ក្រុងបាងកកៈ ហាងលក់ទំនិញ 7-Eleven កំពុងពិចារណាពង្រីកវត្តមានរបស់ខ្លួនក្នុងតំបន់អាស៊ីប៉ាស៊ីហ្វិក ដើម្បីអនុវត្តទស្សនវិស័យកំណើនប្រចាំតំបន់របស់ខ្លួន។ នេះបើតាមលោក Suphachai Chearavanont នាយកប្រតិបត្តិក្រុមហ៊ុន Charoen Pokphand (CP) Group។
លោក Suphachai បានប្រាប់កាសែតបាងកកប៉ុស្តិ៍ក្នុងបទសម្ភាសផ្តាច់មុខមួយថា៖ «ក្រុមហ៊ុន [CP Group] ជឿជាក់ថាហាងលក់ទំនិញលក់រាយរបស់ខ្លួន គួរតែមាន «វត្តមានក្នុងតំបន់» មិនត្រឹមតែនៅក្នុងប្រទេសថៃប៉ុណ្ណោះទេ»។ លោកបានបន្តថា៖ «ការវិនិយោគមិនគួរមាននៅតែប្រទេសថៃនោះទេ តែទិសដៅវិនិយោគចាំបាច់ត្រូវមានសក្តានុពលទីផ្សារក្នុងតំបន់អាស៊ីប៉ាស៊ីហ្វិក»។
លោក Suphachai បានបន្តថាហាង 7-Eleven ដែលប្រតិបត្តិការដោយក្រុមហ៊ុន CP All Plc នៅប្រទេសថៃនឹងត្រូវពិភាក្សាពីយុទ្ធសាស្ត្រពង្រីកអាជីវកម្មនេះជាមួយនឹងក្រុមហ៊ុន Seven & I Holdings Co Ltd ដែលជាក្រុមហ៊ុនមេជប៉ុនរបស់ក្រុមហ៊ុន 7-Eleven ។
លោកបានមានប្រសាសន៍ទៀតថាការពង្រីកអាជីវកម្មប្រចាំតំបន់ទំនងជានឹងត្រូវបានគ្រប់គ្រងដោយក្រុមហ៊ុន CP All។ លោកបានបដិសេធផ្តល់ព័ត៌មានលម្អិតថា តើក្រុមហ៊ុន CP All នឹងចាប់ផ្តើមអនុវត្តផែនការពង្រីកអាជីវកម្មនេះនៅឆ្នាំនេះឬយ៉ាងណានោះ។
លោក Suphachai បានបន្តឲ្យដឹងទៀតថាក្រុមហ៊ុន CP All តាមរយៈក្រុមហ៊ុន Siam Makro Plc ដែលជាក្រុមហ៊ុនប្រតិបត្តិការហាងលក់ទំនិញ Makro បានពង្រីកវត្តមានរបស់ខ្លួនរួចហើយនៅបរទេសដូចជានៅកម្ពុជា មីយ៉ាន់ម៉ា និងឥណ្ឌាជាដើម។
លោកបានបន្តឲ្យដឹងទៀតថាហាងលក់ទំនិញមួយនឹងផ្តល់សេវា ២៤ ម៉ោងដើម្បីបម្រើតម្រូវការសហគមន៍ ជាពិសេសសហគមន៍នៅតាមតំបន់ប្រជុំជនដែលមានរបៀបរស់នៅផ្សេងៗគ្នាទៅតាមជីវិតប្រចាំថ្ងៃរបស់ខ្លួន។
លោក Suphachai មានប្រសាសន៍ថា៖ «ហាង 7-Eleven ត្រូវបានចាត់ទុកថាជាចំណុចជួបជុំគ្នាប្រកបដោយសុវត្ថិភាពសម្រាប់ប្រជាជន»។
បង្កើតឡើងក្នុងឆ្នាំ ១៩៨៨ ដោយក្រុមហ៊ុន Charoen Pokphand Group ក្រុមហ៊ុន CP All ទទួលបានអាជ្ញាប័ណ្ណបើកហាង 7-Eleven នៅឆ្នាំនោះ។
ហាងលក់ទំនិញនេះលក់ផលិតផលឲ្យអតិថិជនចំនួន ៣០ លាននាក់ក្នុងមួយសប្តាហ៍៕ BP