The Phnom Penh Post Search

Search form




Logo of Phnom Penh Post newspaper Phnom Penh Post - ABA លក់​ភាគ​ហ៊ុន​ជិត ១០% ឲ្យ​ទៅ​ធនាគារ​ជាតិ​កាណាដា

ABA លក់​ភាគ​ហ៊ុន​ជិត ១០% ឲ្យ​ទៅ​ធនាគារ​ជាតិ​កាណាដា

ABA លក់​ភាគ​ហ៊ុន​ជិត ១០% ឲ្យ​ទៅ​ធនាគារ​ជាតិ​កាណាដា

ភ្នំពេញៈ យោង​តាម​ការ​ប្រកាស​របស់​ធនាគារ ABA កាល​ពី​ថ្ងៃ​ព្រហស្បតិ៍ ធនាគារ​ជាតិ កាណាដា បាន​ទិញ​ភាគ​ហ៊ុន​ជិត ១០ ភាគរយ​ពី​ធនាគារ ABA សម្រាប់​ការ​ពង្រីក​ពាណិជ្ជកម្ម​របស់​ខ្លួន​នៅ​ក្នុង​តំបន់​អាស៊ី​អាគ្នេយ៍។

សេចក្តី​ប្រកាស​បាន​ឲ្យ​ដឹង​ថា៖ «បន្ទាប់​ពី​ទទួល​បាន​ការ​អនុម័ត​តាម​ផ្លូវ​ច្បាប់​រួច​មក ធនាគារ ABA បាន​ប្រកាស​អំពី​ការ​សម្រេច​បាន​ដោយ​ជោគជ័យ​នូវ​ភាព​ជា​ដៃ​គូ​នៃ​ការ​ទិញ​ភាគ​ហ៊ុន​របស់​ធនាគារ​ជាតិ កាណាដា ដែល​បាន​ទិញ​ភាគ​ហ៊ុន​ថ្មី​របស់ ABA ចំនួន ៩,៩៩ ភាគ​រយ​នៃ​ភាគ​ហ៊ុន​សរុប»។

លោក Askhat Azhikhanov អគ្គ​នាយក​នៃ​ធនាគារ ABA មិន​បាន​ឆ្លើយ​តប​អ៊ីមែល ភ្នំពេញ ប៉ុស្ដិ៍ ទេ ប៉ុន្តែ​លោក​ត្រូវ​បាន​គេ​ដក​ស្រង់​សម្ដី​នៅ​ក្នុង​សេចក្ដី​ប្រកាស​នេះ​ថា៖ «យើង​បាន​វិនិយោគ​ឥត​ឈប់​ឈរ​ក្នុង​ការ​អភិវឌ្ឍ​ធនាគារ​របស់​យើង​ឲ្យ​ក្លាយ​ជា​ធនាគារ​ដ៏​សំខាន់​មួយ​នៅ​ក្នុង​ទីផ្សារ​ហិរញ្ញវត្ថុ​នៅ​កម្ពុជា»។

លោក​បន្ថែម​ថា៖ «យើង​រីករាយ​ក្នុង​ភាព​ជា​ដៃ​គូ​ជាមួយ​គ្រឹះស្ថាន​ហិរញ្ញវត្ថុ​ដ៏​ធំ​បំផុត​ដូច​ជា​ធនាគារ​ជាតិ កាណាដា ដែល​នឹង​ជួយ​ពង្រឹង​ដល់​ភាព​ប្រកួត​ប្រជែង​របស់​ធនាគារ ABA នៅ កម្ពុជា ឲ្យ​កាន់​តែ​ប្រសើរ​ថែម​ទៀត»។

លោក Karen Leggett អគ្គ​នាយក​រង​ផ្នែក​ទីផ្សារ និង​យុទ្ធសាស្ដ្រ​សាជីវកម្ម​របស់​ធនាគារ​ជាតិ កាណាដា បាន​លើក​ឡើង​ក្នុង​សេចក្ដី​ប្រកាស​នេះ​ថា៖ «ការ​ចូល​រួម​របស់​យើង​ក្នុង​ភាព​ជា​ដៃគូ​ជាមួយ​ធនាគារ ABA ផ្ដល់​ឱកាស​ដ៏​ប្រសើរ​ដល់​ការ​វិនិយោគ​នៅ​ក្នុង​ទីផ្សារ​កម្ពុជា​ដែល​កំពុង​មាន​លក្ខណៈ​សកម្ម និង​កំណើន​យ៉ាង​ឆាប់​រហ័ស»។

លោក​បន្ថែម​ទៀត​ថា៖ «រចនា​សម្ព័ន្ធ ការ​គ្រប់​គ្រង​ដ៏​រឹង​មាំ ទម្រង់​អាជីវកម្ម និង​ស្ដង់ដារ​អភិបាល​កិច្ច​គួប​ផ្សំ​ជាមួយ​នឹង​ជំនាញ​ព្រម​ទាំង​ការ​យល់​ដឹង​អំពី​ទីផ្សារ​ក្នុង​ស្រុក​របស់​ធនាគារ ABA គឺជា​កត្តា​ដែល​រួម​ចំណែក​នៃ​ការ​ធ្វើ​សេចក្ដី​សម្រេច​ចិត្ត​របស់​ធនាគារ​យើង​ក្នុង​ការ​វិនិយោគ​នេះ»។

ABA មាន​ទ្រព្យ​សកម្ម ៣៩១ លាន​ដុល្លារ​គិត​មក​ត្រឹម​ថ្ងៃ ទី៣០ ខែ​មិថុនា ហើយ​បច្ចុប្បន្ន​ធនាគារ​នេះ​មាន​សាខា ២០ ទូទាំង​ប្រទេស​ហើយ​គ្រោង​បើក​សាខា ៥ បន្ថែម​ទៀត​នៅ​ដំណាច់ ឆ្នាំ​២០១៤៕

អត្ថបទគួរចាប់អារម្មណ៍