ភ្នំពេញៈ ឱនភាពពាណិជ្ជកម្មកម្ពុជាជាមួយបណ្តាប្រទេសផ្សេងៗជុំវិញពិភពលោក នៅតែធំរហូតដល់ ៧,៧៦ ពាន់លានដុល្លារសហរដ្ឋអាមេរិក ដែលធំជាង ៣១ ភាគរយ ក្នុងឆ្នាំ ២០១៩ ខណៈឆ្នាំ ២០១៨ ឱនភាពពាណិជ្ជកម្មនេះមានត្រឹមជាង ២២ ភាគរយប៉ុណ្ណោះ។ នេះបើយោងតាមរបាយការណ៍របស់ធនាគារជាតិនៃកម្ពុជាដែលបានចេញផ្សាយកាលពីថ្ងៃពុធម្សិលមិញ។
តួលេខធនាគារជាតិបានបង្ហាញថា ព្រះរាជាណាចក្រកម្ពុជាបាននាំចូលផលិតផលដែលមានតម្លៃទឹកប្រាក់ប្រមាណ ២២,៣៤ ពាន់លានដុល្លារអាមេរិក កាលពីឆ្នាំមុន ខណៈដែលការនាំចេញរបស់កម្ពុជាមានទំហំទឹកប្រាក់ត្រឹម ១៤,៦៣ ពាន់លានដុល្លារប៉ុណ្ណោះ ដែលមានន័យថាកម្ពុជាមានឱនភាពទឹកប្រាក់ប្រមាណជិត ៨ ពាន់លានដុល្លារអាមេរិក។
តួលេខធនាគារជាតិបានបង្ហាញថា ឆ្នាំ ២០១៩ ការនាំចូលរបស់កម្ពុជាមានកំណើន ១៨,៦% រីឯការនាំចេញវិញមានកំណើន ១២,៧ ភាគរយ។
ផលិតផលដែលកម្ពុជានាំចេញមានដូចជា សម្លៀកបំពាក់ ស្បែកជើង អង្ករ ទោចក្រយាន និងផលិតផលវាយនភណ្ឌផ្សេងៗទៀត ខណៈផលិតផលដែលកម្ពុជានាំចូល ដូចជា ប្រេងឥន្ធនៈ រថយន្ត សម្ភារសំណង់ ផលិតផលបរិភោគ ព្រមទាំងវត្ថុធាតុដើមផ្សេងទៀតសម្រាប់បម្រើឲ្យវិស័យកម្មន្តសាលនៅក្នុងស្រុក។
លោក ស៊ាង ថៃ អ្នកនាំពាក្យក្រសួងពាណិជ្ជកម្មបានប្រាប់ភ្នំពេញប៉ុស្តិ៍កាលពីថ្ងៃពុធថា វាជារឿងធម្មតាសម្រាប់ប្រទេសអភិវឌ្ឍន៍ដូចជាប្រទេស កម្ពុជា ដែលមានឱនភាពជញ្ជីងពាណិជ្ជកម្មខ្ពស់បែបនេះ ព្រោះតម្រូវការនាំចូលសម្ភារថ្មីៗ និងវត្ថុធាតុដើមសម្រាប់បម្រើឲ្យផលិតកម្ម។
លោកបន្តថា៖ «វាជារឿងចាំបាច់ដើម្បីនាំចូលវត្ថុធាតុដើមពីប្រទេសចិនដើម្បីគាំទ្រដល់វិស័យកម្មន្តសាល ហើយយើងក៏នាំចូលប្រេងឥន្ធនៈ សម្ភារអេឡិចត្រូនិក សម្ភារសំណង់ និងរថយន្តដែលទាំងអស់នេះមានតម្លៃខ្ពស់។ ប្រសិន យើងមានរោងចក្រផលិតផលិតផលទាំងនោះបានដោយខ្លួនឯង យើងនឹងកាត់បន្ថយការនាំចូលបានច្រើនដូចគ្នា។ ផ្ទុយទៅវិញយើងក៏ប្រមូលពន្ធបានច្រើនពីការនាំចូលផលិតផលទាំងនោះផងដែរ»។
លោក លឹម ហេង អនុប្រធានសភាពាណិជ្ជកម្មកម្ពុជាបាននិយាយថា កំណើននាំចេញក្នុងវិស័យផលកម្មន្តសាល និងអង្កររបស់កម្ពុជាបានរួមចំណែកបង្កើនតម្រូវការវត្ថុធាតុដើមកាន់តែច្រើន ដើម្បីគាំទ្រដល់ផលិតកម្មក្នុងស្រុក។
លោកថ្លែងថា៖ «វាជារឿងសាមញ្ញចំពោះប្រទេសកំពុងអភិវឌ្ឍន៍ដែលមានតម្លៃនាំចូលខ្ពស់ជាងតម្លៃនាំចេញនោះ ហើយវាក៏បានបង្ហាញដែរថា យើងមានទីផ្សារធំដែលតម្រូវឲ្យយើងនាំចូលវត្ថុធាតុដើមសម្រាប់គាំទ្រការផលិត»។
របាយការណ៍ធនាគារជាតិដដែលបានបង្ហាញថា សហរដ្ឋអាមេរិកជាទីផ្សារធំបំផុតរបស់ទំនិញកម្ពុជាដែលស្រូបយក ២៩,៦ ភាគរយនៃការនាំចេញសរុបរបស់កម្ពុជា។ ជប៉ុនជាទីផ្សារធំលំដាប់លេខ ២ ដែលស្រូបយកចំណែក ៧,៧ ភាគរយ ទីផ្សារអាល្លឺម៉ង់មានចំណែក ៧,២ ភាគរយ ទីផ្សារចិន ៦,៩ ភាគរយ និងចក្រភពអង់គេ្លស ៦,៦ ភាគរយ។
ប្រទេសកម្ពុជាបាននាំចូលច្រើនបំផុតពីទីផ្សារប្រទេសចិនដែលមានចំណែករហូតដល់ទៅ ៤៣,១ ភាគរយ នៃទំហំនាំចូលសរុបកាលពីឆ្នាំមុន ខណៈប្រទេសថៃឈរលំដាប់លេខ ២ មានចំណែក ១៥,៥ ភាគរយ វៀតណាមលំដាប់លេខ ៣ មាន ១៣,៦ ភាគរយ ជប៉ុនមាន ៤,៧ ភាគរយ និង សាធារណរដ្ឋកូរ៉េខាងត្បូងមាន ៣,៤ ភាគរយ៕