.jpg)
ភ្នំពេញៈ Acclime ដែលជាក្រុមហ៊ុនផ្ដល់សេវាកម្មសាជីវកម្មដ៏ធំនៅអាស៊ី បានប្រកាសពីការបញ្ចប់រួចរាល់លើការទិញភាគហ៊ុនរបស់ក្រុមហ៊ុន BSE Accounting Co.,Ltd (BSE) នៅក្នុងប្រទេសកម្ពុជា ខណៈក្រុមហ៊ុននេះគ្រោងនឹងផ្លាស់ប្តូរឈ្មោះក្នុងពេលឆាប់ៗ ដើម្បីប្រតិបត្តិការក្នុងនាមជាក្រុមហ៊ុន Acclime Cambodia។ នេះបើតាមសេចក្តីប្រកាសព័ត៌មានកាលពីថ្ងៃអង្គារ។
សេចក្ដីប្រកាសព័ត៌មានបានឲ្យដឹងថា ការទិញភាគហ៊ុនចុងក្រោយនេះបានធ្វើឲ្យ Acclime មានវត្តមានដ៏រឹងមាំនៃសិទ្ធិអាជីវកម្មនៅក្នុងប្រទេសចំនួន ៨ នៅអាស៊ី រួមមាន កម្ពុជា សិង្ហបុរី ចិន ហុងកុង ឥណ្ឌូនេស៊ី ថៃ ម៉ាឡេស៊ី និងវៀតណាម ដោយមានបុគ្គលិកជំនាញប្រហែល ៣០០ នាក់។
ក្រុមហ៊ុនបានឲ្យដឹងថា៖ «ការទិញភាគហ៊ុននេះ គឺដើម្បីពង្រីកសមត្ថភាពរបស់ក្រុមហ៊ុន Acclime នៅកម្ពុជា។ ក្នុងនាមជាក្រុមហ៊ុនពិគ្រោះ និងប្រឹក្សាយោបល់ BSE បម្រើអតិថិជនក្នុងស្រុក និងអន្តរជាតិនៅក្នុងវិស័យជាច្រើនដូចជា ផលិតកម្ម សណ្ឋាគារ និងភោជនីយដ្ឋាន ការនាំចូល នាំចេញ និងលក់រាយ»។
សេចក្តីប្រកាសព័ត៌មានបន្តថា ក្រុមហ៊ុននេះមានសេវាកម្មជាច្រើនដូចជា គ្រប់គ្រងអាជីវកម្ម ការប្រឹក្សាយោបល់ ធនធានមនុស្ស ការធ្វើផែនការពន្ធ គណនេយ្យ និងការចុះបញ្ជីគណនេយ្យជាដើម។
លោក សាន រិទ្ធី នាយកគ្រប់គ្រងក្រុមហ៊ុន BSE បានឲ្យដឹងថា៖ «យើងមានក្តីរីករាយដែលធ្វើជាផ្នែកមួយនៃបណ្ដាញក្នុងតំបន់ និងទន្ទឹងរង់ចាំការធ្វើសមាហរណកម្មស្ថិតនៅក្រោមយីហោ Acclime។ លោកថ្លែងថា៖ «វាមិនគ្រាន់តែអាចឲ្យក្រុមរបស់យើងទទួលបានជំនាញ និងធនធាននៃបណ្ដាញក្នុងតំបន់ដែលបង្កើតឡើងយ៉ាងល្អប៉ុណ្ណោះទេ ប៉ុន្តែក៏នឹងផ្ដល់អត្ថប្រយោជន៍ដល់អតិថិជនរបស់យើងដែលចង់បានស្ដង់ដាខ្ពស់ដូចគ្នានៃសេវាជំនាញនៅក្នុងទីផ្សារអាស៊ានផងដែរ»។
លោក Martin Crawford សហស្ថាបនិក និងជាអគ្គនាយកក្រុមហ៊ុន Acclime បានឲ្យដឹងថា នេះជាព្រឹត្តិការណ៍ដ៏សំខាន់សម្រាប់ក្រុមហ៊ុន Acclime ក្នុងការបង្ហាញវត្តមាននៅកម្ពុជា ដែលជាទីផ្សាររីកចម្រើនរហ័សគួរឲ្យភ្ញាក់ផ្អើលបំផុតមួយនៅតំបន់អាស៊ី។
លោកនិយាយថា៖ «ប្រទេសនេះមានគោលនយោបាយវិនិយោគបរទេស និងច្បាប់វិនិយោគថ្មី ដែលពិតណាស់ប្រទេសនេះនឹងទាក់ទាញការវិនិយោផ្ទាល់បរទេសកាន់តែច្រើន»។
លោកបញ្ជាក់ថា៖ «ការមានវត្តមានក្នុងទីផ្សាររីកចម្រើននេះនឹងមិនគ្រាន់តែពង្រឹងសមត្ថភាពរបស់យើងក្នុងការជួយអតិថិជនស្វែងរកបទប្បញ្ញត្តិដែលស្មុគស្មាញប៉ុណ្ណោះទេ ប៉ុន្តែថែមទាំងជួយគាំទ្រអតិថិជននៅប្រទេសកម្ពុជាដែលចង់ពង្រីកអាជីវកម្មរបស់ខ្លួននៅក្នុងតំបន់ផងដែរ»៕LA
