The Phnom Penh Post Search

Search form




Logo of Phnom Penh Post newspaper Phnom Penh Post - ACU ចេញ​សៀវភៅ​ប្រឆាំង​ពុករលួយ​ដល់​សហគ្រិន

ACU ចេញ​សៀវភៅ​ប្រឆាំង​ពុករលួយ​ដល់​សហគ្រិន

អ្នក​រត់​ស៊ីក្លូ​កំពុង​ជិះ​កាត់​មុខ​ស្ថាប័ន​ប្រឆាំង​អំពើ​ពុករលួយ​នៅ​តាម​បណ្តោយ​មហា​វិថី​ព្រះ​នរោត្តម​កន្លង​មក។
អ្នក​រត់​ស៊ីក្លូ​កំពុង​ជិះ​កាត់​មុខ​ស្ថាប័ន​ប្រឆាំង​អំពើ​ពុករលួយ​នៅ​តាម​បណ្តោយ​មហា​វិថី​ព្រះ​នរោត្តម​កន្លង​មក។ ហេង ជីវ័ន

ACU ចេញ​សៀវភៅ​ប្រឆាំង​ពុករលួយ​ដល់​សហគ្រិន

ភ្នំពេញៈ អង្គភាព​ប្រឆាំង​អំពើ​ពុករលួយ ​(ACU) ​បាន​ដាក់​ឲ្យ​ប្រើប្រាស់​ជា​ផ្លូវ​ការ​នូវ​សៀវភៅ​ណែនាំ​ស្តី​អំពី​កម្មវិធី​ ប្រឆាំង​អំពើ​ពុករលួយ ​សម្រាប់​ធុរ​កិច្ច​នៅ​កម្ពុជា​ដើម្បី​លុប​បំបាត់​គ្រប់​ទម្រង់​អំពើ​ពុក​រលួយ​ និង​ការ​ផ្ដល់​ប្រាក់​លើក​ទឹក​ចិត្ត​ក្រៅ​ផ្លូវ​ការ​រវាង​វិស័យ​សាធារណៈ ​និង​វិស័យ​ឯកជន​ និង​ដើម្បី​ធានា​ឲ្យ​មាន​បរិយា​កាស​ពាណិជ្ជ​កម្ម​ប្រកួត​ប្រជែង​ដោយ​សេរី ​និង​យុត្តិ​ធម៌​នៅ​ក្នុង​កម្ពុជា។

សៀវ​ភៅ​ណែនាំ​ស្តី​ពី​កម្មវិធី​ប្រឆាំង​អំពើ​ពុក​រលួយ​សម្រាប់​ធុរកិច្ច​នៅ​កម្ពុជា​ដែល​ចេញ​ផ្សាយ​ជា​ផ្លូវ​ការណ៍​នេះ​បាន​ឆ្លង​កាត់​ការ​​ពិ​ភាក្សា​ជា​មួយ​វិស័យ​ឯក​ជន​​អស់​រយៈ​ពេល​ជាង​មួយ​ឆ្នាំ​រួច​មកហើយ​។​ សៀវភៅ​នេះ​នឹង​ត្រូវ​បាន​ ចែក​ជូន​ដល់​ ក្រុ​មហ៊ុន​អាជីវកម្ម​កម្ពុជា​ក្នុង​ពេល​ឆាប់​ៗ​នេះ​​។ ​នេះ​បើ​តាម​សេចក្តី​ប្រកាស​របស់​អង្គ​ភាព​ប្រឆាំង​អំពើ​ពុករលួយ​កាល​ពី​ថ្ងៃ​អង្គារ ​សប្តាហ៍​មុន​។

សៀវភៅ​ដែល​មាន​កម្រាស់​ជិត​៨០​ទំព័រ​នេះ ត្រូវ​បាន​បែង​ចែក​ជា​បី​ផ្នែក​ ដែល​រៀប​រាប់​អំពី​អ្វី​ទៅ​ជា​អំពើ​ពុក​រលួយ​? ភាព​ប្រឈម​របស់​វិស័យ​ឯកជន​ក្នុង​ការ​ពាក់​ព័ន្ធ​នឹង​ការ​ប្រព្រឹត្ត​អំពើ​ពុក​រលួយ​ ការ​កសាង​ប្រព័ន្ធ​ប្រឆាំង​អំពើ​ពុក​រលួយ​ផ្ទៃ​ក្នុង​សម្រាប់​វិស័យ​ឯកជន​ និង​ទោស​ទណ្ឌ ​ប្រសិន​បើ​រក​ឃើញ​ថា​មាន​ជាប់​ពាក់​ព័ន្ធ​នឹង​អំពើ​ពុក​រលួយ​។

លោក ​តែ​ តាំងប៉ ប្រធាន​សម្ព័ន្ធ​សមាគម​សហគ្រាស​ខ្នាត​តូច ​និង​មធ្យម​កម្ពុជា ​(FASMEC​) បាន​និយាយ​កាល​ពី​ម្សិលមិញ​ថា៖​«​សៀវភៅ​ណែនាំ​នេះ​បាន​ផ្តល់​នូវ​ព័ត៌​មាន​គ្រប់គ្រាន់​អំពី​អំពើ​ពុករលួយ ​តែ​វា​មិន​បាន​និយាយ​ពី​ថា​តើ​ក្រុមហ៊ុន​អាច​ធ្វើ​ការ​ការ​ពារ​ខ្លួន​ពី​ការ​ជាប់​ពាក់​ព័ន្ធ​នឹង​អំពើ​ពុក​រលួយ​នោះ​ទេ។ ​ឧទាហរណ៍​យន្តការ​បទប្បញ្ញត្តិ​ក្នុង​ការ​ការពារ​អាជីវកម្ម​នៅ​ពេល​ដែល​ប្រឈម​មុខ​ជា​មួយ​ក្រុម​មន្រ្តី​នៅ​ពេល​ដែល​ស្វែង​រក​សេវា​សាធារណៈ»។

លោក​បន្ថែម​ថា​ រដ្ឋាភិបាល​គួរ​តែ​បង្ក​ភាព​ងាយ​ស្រួល​ក្នុង​ការ​កាត់​បន្ថយ​ការិយាធិបតេយ្យ និង​ក្នុង​ស្ថាប័ន​សាធារណៈ​សម្រាប់​ការ​ចុះ​បញ្ជី​អាជីវកម្ម ឬ​នីតិវិធី​ ឧទាហរណ៍​ការ​នាំ​ចេញ​ខ្នាត​តូច​ និង​មធ្យម​អាច​ដំណើរ​ការ​បាន​ដូច្នេះ​ធុរជន​នឹង​អាច​ដឹង​ពី​ដំណើរ​ការ​ដែល​ពួក​គេ​ត្រូវ​ឆ្លង​កាត់ ដោយ​មិន​មាន​ការ​បង់​ប្រាក់​សំណូក​សម្រាប់​សេវា​កម្ម​បន្ថែម​ទៀត​ដែល​ពួក​គេ​មិន​បាន​ដឹង។

សមត្ថ​ភាព​សហគ្រាស​ធុន​តូច ​និង​មធ្យម​នៅ​កម្ពុជា​នៅ​មាន​កម្រិត​នៅ​ឡើយ​ពាក់​ព័ន្ធ​នឹង​ចំណេះ​ដឹង ​និង​បទប្បញ្ញាតិ្ត​ផ្សេងៗ​ដែល​ទាក់​ទង​នឹង​ការ​យក​ពន្ធ​ និង​ប្រព័ន្ធ​គណនេយ្យ​ ដែល​ធ្វើ​ឲ្យ​ពួក​គេ​ងាយ​រងគ្រោះ​ ពី​ការ​ទារ​សំណូក​ពី​មន្ត្រី​ផ្តល់​សេវា​សាធារណៈ​។ នេះ​បើ​យោង​តាម​ការ​ឲ្យ​ដឹង​របស់​លោក ​តាំង​ប៉។

លោក​ ព្រាប​ កុល ​នាយក​ប្រតិបត្តិ​នៃ​អង្គការ​តម្លាភាព​កម្ពុជា ស្វាគមន៍​ចំពោះ​ការ​ចេញ​ផ្សាយ​សៀវភៅ​ណែនាំ​សម្រាប់​វិស័យ​ឯកជន​នេះ​។ ​

លោក​ថ្លែង​ថា៖ «​អាជីវកម្ម​តូច​ និង​មធ្យម​គួរ​តែ​ចាប់​ផ្តើម​ធ្វើ​អាជីវកម្ម​ប្រកប​ដោយ​តម្លាភាព​និង​ការ​សម្រប​ខ្លួន​ទៅ​ការ​ប្រកប​អាជីវកម្ម​ស្អាត​ស្អំ​ចាប់​ពី​ពេល​នេះ​តទៅ ​ខណៈ​កម្ពុជា​នឹង​ចូលរួម​ក្នុង​ការ​ធ្វើ​សមាហរណកម្ម​សេដ្ឋ​កិច្ច​អាស៊ាន​ឆាប់ៗ​ខាង​មុខ​នេះ​»។

លោក​បន្ថែម​ថា ​ធុរជន​មិន​អាច​អនុវត្ត​អាជីវកម្ម​បែប​ប្រពៃណី​បន្ត​ទៀត​នោះ​ទេ ​ហើយ​គួរ​តែ​ចាប់​ផ្តើម​រៀន​សូត្រ​អំពី​បទប្បញ្ញត្តិ និង​ស្ដង់ដារ​ពី​ពេល​នេះ​តទៅ​។

លោក​បញ្ជាក់​ថា៖ «​សៀវភៅ​ណែនាំ​នេះ​គឺជា​ជំហាន​វិជ្ជមាន​មួយ​ក្នុង​ការ​កែ​លម្អ​វិស័យ​សាធារណៈ​និង​ឯកជន​ទាំង​ពីរ​នៅ​លើ​តម្លាភាព​។ វា​ផ្ដល់​នូវ​ព័ត៌មាន​លម្អិត​គ្រប់​គ្រាន់​នៅ​លើ​បទប្បញ្ញត្តិ និង​យន្តការ​សម្រាប់​អាជីវកម្ម​ដើម្បី​ការពារ​ខ្លួន​ពី​អំពើ​ពុករលួយ​។ វា​ជា​ឯកសារ​មាន​ប្រយោជន៍​ ប៉ុន្តែ​វា​ត្រូវ​ការ​ផ្សព្វ​ផ្សាយ​ឲ្យ​ទូលំ​ទូលាយ​ដល់​អ្នក​ប្រកប​អាជីវកម្ម​នៅ​កម្ពុជា ខណៈ​ប្រជាជន​កម្ពុជា​មិន​ចូល​ចិត្ត​អាន​ច្រើន ​ដូច្នេះ​បើ​អាច​ផលិត​ជាស្ពត​ទូរទស្សន៍​ឬ​វិទ្យុ ​នឹង​ជួយ​ផ្សព្វផ្សាយ​ព័ត៌មាន​នេះ បាន​ឆាប់​រហ័ស និង​ទូលំ​ទូលាយ»។

អំ​ពើ​ពុក​រលួយ​ជា​បញ្ហា​ប្រឈម​របស់​កម្ពុជា​ក្នុង​ការ​ទាក់​ទាញ​វិនិយោគិន​ស្អាត​ស្អំ​មក​កម្ពុជា។​

លោក ​ស្រី​ចន្ធី ​អ្នក​វិភាគ​សេដ្ឋកិច្ច​ឯករាជ្យ​កាល​ពី​ខែ​សីហា​កន្លង​ទៅ​បាន​ស្វាគមន៍​ដល់​គំនិត​ផ្តួច​ផ្ដើម​នេះ​ដោយ​លើក​ឡើង​ថា វា​នឹង​ទាក់​ទាញ​វិនិយោគិន​កាន់​តែ​ច្រើន​មក​កម្ពុជា​ បើ​កម្ពុជា អាច​បង្ហាញ​ថា ជា​ប្រទេស​ដែល​គ្មាន​អំពើ​ពុករលួយ​នោះ។

លោក​ថ្លែង​ថា៖ «​អំពើ​ពុករលួយ​ធ្វើ​ឲ្យ​វិនិយោគិន​មាន​ការ​ស្ទាក់​ស្ទើរ​ចូល​មក​ប្រទេស​កម្ពុជា។ បញ្ហា​នេះ [ការ​ប្រឆាំង​អំពើ​ពុករលួយ] នឹង​ជួយ​លើក​ទឹក​ចិត្ត​ពួក​គេ​ឲ្យ​ចូល​មក ​កម្ពុជា​»។

ទោះ​ជា​យ៉ាង​ណា​ លោក បញ្ជាក់​ថា វា​ទាមទារ​ការ​អនុវត្ត​និង​ត្រួត​ពិនិត្យ​តឹងរ៉ឹង​ដើម្បី​ទទួល​បាន​ប្រសិទ្ធ​ភាព​៕

អត្ថបទគួរចាប់អារម្មណ៍

  • អាមេរិក​ផ្តល់​ជំនួយ ​៤២ ​ម៉ឺន​ដុល្លារ​ទៀត ​ដើម្បី​ស្រាវជ្រាវ​សំណល់​គ្រាប់​បែក​ចង្កោម

    ភ្នំពេញៈ រដ្ឋាភិបាល​អាមេរិក​បាន​សម្រេច​ផ្ដល់​ជំនួយ​ជាង​ ៤២​ ម៉ឺន​ដុល្លារ​បន្ថែម​ទៀត ដល់​មជ្ឈមណ្ឌល​កំចាត់​មីន​កម្ពុជា ហៅ​កាត់​ថា CMAC ដើម្បី​ស្រាវជ្រាវ​​សំណល់​គ្រាប់​បែក​ចង្កោម​ដែល​

  • ប្រាក់ចំណេញ​សុទ្ធ Qantas ធ្លាក់ ៦,៥ ​ភាគរយ

    ក្រុងស៊ីដនីៈ ក្រុមហ៊ុន​អាកាសចរណ៍ Qantas Airways កាលពី​ថ្ងៃ​ព្រហស្បតិ៍​បាន​ចេញ​ផ្សាយ​ការធ្លាក់ចុះ​ប្រាក់​ចំណេញ​សុទ្ធ​ប្រចាំ​ឆ្នាំ ៦,៥ ភាគរយ ដោយសារ​ការធ្លាក់ចុះ​ប្រាក់​ចំណេញ​ក្នុង​គ្រា​ដែល​ប្រេង​ឆៅ​មាន​តម្លៃ​កាន់តែ​ខ្ពស់ និង​ការធ្លាក់​ថ្លៃ​ប្រាក់​ដុល្លារ​អូស្ត្រាលី​កាន់តែ​ខ្លាំង​។

  • តោខៀវ​ឲ្យ Roma ខ្ចី​ជើង​ខ្សែការពារ Zappacosta

    ក្រុងមីឡានៈ ក្លិប Roma បានប្រកាស​កាលពី​ថ្ងៃ​ពុធ​ថា ខ្សែការពារ Davide Zappacosta នៅ​ក្លិប Chelsea បាន​ចូលរួម​ក្លិប Roma ក្នុង​លក្ខខណ្ឌ​ខ្ចី​ជើង ៦ ​ខែ ប៉ុន្តែ​អាច​បន្ត​រហូតដល់​ចុងរដូវកាល​នេះ​ក៏បាន​ដែរ​។ ​

  • កូរ៉េ​ខាងជើង​មិន​ចរចា​ពី​បញ្ហា​នុយក្លេអ៊ែរ​ទេ បើសិន​ US ​នៅតែ​បន្ត​វិធានការ​យោធា​បង្ក​អារិភាព​នោះ

    ក្រុងសេអ៊ូលៈ កូរ៉េ​ខាងជើង​បាន​ថ្លែង​កាលពី​ថ្ងៃ​ព្រហស្បតិ៍​ថា​ខ្លួន​ «​មិន​ចាប់អារម្មណ៍​» ​នៅក្នុង​ការចរចា​នោះទេ លុះណា​តែ​ក្រុង​វ៉ាស៊ីនតោន​ឈប់​ «​វិធានការ​យោធា​បង្ក​អរិភាព​កាន់តែ​ខ្លាំង​ឡើង​ជាមួយ​ខ្លួន​នោះ​» ខណៈ​ប្រេសិត​ពិសេស​ជាន់ខ្ពស់​អាមេរិក​ម្នាក់​បាន​ទស្សនកិច្ច​ទៅកាន់​ក្រុង​សេអ៊ូល​ដោយ​ផ្តោត​ទៅ​លើ​ការធ្វើឲ្យ​កិច្ចចរចា​ពី​បញ្ហា​នុយក្លេអ៊ែរ​ជាមួយ​ក្រុង​ព្យុងយ៉ាង ដំណើរការ​ឡើងវិញ​។