ក្រុងម៉ានីលៈ ធនាគារអភិវឌ្ឍន៍អាស៊ី (ADB) បានឲ្យដឹងនៅក្នុងរបាយការណ៍មួយដែលត្រូវបានចេញផ្សាយកាលពីថ្ងៃពុធថា កំណើនសេដ្ឋកិច្ចចិនរំពឹងថា នឹងកើនឡើងដល់ ៦,៦ ភាគរយក្នុងឆ្នាំនេះ។
ក្នុងរបាយការណ៍ប្រចាំឆ្នាំរបស់ខ្លួនស្តីពីចក្ខុវិស័យអភិវឌ្ឍន៍តំបន់អាស៊ី (ADO) ឆ្នាំ ២០១៨ ធនាគារដែលមានមូលដ្ឋាននៅទីក្រុងម៉ានីលនេះបានឲ្យដឹងថា កំណើនសេដ្ឋកិច្ចចិនបានកើនឡើងដោយសារតម្រូវការខ្ពស់នៅក្នុងស្រុក និងនៅបរទេស។
ធនាគារ ADB បានបន្តឲ្យដឹងថា៖ «កំណើនសេដ្ឋកិច្ចចិនអាចនឹងកើនឡើងដល់ ៦,៦ ភាគរយនៅឆ្នាំ ២០១៨ និង ៦,៤ ភាគរយនៅឆ្នាំ ២០១៩ ដោយសារគោលនយោបាយសេដ្ឋកិច្ចបន្តដើរទៅមុខឆ្ពោះទៅរកស្ថិរភាពហិរញ្ញវត្ថុ និងមាគ៌ាកំណើនកាន់តែមាននិរន្តរភាព»។
យោងតាមរបាយការណ៍ការងាររបស់រដ្ឋាភិបាលចិនដែលត្រូវបានចេញផ្សាយកាលពីខែមីនាប្រទេសចិនបានកំណត់ទិសដៅកំណើនផលិតផលក្នុងស្រុកសរុបរបស់ខ្លួននៅអត្រាប្រមាណ ៦,៥ ភាគរយក្នុងឆ្នាំ ២០១៨ នេះ។
ធនាគារ ADB បានឲ្យដឹងថាវិស័យសេវាកម្មកំពុងបន្តជំរុញកំណើនសេដ្ឋកិច្ចរបស់ប្រទេសចិន ដោយវិស័យនេះបានកើនឡើង ៨ ភាគរយក្នុងឆ្នាំ ២០១៧។ ធនាគារនេះបានបន្តឲ្យដឹងទៀតថាតម្រូវការខ្ពស់នៅក្នុងស្រុក និងនៅបរទេសគួបផ្សំនឹងកំណែទម្រង់សេដ្ឋកិច្ចបានបង្កើតជាមូលដ្ឋានសម្រាប់កំណើនសេដ្ឋកិច្ចជាបន្ត និងស្ថិរភាពម៉ាក្រូសេដ្ឋកិច្ចនៅប្រទេសមហាអំណាចសេដ្ឋកិច្ចទី ២ នេះ។
ធនាគារ ADB បានឲ្យដឹងថា៖ «ភាពរីកចម្រើនជាបន្តលើការធ្វើកំណែទម្រង់នានាដូចជាការពង្រឹងបទប្បញ្ញត្តិ និងការគ្រប់គ្រងវិស័យហិរញ្ញវត្ថុ និងការដោះស្រាយបញ្ហាបំណុលនឹងបង្កើតបានជាមូលដ្ឋានមួយសម្រាប់ស្ថិរភាពម៉ាក្រូសេដ្ឋកិច្ចដ៏រឹងមាំ»។
ទន្ទឹមនឹងនោះដែរធនាគារ ADB បានឲ្យដឹងថាកំណើនសេដ្ឋកិច្ចក្នុងតំបន់អាស៊ីបូព៌ាបានកើនឡើង ០,៣ ភាគរយដល់ ៦,៣ ភាគរយក្នុងឆ្នាំ ២០១៧» ដោយសារតម្រូវការក្នុងស្រុក និងនៅបរទេសខ្ពស់បានជួយដំឡើងសេដ្ឋកិច្ចរបស់ប្រទេសនានានៅក្នុងអនុតំបន់នេះ»។
ធនាគារ ADB បានបន្តឲ្យដឹងទៀតថាប្រទេសផ្សេងទៀតនៅអនុតំបន់អាស៊ីបូព៌ានេះនឹងទទួលបានកំណើនសេដ្ឋកិច្ចកាន់តែទាបផងដែរ ភាគច្រើនដោយសារការថមថយសម្ទុះកំណើននាំចេញ។
ធនាគារនេះបានបន្តថាការវិវឌ្ឍទាំងនេះនឹងកាត់បន្ថយកំណើនសេដ្ឋកិច្ចតំបន់អាស៊ីបូព៌ាមកនៅត្រឹម ៦ ភាគរយក្នុងឆ្នាំ ២០១៨ និង ៥,៨ ភាគរយក្នុងឆ្នាំ ២០១៩»។
ធនាគារ ADB បានឲ្យដឹងថាអតិផរណាបានធ្លាក់ចុះនៅតំបន់អាស៊ីបូព៌ាកាលពីឆ្នាំមុនដោយបានឆ្លុះបញ្ចាំងឲ្យឃើញពីកំណើនសេដ្ឋកិច្ចទាបនៅប្រទេសចិន ជាទីដែលតម្លៃស្បៀងអាហារបានធ្លាក់ថ្លៃ៕ The People''s Daily/BP