.jpg)
កម្មករកំពុងធ្វើការក្នុងរោងចក្រមួយកន្លែង នៅតំបន់សេដ្ឋកិច្ចពិសេសក្រុងព្រះសីហនុ។ ភ្នំពេញ ប៉ុសិ៍្ត
ភ្នំពេញៈ សេដ្ឋកិច្ចរបស់កម្ពុជានៅតែស្ថិតក្នុងកំណើនខ្លាំងនៅឆ្នាំនេះ ទោះបីជាកំណើននៃផលិតផលកសិកម្មទាបជាងការរំពឹងទុកក៏ដោយ។ នេះបើយោងតាមរបាយការណ៍ថ្មីមួយរបស់ធនាគារអភិវឌ្ឍន៍អាស៊ី (ADB) ដែលបានចេញផ្សាយកាលពីថ្ងៃពុធម្សិលមិញ។
ទោះបីយ៉ាងនេះក្តី ADB បានឲ្យដឹងថាកម្ពុជាចាំបាច់ត្រូវធ្វើពិពិធកម្ម ផលិតផលនាំចេញរបស់ខ្លួនក្រៅពីវិស័យដែលមានស្រាប់បច្ចុប្បន្ន។
នៅក្នុងការធ្វើបច្ចុប្បន្នភាពចក្ខុវិស័យអភិវឌ្ឍន៍អាស៊ី (ADO) ឆ្នាំ ២០១៩ ដែលជាការចេញផ្សាយសេដ្ឋកិច្ចប្រចាំឆ្នាំដ៏សំខាន់របស់ខ្លួន ធនាគារ ADB បានរក្សាការព្យាករកំណើនផលិតផលក្នុងស្រុកសរុប (GDP) របស់កម្ពុជាក្នុងអត្រា ៧ ភាគរយនៅឆ្នាំនេះ និង ៦,៨ ភាគរយ ក្នុងឆ្នាំ ២០២០។
លោកស្រី Sunniya Durrani-Jamal នាយកប្រចាំប្រទេសរបស់ធនាគារ ADB ទទួលបន្ទុកប្រទេសកម្ពុជាថ្លែងថា៖ «សេដ្ឋកិច្ចកម្ពុជាបន្តកើនឡើងក្នុងល្បឿនដ៏រឹងមាំដោយសារតែភាពខ្លាំងជាបន្តនៅក្នុងវិស័យទូទៅជាច្រើន ដូចជាវិស័យកាត់ដេរ ទេសចរណ៍ ពាណិជ្ជកម្ម និងសំណង់»។
ទោះបីយ៉ាងនេះក្តីលោកស្រីបន្តថា៖ «ជាមួយនឹងការកើនឡើងភាពមិនច្បាស់លាស់នៅក្នុងបរិយាកាសពាណិជ្ជកម្មពិភពលោក និងផលប៉ះពាល់លើសេវាជាច្រើនដូចជាទេសចរណ៍ កម្ពុជាត្រូវការបន្ទាន់នូវយុទ្ធសាស្ដ្រពិពិធកម្មដែលផ្ដោតការយកចិត្តទុកដាក់ទៅជាផលិតផលពិសេស និងផលិតផលតម្លៃ និងសេវាដែលមានតម្លៃខ្ពស់»។ លោកស្រីបន្តថានេះនឹងតម្រូវឲ្យមានការកាត់បន្ថយហានិភ័យដែលកើតឡើងរាប់ចាប់ពីការផ្ដល់កម្ចី ដល់វិស័យអចលនទ្រព្យដែលហក់ឡើងយ៉ាងខ្លាំង។
របាយការណ៍របស់ ADB ក៏បានកត់សម្គាល់ហានិភ័យចំពោះផលិតកម្មកសិកម្ម ដោយសារតែការប្រែប្រួលអាកាសធាតុផងដែរ។ របាយការណ៍បង្ហាញថា ភាពរាំងស្ងួតនៅឆមាសទី ១ ឆ្នាំនេះបានកាត់បន្ថយការផលិតដំណាំកសិកម្ម និងជលផលដែលនឹងកាត់បន្ថយកំណើនកសិកម្ម មកនៅត្រឹមប្រហែល ១,១ ភាគរយនៅឆ្នាំនេះ។
វិស័យឧស្សាហកម្មរបស់ប្រទេសកម្ពុជានៅតែមានកំណើនដ៏រឹងមាំ ដោយសារតែការកើនឡើងក្នុងឧស្សាហកម្មសម្លៀកបំពាក់ ស្បែកជើង និងទំនិញទាក់ទងនឹងការធ្វើដំណើរ ដែល ADB បានធ្វើការកែតម្រូវកំណើនក្នុងវិស័យនេះពី ១០,១ ភាគរយ នៅក្នុងការព្យាករកាលពីខែមេសារបស់ខ្លួនទៅ ១០,៦ ភាគរយ។ នេះបើយោងតាមរបាយការណ៍។
ទោះបីជាការនាំចេញទំនិញប្រើប្រាស់ និងការមកដល់ភ្ញៀវទេសចរកើនឡើងខ្លាំង ប៉ុន្តែកំណើននៃការនាំចូលលឿនជាងការរំពឹងទុកត្រូវគេរំពឹងថានឹងពង្រីកឱនភាពគណនីចរន្តរបស់ប្រទេសនេះ។ នេះបើយោងតាមរបាយការណ៍។
ADB បានឲ្យដឹងថាជាមួយនឹងតម្លៃប្រេងកាន់តែទាប និងការកើនឡើងបន្តិចបន្តួចនៃតម្លៃអាហារ អតិផរណា ត្រូវបានកម្រិតអត្រា ១,៤ ភាគរយធៀបនឹងរយៈពេលដូចគ្នាកាលពីឆ្នាំមុនគិតត្រឹមខែមិថុនា។ ADB រំពឹងថា អតិផរណានឹងមានចំនួន ២,២ ភាគរយជាមធ្យមសម្រាប់ឆ្នាំ ២០១៩៕LA
