ភ្នំពេញៈ ក្រុមហ៊ុនចែកចាយរថយន្តកូរ៉េ ម៉ាក KIA បង្ហាញសុទិដ្ឋិនិយមចំពោះទីផ្សាររថយន្តថ្មីក្នុងប្រទេសកម្ពុជា បន្ទាប់ពីបើកសម្ពោធបន្ទប់តាំងបង្ហាញរថយន្តកាលពីថ្ងៃសុក្រ ។
អ្នកតំណាងក្រុមហ៊ុន A&A Auto Group ដែលទទួលបានសិទ្ធិផ្តាច់មុខជាអ្នកចែកចាយស្របច្បាប់រថយន្ត ម៉ាក KIA នៅកម្ពុជាប្រាប់ភ្នំពេញប៉ុស្តិ៍កាលពីម្សិលមិញថា ក្រុមហ៊ុនរំពឹងថានឹងអាចវាយលុកក្នុងទីផ្សាររថយន្តថ្មី ដែលនឹងកាត់បន្ថយការប្រើប្រាស់រថយន្តជជុះក្នុងចំណោមអ្នកប្រើប្រាស់ក្នុងស្រុក។
លោកស្រី ស៊ីន ស៊ីវឿង ប្រធានផ្នែកលក់នៃក្រុមហ៊ុន A&A Auto Group ឲ្យដឹងថា កត្តាជីវភាពដែលកំពុងតែកើនឡើង និងតម្រូវការប្រើប្រាស់ឡានថ្មីកំពុងតែជំរុញទីផ្សាររថយន្តឲ្យ ដើរទៅមុខ។ លោកស្រីបន្តថា៖ «យើងឃើញសេដ្ឋកិច្ចប្រជាជនកាន់តែប្រសើរឡើង ហើយទំនោរងាកមកប្រើប្រាស់រថយន្តថ្មីដែលមានតម្លៃសមរម្យ ក្នុងចំណោមអ្នកមានចំណូលមធ្យមក៏មានការកើនឡើង។ យើងមើលឃើញពីសក្តានុពលនេះ»។
លោកស្រី ស៊ីវឿង រំពឹងថា A&A Auto Group នឹងអាចលក់រថយន្តបាន៤០០គ្រឿងដល់ដាច់ឆ្នាំ ហើយព្យាករថា នឹងកើនក្នុងរង្វង់ពី២០ ទៅ៣០ភាគរយជារៀងរាល់ឆ្នាំ។ លោកស្រីបន្តថា៖ «ពួកគាត់ចង់តែប្រើរថយន្តថ្មីហ្នឹង។ បើថ្លៃសមរម្យ គាត់នឹងឈប់ប្រើរថយន្តជជុះ ហើយងាកមកប្រើរថយន្តថ្មីវិញ។ ខ្ញុំជឿថា ជាមួយតម្លៃដែលបានសិក្សារួចហើយនេះ អាចឲ្យយើងវាយលុកទីផ្សារបាន»។
អ្នកចែកចាយ A&A Auto Group នឹងនាំចូលរថយន្តថ្មីពីប្រទេសកូរ៉េដើម្បីចែកចាយបន្តនៅកម្ពុជា ក្នុងនោះមានរថយន្តលក្ខណៈគ្រួសារ ប្រភេទដឹកទំនិញ និងរថយន្ត(SUV)។
បច្ចុប្បន្នរថយន្តរបស់ម៉ាក KIA មាន Picanto, Optima, Carens, K3000s Truck និង Sorento។
លោក លី ប៊ុនហៃ អ្នកគ្រប់គ្រងទូទៅក្រុមហ៊ុន តូយ៉ូតា (ខេមបូឌា) ឲ្យដឹងថា បច្ចុប្បន្នទីផ្សាររថយន្តថ្មីមានប្រមាណត្រឹមតែ១០ភាគរយនៃ ទីផ្សាររថយន្តនៅកម្ពុជា ខណៈទីផ្សារជជុះមានដល់ទៅ៩០ភាគរយ។ លោកបានបន្តថា ការប្រកួតប្រជែងក្នុងទីផ្សាររវាងក្រុមហ៊ុនចែកចាយរថយន្តគឺជា រឿងដែលចៀសមិនផុតឡើយ តែថា រថយន្តថ្មីដែលមានតម្លៃសមរម្យនឹងជួយជំរុញអ្នកប្រើប្រាស់ឲ្យ ងាកមកប្រើរថយន្តថ្មីវិញ។ លោកបានបន្តថា៖ «វាពាក់ព័ន្ធនឹងការយកពន្ធលើការនាំចូលដែរ ដែលធ្វើឲ្យតម្លៃរថយន្តថ្មីថ្លៃ។ អ្នកប្រើប្រាស់ទិញរថយន្តជជុះគឺដោយសារវាធូរថ្លៃជាង។ វាអាស្រ័យលើជម្រើស និងស្ថានភាពហិរញ្ញវត្ថុរបស់អ្នកប្រើប្រាស់នោះទេ»។
លោក សេង វឹង ប្រធានគ្រប់គ្រងផ្នែករថយន្តហ្វ័ដ ប្រចាំនៅកម្ពុជា ក៏បាននិយាយដែរថា ការចូលមកដល់នៃម៉ាករថយន្តកាន់តែច្រើននៅកម្ពុជាមិនមានន័យថា នឹងធ្វើឲ្យទីផ្សាររថយន្តកាន់តែតូចនោះទេ។ លោកបន្តថា៖ «វាគ្រាន់តែបន្ថែមការប្រកួតប្រជែងក្នុងទីផ្សារកាន់តែខ្លាំង ឡើងព្រោះទីផ្សាររថយន្តនៅកម្ពុជាកើនឡើងជារៀងរាល់ថ្ងៃ»។ លោកបន្ថែមថា ការចូលមកដល់នៃម៉ាករថយន្តល្បីៗលើពិភពលោកក្នុងប្រទេសកម្ពុជា គឺជាការឆ្លុះបញ្ចាំងពីសក្តានុពលនៃទីផ្សាររថយន្តនៅកម្ពុជា។
លោក កង ច័ន្ទតារារ័ត្ន អ្នកជំនាញផ្នែកសេដ្ឋកិច្ច និងជាប្រធានវិទ្យាស្ថានដើម្បីការសិក្សាអភិវឌ្ឍន៍កម្ពុជានិយាយ ថា ការលក់រថយន្តថ្មីថ្នាក់មធ្យមនឹងកើនឡើង ខណៈទីផ្សាររថយន្ត ប្រណីតអាចមានភាពតានតឹង៖ «បើតាមស្ថានភាពបច្ចុប្បន្ននេះខ្ញុំជឿថា ទីផ្សាររថយន្តថ្មីសម្រាប់ប្រជាជនមានចំណូលមធ្យមល្អ ដោយសារយើងមានស្ថិរភាពនយោបាយដែលប្រសើរជាងថៃ នឹងអាចទាក់ទាញការវិនិយោគបន្ថែមដែលធ្វើឲ្យចំណូលប្រជាជន ថ្នាក់មធ្យមច្រើនជាងមុន»។ លោកបន្ថែមថា ការផ្តល់សេវាថែទាំ ជួសជុល និងគ្រឿងបន្លាស់ដែលរកបានក្នុងស្រុកក៏ជាកត្តាជំរុញការប្រើប្រាស់រថយន្តកូរ៉េផងដែរ។
កាលពីឆ្នាំ២០១៣ ការនាំចូលរថយន្តរបស់កម្ពុជាកើន១០ ០០០ គ្រឿង ធៀបឆ្នាំ២០១២។ នេះបើតាមលោកស្រី តឹក រ៉េតកំរង អនុរដ្ឋលេខាធិការក្រសួងពាណិជ្ជកម្ម កាលពីខែមីនា៕
