.jpg)
កម្មករកំពុងធ្វើការនៅក្នុងរោងចក្រកាត់ដេរនៅភ្នំពេញ។ បច្ចុប្បន្នកម្ពុជាជាប្រទេសប្រើកម្លាំងពលកម្មច្រើន ។ រូបថត ភ្នំពេញ ប៉ុស្តិ៍
ក្រុងម៉ានីលៈ ក្រុមអ្នកជំនាញមកពីធនាគារអភិវឌ្ឍន៍អាស៊ី (ADB) បានព្រមានអំពីការរំខានក្នុងទីផ្សារការងារ ដោយសារបច្ចេកវិទ្យាទំនើបក្នុងកិច្ចប្រជុំប្រចាំឆ្នាំរបស់ខ្លួននៅក្នុងទីក្រុងម៉ានីលកាលពីថ្ងៃព្រហស្បតិ៍ ទោះបីជាមន្ដ្រីធនាគារនេះបានកត់សម្គាល់ថា ប្រទេសកម្ពុជាមានកម្មវិធីជាច្រើនកំពុងដំណើរការ ដើម្បីជួយកាត់បន្ថយផលវិបាកអវិជ្ជមានមួយចំនួនក៏ដោយ។
លោកស្រី Elisabetta Gentile សេដ្ឋវិទូនៅ ADB បានថ្លែងថា បច្ចេកវិទ្យាទំនើប ដូចជាការធ្វើស្វ័យប្រវត្តិកម្មនឹងតម្រូវឲ្យមានកម្មករមានជំនាញថ្មី ដើម្បីអាចប្រកួតប្រជែងបាននៅពេលអនាគត។
លោកស្រីថ្លែងថា៖ «យើងត្រូវតែជួយ [កម្មករទាំងនោះ] សម្រាប់ការផ្លាស់ប្តូរនេះ ដើម្បីរួមចំណែកដល់កំណើនសេដ្ឋកិច្ចនៅក្នុងប្រទេសនេះ»។
រដ្ឋាភិបាលកម្ពុជាគាំទ្រយ៉ាងខ្លាំងដល់ការផ្លាស់ប្តូរបែបនេះ ទោះបីជាវានៅតែត្រូវបានមើលឃើញថា វិនិយោគដ៏សំខាន់តម្រូវឲ្យរក្សាកម្លាំងពលកម្មនៅពេលខាងមុខក៏ដោយ។
លោក ហេង សួរ អ្នកនាំពាក្យក្រសួងការងារបានថ្លែងថា៖ «វាពិតជាបញ្ហាប្រឈមមួយដែលយើងនឹងប្រឈមនៅទសវត្សរ៍ក្រោយ»។ លោកបន្តថា៖ «យើងត្រូវការការផ្លាស់ប្តូរពីការងារប្រើប្រាស់កម្លាំងពលកម្មច្រើនទៅជាឧស្សាហកម្មមានមូលដ្ឋានលើចំណេះដឹងកាន់តែច្រើន និងបណ្ដុះបណ្ដាលកម្លាំងពលកម្មរបស់យើង ដើម្បីជម្នះនឹងបញ្ហាប្រឈមនោះ»។
ADB បានស្នើគម្រោងជាច្រើននៅក្នុងប្រទេសកម្ពុជាដែលស្វែងរកការអភិវឌ្ឍកម្លាំងពលកម្មរបស់ប្រទេសនេះដែលរួមមានគម្រោងមានតម្លៃ ៦០ លានដុល្លារដែលផ្ដោតលើការអប់រំកម្មករជាមួយនឹងទិសដៅនៃការផ្លាស់ប្តូរសេដ្ឋកិច្ចរបស់ប្រទេសកម្ពុជាពីការងារមានមូលដ្ឋានលើកម្មករទៅជាការងារមានមូលដ្ឋានលើជំនាញត្រឹមឆ្នាំ ២០២៥។ ធនាគារនេះបានផ្ដល់មូលនិធិដល់កម្មវិធីបណ្ដុះបណ្ដាលបច្ចេកទេស និងវិជ្ជាជីវៈផងដែរ ព្រមទាំងការបង្កើនការអប់រំអនុវិទ្យាល័យក្នុងប្រទេសផងដែរ។
លោកស្រី Gentile ឲ្យដឹងថាប្រទេសកម្ពុជាមានពេលវេលាក្នុងការធ្វើការផ្លាស់ប្តូរបែបនោះ ប៉ុន្តែការរៀបចំការងារគួរតែត្រូវធ្វើនៅពេលនេះ។
លោកស្រីបានសរសេរនៅក្នុងអ៊ីមែលមួយថា៖ «យើងត្រូវតែចាប់ផ្ដើមការងារនៅថ្ងៃនេះ ដើម្បីបង្កើតជំនាញដែលកម្មករទាំងអស់នៅក្នុងអាស៊ីកំពុងអភិវឌ្ឍ នឹងត្រូវការចាប់យកឱកាសការផ្ដល់បច្ចេកវិទ្យាថ្មី»។ លោកស្រីបន្ថែមថា ជាមួយគ្នានេះដែររដ្ឋាភិបាលគួរតែជំរុញបណ្ដាញសុវត្ថិភាពសង្គមសម្រាប់កម្មករ។
លោកស្រីបន្តថា៖ «រដ្ឋាភិបាលក្នុងប្រទេសអាស៊ីកំពុងអភិវឌ្ឍន៍គួរតែធានាឲ្យប្រាកដថា កម្មករត្រូវបានការពារដោយសារវិបត្តិបចេ្ចកវិទ្យាថ្មី និងអាចចាប់យកឱកាសថ្មីដែលពួកគេផ្ដល់ជូន»៕LA
