នុងរយៈពេល ៤០ ឆ្នាំចុងក្រោយនេះ។
ប៉ុន្តែដោយ ផ.ស.ស កើនឡើង ៤,២ ភាគរយនៅត្រីមាសទី ២ ឆ្នាំនេះ សេតវិមានកំពុងពឹងផ្អែកលើកំណើនកាន់តែខ្ពស់ជាងនេះ ដើម្បីចំណាយលើការកាត់បន្ថយពន្ធកាលពីខែធ្នូ ឆ្នាំមុន។
លោក Steven Mnuchin រដ្ឋមន្ត្រីក្រសួងហិរញ្ញវត្ថុបានឲ្យដឹងថា៖ «គោលនយោបាយសេដ្ឋកិច្ចរបស់លោកប្រធានាធិបតីនឹងដឹកនាំអាមេរិកឲ្យដើរឆ្ពោះទៅរកផ្លូវហិរញ្ញវត្ថុប្រកបដោយចីរភាព»៕ AFP/KC