The Phnom Penh Post Search

Search form

Logo of Phnom Penh Post newspaper Phnom Penh Post - ​មេឃ៍ប៊ែង​ដាក់​ដំណើរ​ការ​ប្រព័ន្ធ​ថ្មី​តាម​អ៊ីនធឺណិត​




​មេឃ៍ប៊ែង​ដាក់​ដំណើរ​ការ​ប្រព័ន្ធ​ថ្មី​តាម​អ៊ីនធឺណិត​

​មេឃ៍ប៊ែង​ដាក់​ដំណើរ​ការ​ប្រព័ន្ធ​ថ្មី​តាម​អ៊ីនធឺណិត​

ភ្នំពេញៈ ធនាគារ​មេឃ៍ប៊ែង​ដែល​ជា​ធនាគារ​ធំ​បំផុត​មួយ​នៅ​កម្ពុជា​បាន​បើក​ដំណើរ​ការ​ជា​ផ្លូវ​ការ​នូវ​សេវា​ធនាគារ​តាម​ប្រព័ន្ធ​អ៊ីនធឺណិត​ក្នុង​គោល​បំណង​ផ្តល់​ភាព​ងាយ​ស្រួល​ដល់​អតិថិជន​របស់​ខ្លួន​ជាង​១ម៉ឺន​នាក់ ហើយ​ធនាគារ​សង្ឃឹម​ថា​នឹង​បង្កើន​អតិថិជន​ប្រហែល​១០​ភាគ​រយ​។

ធនាគារ​នេះ​បាន​ឲ្យ​ដឹង​ទៀត​ថា​ការ​ចាប់​ផ្តើម​សេវាកម្ម​នេះ​គឺ​ជា​ការ​ឆ្លើយ​តប​ទៅ​នឹង​ការ​កើន​ឡើង​នៃ​កម្រិត​ជីវភាព​រស់​នៅ​របស់​ប្រជាជន​កម្ពុជា។

សេវាកម្ម​ថ្មី​ហៅ​ថា M2U​នឹង​ផ្តល់​លទ្ធភាព​ដល់​អតិថិជន​នៅ​កម្ពុជា​ក្នុង​ការ​ប្រើប្រាស់​សេវា​ហិរញ្ញវត្ថុ​ជា​ច្រើន តាម​ប្រព័ន្ធ​អ៊ីនធឺណិត​រាប់​បញ្ចូល​ទាំង​ការ​ឆែក​មើល​សមតុល្យ​ការ​ផ្ទេរ​មូល​និធិ ប្រាក់​បញ្ញើ​មាន​កាល​កំណត់​បញ្ជា​ទិញ​មូលប្បទានបត្រ​ការ​ពិនិត្យ​មូលប្បទានបត្រ​ការ​បញ្ឈប់​ការ​បង់​ប្រាក់​តាម​មូលប្បទានបត្រ​ពាក្យ​សុំ​ប្រាក់​កម្ចី និង​សេវា​ច្រើន​ថែម​ទៀត។​សេវាកម្ម​នេះ​នឹង​ត្រូវ​ពង្រឹង​បន្ថែម​ទៀត​ដើម្បី​ដាក់​បញ្ចូល​សេវា​ដទៃ​ទៀត​ដូចជា​ការ​ទូទាត់​វិក្កយ​បត្រ​ភ្លើង​ទឹក។

លោក Lee Tien Poh​ប្រធាន​នាយក​ប្រតិបតិ្ត​នៃ​ធនាគារ​មេឃ៍ប៊ែង​កម្ពុជា​បាន​ថ្លែង​ក្នុង​អំឡុង​ពេល​ដាក់​ឲ្យ​ដំណើរ​ការ​កាល​ថ្ងៃ​ទី​១២ ខែ​ធ្នូ​ថ្មី​ៗ​នេះ​ថា ជាមួយ​នឹង​កំណើន​វិជ្ជមាន​នៃ​សេដ្ឋកិច្ច​កម្ពុជា ពិសេស​កំណើន​នៃ​ការ​វិនិយោគ​ពី​បរទេស​និង​ឱកាស​ការងារ​កាន់​តែ​ល្អ​ប្រសើរ​នឹង​មាន​តម្រូវ​ការ​ចង់​បាន​សេវាកម្ម​ធនា​គារ​ដែល​ងាយ​ស្រួល ដើម្បី​ឲ្យ​ស័ក្តិសម​ទៅ​នឹង​របៀប​រស់​នៅ​របស់​ប្រជាជន​កម្ពុជា​ដែល​កំពុង​ផ្លាស់​ប្តូរ។ លោក​បាន​បន្ថែម​ថា៖ «​សេវាកម្ម​ថ្មី​នេះ​តម្រង់​រក​អតិថិជន​ដែល​មាន​ស្រាប់ ដែល​មាន​គណនី​នៅ​ធនាគារ មេឃ៍ប៊ែង​ដោយ​ផ្តល់​ភាព​ងាយ​ស្រួល​បន្ថែម​ទៀត​ដល់​ពួកគេ ក្នុង​ការ​ធ្វើ​ប្រតិបតិ្ត​ការ​តាម​អ៊ីនធឺណិត​ដោយ​មិន​ចាំ​បាច់​ចុះ​ទៅ​សាខា​ធនាគារ​របស់​យើង​ឡើយ​។ យើង​ក៏​រំពឹង​ផង​ដែរ​ថា​មូលដ្ឋាន​អតិថិជន​របស់​យើង​នឹង​កើន​ឡើង​បាន​ចំនួន​យ៉ាង​ហោច​ណាស់​១០​ភាគរយ ពីព្រោះ​ធនាគារ​មេឃ៍ប៊ែង បច្ចុប្បន្ន​ជា​ធនាគារ​មួយ​ក្នុង​ចំណោម​ធនាគារ​តែ​៥ ប៉ុណ្ណោះ ដែល​ផ្តល់​សេវា​ធនាគារ​តាម​ប្រព័ន្ធ​អ៊ីនធឺណិត​នៅ​កម្ពុជា»។

ប៉ុន្តែ​លោក​បដិសេធ​មិន​បញ្ចេញ​របាយ​ការណ៍​ហិរញ្ញវត្ថុ​ទេ​។ បច្ចុប្បន្ន​ធនាគារ​មាន​១១ សាខា និង​គ្រោង​ពង្រីក​៤​ទៅ ៥ សាខា​ក្នុង​ខេត្ត​មួយ​ចំនួន នៅ​ឆ្នាំ​ក្រោយ៕TK

 

អត្ថបទគួរចាប់អារម្មណ៍