ភ្នំពេញៈ លោកស្រី Sunniya Durrani-Jamal នាយកប្រចាំប្រទេស កម្ពុជា របស់ធនាគារអភិវឌ្ឍន៍អាស៊ី (ADB) បានឲ្យដឹងថា រដ្ឋាភិបាលកម្ពុជាអាចដកប្រើកញ្ចប់ថវិកាឆ្លើយតបកូវីដ ១៩ ពីក្នុងចំណោមទឹកប្រាក់ ៦,៥ ពាន់លានដុល្លារ ដើម្បីកំណើនសេដ្ឋកិច្ចរបស់ខ្លួនដែលកំពុងរងផលប៉ះពាល់ពីការរីករាលដាលកូវីដ ១៩។
លោកស្រី Durrani-Jamal បានឲ្យដឹងក្នុងចក្ខុវិស័យអភិវឌ្ឍន៍អាស៊ី (ADO) ឆ្នាំ ២០២០ ដែលចេញផ្សាយកាលពីថ្ងៃទី ៣ ខែមេសា ថា ការយកចិត្តទុកដាក់របស់រដ្ឋាភិបាលគួរតែផ្ដោតទៅលើការទប់ស្កាត់កូវីដ ១៩។ លោកស្រីត្រូវបានដកស្រង់សម្តីដោយលើកឡើងថា៖ «រដ្ឋាភិបាលអាចដកនូវកញ្ចប់ការឆ្លើយតបកូវីដ ១៩ ដែលមានទឹកប្រាក់ ៦,៥ ពាន់លានដុល្លារ ដែល ADB បានប្រកាសកាលពីថ្ងៃទី ១៨ ខែមីនា ដើម្បីឆ្លើយតបនឹងតម្រូវការភ្លាមៗរបស់ប្រទេសជាសមាជិករបស់ខ្លួន ដើម្បីជំរុញកំណើនសេដ្ឋកិច្ច និងផ្ដល់ការការពារសង្គមរបស់ពួកគេ»។
កាលពីដើមខែមីនាលោកនាយករដ្ឋមន្ដ្រី ហ៊ុន សែន បានឲ្យដឹងថា រដ្ឋាភិបាលបានលៃទុកប្រាក់ចន្លោះពី ៨០០ លានដុល្លារ ទៅ ២ ០០០ លានដុល្លារ ដើម្បីកាត់បន្ថយផលប៉ះពាល់សេដ្ឋកិច្ចពីការរីករាលដាលកូវីដ ១៩ ដោយក្នុងចំនួននោះ ៨០០ លានដុល្លារសម្រាប់ប្រើក្នុងអំឡុងពេល ៦ ខែ និងចំនួន ២ ០០០ លានដុល្លារ បើការរីករាលដាលបន្តអូសបន្លាយរយៈពេលយូរលើសពីនោះ។
កាលពីថ្ងៃទី ៣១ ខែមីនា រដ្ឋាភិបាលបានចេញកញ្ចប់លើកទឹកចិត្តជុំទី ២ តាមរយៈការផ្ដល់ការលើកលែងពន្ធអប្បបរមារយៈពេល ៣ ខែសម្រាប់វិស័យអាកាសចរណ៍ និងការលើកលែងពន្ធប្រចាំខែគ្រប់ប្រភេទទាំងអស់សម្រាប់ប្រតិបត្តិករទេសចរណ៍។ ការលើកលែងពន្ធ ១០ ភាគរយ អប្បបរមានេះអនុវត្តចាប់ពីខែមីនាដល់ខែឧសភា សម្រាប់ក្រុមហ៊ុនអាកាសចរណ៍ដែលប្រតិបត្តិការនៅកម្ពុជា។ រដ្ឋាភិបាលក៏បានបង្កើនយន្តការរួមចំណែកឧបត្ថម្ភ ២០ ភាគរយដល់កម្មករ និងបុគ្គលិកដែលប៉ះពាល់ដោយការផ្អាកប្រតិបត្តិការក្នុងវិស័យទេសចរណ៍ផងដែរ។
យោងតាម ADO ធនាគារ ADB ក៏បានទម្លាក់ការព្យាករសេដ្ឋកិច្ចសម្រាប់ប្រទេសកម្ពុជាមកនៅត្រឹម ២,៣ ភាគរយនៅឆ្នាំនេះ បន្ទាប់ពីកំណើនដ៏រឹងមាំក្នុងរង្វង់ ៧ ភាគរយ ក្នុងរយៈពេល ២ ទសវត្សរ៍ចុងក្រោយ។
ការព្យាកររបស់ ADB គឺមានកម្រិតទាបជាងការព្យាកររបស់ធនាគារពិភពលោកដែលបានចេញផ្សាយកាលពីថ្ងៃអង្គារសប្តាហ៍មុន ដោយបានព្យាករណ៍ថា កំណើនពិតប្រាកដរបស់ប្រទេស កម្ពុជា មានចំនួន ២,៥ ភាគរយ ក្នុងឆ្នាំ ២០២០ ប៉ុន្តែនឹងស្ទុះងើបឡើងវិញដល់ ៥,៩ ភាគរយ ក្នុងឆ្នាំ ២០២១ ស្ថិតក្រោមសេណារីយោគោល។
ធនាគារនេះបន្ថែមថា៖ «ការថមថយល្បឿនត្រូវបានរងផលប៉ះពាល់ជាចម្បងពីជំងឺកូវីដ ១៩ ដែលបណ្ដាលឲ្យមានការថមថយល្បឿនសេដ្ឋកិច្ចនៅក្នុងបណ្ដាប្រទេសអភិវឌ្ឍន៍សំខាន់ៗ និងសាធារណរដ្ឋប្រជាមានិតចិន (PRC) ព្រមទាំងការកាត់បន្ថយលទ្ធភាពទទួលបានការចូលទីផ្សារនាំចេញរបស់ប្រទេសនេះ»។
លោកស្រី Durrani-Jamal បានថ្លែងថា៖ «សេដ្ឋកិច្ចកម្ពុជាត្រូវបានរំពឹងថា នឹងស្ទុះងើបឡើងវិញដល់ ៥,៧ ភាគរយក្នុងឆ្នាំ ២០២១ ដែលសន្មតថា ការរីករាលដាលជំងឺកូវីដ១៩ នឹងត្រូវបញ្ចប់ ខណៈសកម្មភាពសេដ្ឋកិច្ចនឹងត្រឡប់មកធម្មតាឡើងវិញ»។
លោកស្រីបន្ថែមថា៖ «ដោយប្រឈមនឹងបញ្ហាដែលមិនធ្លាប់មានបង្កដោយកូវីដ១៩ រដ្ឋាភិបាលកម្ពុជាបានចាត់វិធានការត្រឹមត្រូវក្នុងការឆ្លើយតបនឹងវិបត្តិនេះដែលរួមទាំងការផ្ដល់ការគាំទ្រប្រាក់ឈ្នួលសម្រាប់កម្មកររោងចក្រកាត់ដេរ ការបន្ធូរបន្ថយពន្ធ និងឥណទានសម្រាប់ក្រុមហ៊ុន។ រដ្ឋាភិបាលក៏បានបង្កើតឱកាសសារពើពន្ធក្នុងការកាត់បន្ថយផលប៉ះពាល់សេដ្ឋកិច្ច ដោយសារតែវិបត្តិនេះ ជាពិសេសលើប្រជាជនដែលងាយទទួលរងផលប៉ះពាល់ខ្លាំង»។
យោងតាមរបាយការណ៍នេះ វិស័យសេវាកម្មត្រូវបានរំពឹងថានឹងធ្លាក់ចុះ ១,៧ ភាគរយ ក្នុងឆ្នាំ ២០២០ ខណៈកំណើនក្នុងវិស័យទេសចរណ៍ និងអចលនទ្រព្យក៏ធ្លាក់ចុះដែរ។ កំណើនឧស្សាហកម្មត្រូវព្យាករថានឹងធ្លាក់ចុះមកនៅ ៦,៥ ភាគរយ ជាមួយការបន្ថយល្បឿនការផលិតសម្លៀកបំពាក់សម្រាប់នាំចេញ និងកំណើនកាន់តែយឺតក្នុងវិស័យសំណង់។ អតិផរណារំពឹងថានឹងនៅតែទាបជាមធ្យម ២,១ ភាគរយ ក្នុងឆ្នាំ ២០២០ និងរក្សាការធ្លាក់ចុះក្នុងឆ្នាំ ២០២១ ខណៈដែលតម្លៃប្រេងឥន្ធនៈអន្តរជាតិនឹងនៅតែទាប៕LA