The Phnom Penh Post Search

Search form




Logo of Phnom Penh Post newspaper Phnom Penh Post - ​ភ្ញៀវ​ទេសចរ​ជាតិ ​អន្តរជាតិ​កើន​ឡើង​ក្នុង​​បុណ្យ​ចូល​ឆ្នាំ​ចិន

​ភ្ញៀវ​ទេសចរ​ជាតិ ​អន្តរជាតិ​កើន​ឡើង​ក្នុង​​បុណ្យ​ចូល​ឆ្នាំ​ចិន

​ភ្ញៀវ​ទេសចរ​ជាតិ ​អន្តរជាតិ​កើន​ឡើង​ក្នុង​​បុណ្យ​ចូល​ឆ្នាំ​ចិន

ភ្នំពេញៈ ចំនួន​ភ្ញៀវ​ទេសចរ​ក្នុង​ស្រុក​និង​បរទេស​ទៅ​ទស្សនា​ប្រាសាទ​អង្គរវត្ត និង​តំបន់​ឆ្នេរ​បាន​កើន​ឡើង​យ៉ាង​ខ្លាំង​ក្នុង​អំឡុង​ពេល​បុណ្យ​ចូល​ឆ្នាំ​ចិន​រយៈ​ពេល​៣​ថ្ងៃ​។នេះ​បើ​តាម​ទិន្នន័យ​ពី​មន្ទីរ​ទេសចរណ៍​។

បើ​ទោះ​បី​បុណ្យ​ចូល​ឆ្នាំ​ចិន វៀតណាម មិន​មែន​ជា​ប្រពៃណី​ខ្មែរ​ក៏​ដោយ​ប៉ុន្តែ​ប្រជាជន​កម្ពុជា​ភាគ​ច្រើន​យល់​ឃើញ​ថា​វា​គឺ​ជា​ឱកាស​ដ៏​ល្អ​សម្រាប់​ឈប់​សម្រាក​លម្ហែ​កាយ​ទៅ​វិញ​។

ទិន្នន័យ​ពី​មន្ទីរ​ទេសចរណ៍​ខេត្ត​សៀមរាប បាន​បង្ហាញ​ថា​មាន​ភ្ញៀវ​ទេសចរ​ចំនួន​៥២ ៩០៩​នាក់​បាន​មក​ទស្សនា​ខេត្ត​សៀមរាប​ក្នុង​អំឡុង​ពេល​បុណ្យ​ចូល​ឆ្នាំ​ចិន​ឆ្នាំ​នេះ​ដោយ​កើន​ឡើង​៧,១៧ ភាគ​រយ​បើ​ធៀប​នឹង​ឆ្នាំ​ទៅ​។ ក្នុង​ចំណោម​នោះ​អ្នក​ទេសចរ​បរទេស​មាន​ចំនួន​២៣ ៧០៩​នាក់ កើន​ឡើង​១៥, ៧៦​ភាគ​រយ​។​ទេសចរ​ក្នុង​ស្រុក​កើន​ឡើង​តិច​តួច​តែ​១​ភាគ​រយ​ប៉ុណ្ណោះ​។

លោក ឆឺយ ឈន អនុ​ប្រធាន​មន្ទីរ​ទេសចរណ៍​ខេត្ត​សៀមរាប​បាន​និយាយ​ថា៖ «​យើង​ទទួល​អ្នក​ទេសចរ​ចិន និង​វៀតណាម កាន់​តែ​ច្រើន​ឡើងៗ ដែល​មក​តាម​រយៈ​យន្ត​ហោះ​ប្រហែល​៤១ ជើង បាន​ចុះ​ចត​ក្នុង​មួយ​ថ្ងៃ អំឡុង​ពេល​៣​ថ្ងៃ​មុន​។ សូម្បី​តែ​ពេល​នេះ​ពួក​គេ​នៅ​តែ​បន្ត​មក​»​។

លោក​បាន​បន្ត​ថា ការ​រីក​ចម្រើន​សេដ្ឋកិច្ច​របស់​ពួក​គេ​និង​សេដ្ឋកិច្ច​របស់​យើង បាន​ជំរុញ​ឲ្យ​ពួកគេ​ចំណាយ​ពេល​ច្រើន​លើ​ការ​ធ្វើ​ដំណើរ​។ ក្រៅ​ពី​នេះ​យើង​មាន​ស្ថិរភាព​នយោបាយ​ដែល​ទាក់​ទាញ​ដល់​អ្នក​ទេសចរ​ដទៃ​ទៀត​ឲ្យ​មក​ទស្សនា​។

លោក​បាន​ថ្លែង​ថា​ជា​ធម្មតា​ប្រជាជន​ក្នុង​ស្រុក​ទស្សនា​ខេត្ត​សៀមរាប​នៅ​ថ្ងៃ​សោរ៍​និង​ថ្ងៃ​អាទិត្យ​ប៉ុន្តែ​ក្នុង​អំឡុង​ពេល​ចូល​ឆ្នាំ​ចិន​ពួក​គេ​បាន​ផ្លាស់​ប្តូរ​ទិស​ដៅ​ទៅ​កន្លែង​ផ្សេង​ទៀត​។

លោក សេង មុនី នាយក​រដ្ឋ​បាល​នៅ​មន្ទីរ​ទេសចរណ៍​ខេត្ត​ព្រះ​សីហនុ បាន​រាយ​ការណ៍​ពី​ការ​កើន​ឡើង​នូវ​ចំនួន​អ្នក​ទេសចរ​សម្រាប់​ពិធី​បុណ្យ​នៅ​ឆ្នាំ​នេះ។​លោក​បន្ត​ថា សរុប​មាន​អ្នក​ទេសចរ​ចំនួន​៤៤ ០៧៦ ដោយ​កើន​ឡើង​ចំនួន​១៨,១៩​ភាគ​រយ​។

តាម​តួលេខ​ភ្ញៀវ​ទេសចរ​ក្នុង​ស្រុក​មាន​ចំនួន​៣៨ ៧៨៧​នាក់ ដោយ​កើន​ឡើង ១៥,៥៩​ភាគ​រយ ខណៈ​ដែល​ភ្ញៀវ​បរទេស​មាន​ចំនួន​៥ ២៨៩ កើន​ឡើង​ចំនួន​៤១, ៨៣​ភាគ​រយ​។

លោក បាន​លើក​ឡើង​ថា៖ «​ឆ្នាំ​នេះ​យើង​ឃើញ​កំណើន​ភ្ញៀវ​បរទេស​មាន​ការ​កើន​ខ្លាំង​ដោយ​សារ​មាន​កប៉ាល់​ធំ​ចំនួន​៣​ដែល​ផ្ទុក​ភ្ញៀវ​ទេសចរ​ប្រមាណ​២ ០៨៩ នាក់​បាន​មក​ឈប់​សំចត​នៅ​ខេត្ត ព្រះ​សីហនុ​នៅ​រដូវ​ចូល​ឆ្នាំ​ចិន​នេះ​»។

លោក​បាន​បន្ត​ទៀត​ថា​អាជ្ញាធរ​បាន​សហការ​ជាមួយ​មន្ទីរ​ពាក់​ព័ន្ធ​បាន​រៀប​ចំ​ព្រឹត្តិ​ការណ៍​និង​កម្មវិធី​ផ្សេងៗ​ដើម្បី​ស្វាគមន៍​ភ្ញៀវ​ទេសចរ៖ «​ជា​ការ​ពិត​ណាស់​ទោះ​បី​ជា​មាន​ការ​ត្អូញ​ត្អែរ​អំពី​ការ​ឡើង​ថ្លៃ​បន្តិច​មែន តែ​ភ្ញៀវ​ភាគ​ច្រើន​នៅ​តែ​អាច​ទទួល​យក​បាន​»។

បើ​យោង​តាម​ទិន្នន័យ​ពី​មន្ទីរ​ទេសចរណ៍​ខេត្ត​កំពត​បាន​បង្ហាញ​ថា ខេត្ត​បាន​ទទួល​ភ្ញៀវ​ទេសចរ ចំនួន​៨៤ ៩១៧​នាក់ ដែល​ក្នុង​នោះ​ភ្ញៀវ​ជាតិ​មាន​៦៩ ៥៤៨​នាក់ និង​ភ្ញៀវ​អន្តរជាតិ​១៥ ៣៦៩​នាក់ កើន​៤៣,៤១​ភាគ​រយ​។

លោក​បន្ត ម៉ុក សេកាណូ អនុ​ប្រធាន​មន្ទីរ​ទេសចរណ៍​ខេត្ត​កំពត​បាន​ឲ្យ​ដឹង​ថា ភ្ញៀវ​ទេសចរ​ទាំង​ជាតិ និង​អន្តរជាតិ ពេញ​និយម​នឹង​ការ​ទៅ​ទស្សនា​លើ​ភ្នំ​បូក​គោ​។

កាល​ពី​ខែ​មករា​ក្រសួង​ទេសចរណ៍ បាន​ចេញ​សេចក្ដី​ណែ​នាំ​ទៅ​ដល់​គ្រប់​មន្ទីរ​ទេសចរណ៍​ខេត្ត ក្រុង និង​អាជ្ញាធរ ពាក់​ព័ន្ធ​ធ្វើ​ការ​ពង្រឹង​សុវត្ថិភាព សេវាកម្ម​ឲ្យ​ល្អ​និង​មិន​ឲ្យ​ឡើង​ថ្លៃ​សេវាកម្ម​នៅ​រដូវ​ចូល​ឆ្នាំ​ចិន​នេះ​ឡើយ​៕ PB

អត្ថបទគួរចាប់អារម្មណ៍