ភ្នំពេញៈ និយតករមូលបត្រកម្ពុជា (SERC) ដែលជានិយតករវ័យក្មេងនៅតំបន់អាស៊ានរួមជាមួយនិយតករទីផ្សារមូលធនអាស៊ាន ៩ ផ្សេងទៀតបានអនុម័តផែនការសកម្មភាពរយៈពេល ៥ ឆ្នាំ (ឆ្នាំ ២០២១-២០២៥) សម្រាប់ការអភិវឌ្ឍវិស័យនេះដោយធ្វើយ៉ាងណាកៀរគរលំហូរមូលធនសម្រាប់យកទៅអភិវឌ្ឍសេដ្ឋកិច្ច។
ផែនការសកម្មភាពនេះត្រូវបានអនុម័តកាលពីថ្ងៃទី ១៥ ខែមីនា ក្នុងអំឡុងកិច្ចប្រជុំវេទិកាទីផ្សារមូលធនអាស៊ាន (ACMF) លើកទី ៣៤ ដែលធ្វើឡើងតាមរយៈប្រព័ន្ធវីដេអូ និងមាននិយតករប្រទេសប្រ៊ុយណេជាម្ចាស់ផ្ទះ។ ផែនការសកម្មភាពនេះរៀបចំឡើងតាមផែនការសកម្មភាព ACMF ឆ្នាំ ២០១៦-២០២០ ហើយត្រូវបានអភិវឌ្ឍដោយការចូលរួមមតិពីអ្នកចូលរួមក្នុងទីផ្សារមូលធន និងអ្នកពាក់ព័ន្ធផ្សេងទៀត ដើម្បីធានាថា ផែនការសកម្មភាពនេះមានលក្ខណៈបរិយាប័ន្ន និងមានភាពពាក់ព័ន្ធនឹងភាពប្រក្រតីថ្មី។ ផែនការសកម្មភាពនេះផងដែរនឹងត្រូវដាក់ជូនរដ្ឋមន្ដ្រីហិរញ្ញវត្ថុអាស៊ាននៅក្នុងកិច្ចប្រជុំរដ្ឋមន្ដ្រីអាស៊ានដែលនឹងត្រូវធ្វើឡើងនៅចុងខែមីនា ឆ្នាំ ២០២១ ដើម្បីអនុម័តចុងក្រោយ។
ដើម្បីសម្រេចបានចក្ខុវិស័យ ACMF ២០២៥ ផែនការសកម្មភាពនេះបានដាក់ចេញទិសដៅយុទ្ធសាស្ដ្រចំនួន ៣ ដូចជា ជំរុញកំណើន និងការស្ទុះងើបឡើងវិញប្រកបដោយនិរន្តរភាព លើកកម្ពស់ និងទ្រទ្រង់បរិយាប័ន្ន និងពង្រឹង ការរក្សាសណ្ដាប់ធ្នាប់ និងភាពធន់។ នេះបើតាមសេចក្ដីប្រកាសព័ត៌មានដែលបានចេញផ្សាយបន្ទាប់ពីកិច្ចប្រជុំ។
សេចក្ដីប្រកាសព័ត៌មាននេះបានបន្តថា មានអាទិភាពដែលគាំទ្រគោលដៅយុទ្ធសាស្ដ្រ ៥ ចំណុច នឹងលើកកម្ពស់កម្រិតតម្លាភាព និងឯកសារផ្ដល់ព័ត៌មានបន្តធ្វើសុខដុមនីយកម្មបទប្បញ្ញត្តិ បង្កើនការកសាងសមត្ថភាព ពង្រីកការប្រាស្រ័យទាក់ទង និងការយល់ដឹង និងពង្រឹងកិច្ចសហប្រតិបត្តិការ និងការសម្របសម្រួល។
លោក ស៊ូ សុជាតិ ប្រតិភូរដ្ឋាភិបាលកម្ពុជាទទួលបន្ទុកអគ្គនាយកនៃនិយតករមូលបត្រកម្ពុជាបានប្រាប់ ភ្នំពេញ ប៉ុស្ដិ៍ កាលពីថ្ងៃទី ១៦ ខែមីនាថា ACMF ផ្ដល់ឱកាសដ៏ធំសម្រាប់ប្រទេសកម្ពុជា ដែលជានិយតករវ័យក្មេងនៅក្នុងប្លុកនេះ ដើម្បីរៀនសូត្រពីនិយតករផ្សេងទៀត និងក៏មានឱកាសក្នុងការផ្លាស់ប្តូរចំណេះដឹងព្រមទាំងក្នុងការបណ្ដុះបណ្ដាលអ្នកជំនាញក្នុងស្រុកផងដែរ។
លោកថ្លែងថា៖ «យើងបានអនុម័តរួមគ្នាលើផែនការសកម្មភាពឆ្នាំ ២០២១-២០២៥ ហើយយើងនឹងធ្វើជាប្រធាននៃវេទិកា ACMF នេះនៅឆ្នាំក្រោយ។ វេទិកានេះផ្ដល់ដល់ពួកយើងនូវឱកាស និងបទពិសោធពីដៃគូអាស៊ានរបស់យើងក្នុងការចែករំលែកចំណេះដឹងអំពីទីផ្សារមូលធន ហើយយើងក៏អាចមានលទ្ធភាពក្នុងការបណ្ដុះបណ្ដាលមន្ដ្រីជំនាញរបស់យើងផងដែរ»។
លោក Jong Weon Ha អនុប្រធានក្រុមហ៊ុនផ្សារមូលបត្រកម្ពុជា (CSX) ដែលបង្កើតឡើងកាលពីឆ្នាំ ២០១២ ឱ្យដឹងថា ការអនុម័តផែនការសកម្មភាព ACMF ២០២១-២០២៥ មានសារៈសំខាន់ខ្លាំង ដោយសារតែវាបញ្ជាក់ពីទិសដៅរួម និងជាផែនការយុទ្ធសាស្ដ្រដ៏សំខាន់សម្រាប់បណ្ដាប្រទេសជាសមាជិកអាស៊ានក្នុងការអភិវឌ្ឍទីផ្សារមូលធនប្រកបដោយនិរន្តរភាព។
លោកលើកឡើងថា៖ «ACMF ក៏មានតួនាទីដ៏សំខាន់ផ្សេងទៀតក្នុងការធ្វើសមាហរណកម្មទីផ្សារមូលធនអាស៊ានតាមរយៈគំនិតផ្តួចផ្ដើមផ្សេងៗ ដូចជា ការបង្ហាញពីទ្រព្យសកម្មអាស៊ាន ពាណិជ្ជកម្មឆ្លងកាត់ព្រំដែន វេទិកាពាណិជ្ជកម្មអនឡាញអាស៊ាន និងសុខុដុមនីយកម្មបទប្បញ្ញត្តិជាដើម»។
យោងតាមសេចក្ដីប្រកាសព័ត៌មាននេះ និយតករអាស៊ានទាំងអស់ប្ដេជ្ញាថា នឹងបន្តកត់សម្គាល់ពីការបន្តជំរុញនៃគំនិតផ្តួចផ្ដើមហិរញ្ញវត្ថុប្រកបដោយនិរន្តរភាពរបស់ ACMF ដូចជា ស្ដង់ដាសញ្ញាបណ្ណបៃតងអាស៊ាន ស្ដង់ដាសញ្ញាបណ្ណលក្ខណៈសង្គម និងស្ដង់ដាសញ្ញាបណ្ណនិរន្តរភាពអាស៊ាន។ ចាប់តាំងពីឆ្នាំ ២០១៧ រហូតដល់ដំណាច់ឆ្នាំ ២០២០ សញ្ញាបណ្ណសរុបមានចំនួន ៨,៣៥ ពាន់លានដុល្លារដែលមានស្លាកយោងតាមស្ដង់ដាទាំងនេះត្រូវបានបោះផ្សាយ។
លោក ស៊ូ សុជាតិ ឱ្យដឹងថា កម្ពុជានៅតែមានបញ្ហាប្រឈមមួយចំនួនក្នុងការអភិវឌ្ឍទីផ្សាររបស់ខ្លួនស្របជាមួយនឹងក្របខ័ណ្ឌតំបន់។
លោកបានថ្លែងថា៖ «យើងនៅមានការប្រឈមនឹងបញ្ហាមួយចំនួន ឧទាហរណ៍ ការចេញផ្សាយសញ្ញាបណ្ណឆ្លងកាត់ព្រំដែន ដែលយើងមិនអាចធ្វើវាបានទេ ដោយសារតែភាគច្រើនយើងផ្ដោតការយកចិត្តទុកដាក់លើទីផ្សារក្នុងស្រុកជាមុន ហើយទី ២ ការចេញផ្សាយសញ្ញាបណ្ណបៃតង ទោះបីយើងបានចេញសញ្ញាបណ្ណរួចហើយក៏ដោយ ប៉ុន្តែយើងមិនបានចេញសញ្ញាបណ្ណបៃតងនោះទេ ប៉ុន្តែវាស្ថិតនៅក្នុងផែនការរបស់យើង»។ លោកបន្ថែមទៀតថា៖ «ទោះបីជាផែនការសកម្មភាពមួយចំនួនដែលយើងមិនបានអនុវត្តក៏ដោយ ក៏យើងនឹងធ្វើវាក្នុងរយៈពេលជាច្រើនឆ្នាំខាងមុខ»។
ទិន្នន័យ CSX បង្ហាញថា បច្ចុប្បន្នមានក្រុមហ៊ុន ១៣ ចុះបញ្ជីនៅលើផ្សារហ៊ុន ក្នុងនោះក្រុមហ៊ុន ៧ ចុះបញ្ជីភាគហ៊ុន និងក្រុមហ៊ុន ៦ ចុះបញ្ជីសញ្ញាបណ្ណសាជីវកម្ម៕ LA