.jpg)
ប្រជាពលរដ្ឋដែលមកទទួលសេវាហិរញ្ញវត្ថុពីគ្រឹះស្ថានមីក្រូហិរញ្ញវត្ថុមួយនាពេលកន្លងមក។ ហុង មិនា
ភ្នំពេញៈ ធនាគារអភិវឌ្ឍន៍អាស៊ី (ADB) បានអនុម័តកម្ចី ៤០ លានដុល្លារ ដើម្បីគាំទ្រអ្នកក្រីក្រ និងគ្រួសារនៅជនបទនៅកម្ពុជា ដើម្បីកែលម្អលទ្ធភាពទទួលបានហិរញ្ញវត្ថុ។ នេះបើតាមសេចក្ដីប្រកាសព័ត៌មានចេញផ្សាយកាលពីសប្ដាហ៍មុន។
កម្ចីនេះគឺសម្រាប់ដំណាក់កាលទី ២ នៃកម្មវិធីដែលកំពុងគាំទ្រកិច្ចខិតខំប្រឹងប្រែងរបស់រដ្ឋាភិបាល ដើម្បីអភិវឌ្ឍវិស័យហិរញ្ញវត្ថុប្រកបដោយប្រសិទ្ធភាព និងស្ថិរភាពដែលលើកកម្ពស់ភាពអាចទទួលបានហិរញ្ញវត្ថុគ្រប់ៗគ្នាឲ្យកាន់តែធំ និងការអភិវឌ្ឍប្រកបដោយស្ថិរភាព។
កម្មវិធីដំណាក់កាលទី ២ នេះនឹងផ្តោតលើលទ្ធភាពទទួលបានហិរញ្ញវត្ថុ ជាពិសេសសម្រាប់ប្រជាជនក្រីក្រ គ្រួសារនៅតាមជនបទ វិស័យកសិកម្ម និងសហគ្រាសធុនតូច និងមធ្យម។ នេះបើយោងតាមសេចក្ដីប្រកាសព័ត៌មាន។
លោកស្រី Benita Ainabe អ្នកជំនាញវិស័យហិរញ្ញវត្ថុទទួលបន្ទុកអាស៊ីអាគ្នេយ៍របស់ធនាគារ ADB បានឲ្យដឹងថាតាមរយៈគោលនយោបាយគាំទ្រនេះ វាកំពុងលើកកម្ពស់ស្ថិរភាពនៃវិស័យហិរញ្ញវត្ថុរបស់ប្រទេស កម្ពុជា និងការធ្វើឲ្យប្រសើរឡើងហេដ្ឋារចនាសម្ព័ន្ធហិរញ្ញវត្ថុ ដើម្បីគាំទ្រការដាក់ឲ្យប្រើប្រាស់សេវា និងផលិតផលហិរញ្ញវត្ថុថ្មីៗ។
លោកស្រីថ្លែងថា៖ «វិស័យហិរញ្ញវត្ថុប្រកបដោយស្ថិរភាព និងទំនើបមានសារៈសំខាន់សម្រាប់ប្រទេសកំពុងអភិវឌ្ឍន៍ដូចជាប្រទេសកម្ពុជា ដើម្បីឲ្យប្រទេសនេះអាចមានលទ្ធភាពងាយស្រួលក្នុងការទទួលបានសេវាហិរញ្ញវត្ថុផ្លូវការ ហើយក្រុមហ៊ុនជាច្រើនអាចខ្ចីមូលធនដែលអាចទុកចិត្តបាន ដើម្បីពង្រីកប្រតិបត្តិការរបស់ពួកគេ និងរួមចំណែកដល់កំណើនសេដ្ឋកិច្ចរបស់ប្រទេសនេះ»។
ជំនួយរបស់ធនាគារ ADB សម្រាប់អនុកម្មវិធីទី ២ នៃកម្មវិធីអភិវឌ្ឍន៍ការរួមបញ្ចូលវិស័យហិរញ្ញវត្ថុដែលបានអនុម័តកាលពីខែ តុលា ឆ្នាំ ២០១៦ កំពុងបង្កើនលទ្ធភាពទទួលបានហិរញ្ញវត្ថុគ្រប់ៗគ្នាជាបន្ត និងកិច្ចខិតខំប្រឹងប្រែងអភិវឌ្ឍរបស់រដ្ឋាភិបាល។
លោក នុប សុធនវិចិត្រ អ្នកនាំពាក្យក្រសួង សេដ្ឋកិច្ច និងហិរញ្ញវត្ថុបានបដិសេធការអត្ថាធិប្បាយកាលពីថ្ងៃចន្ទ ប៉ុន្តែលោកបានប្រាប់ថា ក្រសួងនឹងចុះហត្ថលេខាជាមួយ ADB ជាមួយគម្រោងនេះក្នុងពេលឆាប់ៗ។
កម្មវិធីទី ២ នេះបានគាំទ្ររដ្ឋាភិបាលក្នុងការបញ្ចប់យុទ្ធសាស្ដ្រជាតិសម្រាប់លទ្ធភាពទទួលបានហិរញ្ញវត្ថុគ្រប់ៗគ្នា ដើម្បីផ្ដល់ក្របខ័ណ្ឌការងារក្នុងការពង្រីកលទ្ធភាពទទួលបានសេវាហិរញ្ញវត្ថុរបស់បុគ្គល ជាពិសេសអ្នកខ្ចីប្រាក់ជាស្ដ្រី និងសហគ្រាសខ្នាតតូច ធុនតូច និងមធ្យម (MSME)។ នេះបើតាមសេចក្ដីប្រកាសព័ត៌មាន។
លោកស្រី កែវ ម៉ុម អគ្គនាយកក្រុមហ៊ុន Ly Ly Food Industry បានប្រាប់ភ្នំពេញប៉ុស្ដិ៍កាលពីថ្ងៃចន្ទថា វិស័យឯកជនមានបញ្ហាប្រឈមមួយចំនួនសម្រាប់លទ្ធភាពទទួលបានហិរញ្ញវត្ថុពីធនាគារពាណិជ្ជ និងគ្រឹះស្ថានមីក្រូហិរញ្ញវត្ថុសម្រាប់ការពង្រីកការវិនិយោគ។ លោកស្រីឲ្យដឹងថា មូលនិធិដែលផ្ដល់ដោយ ADB នឹងរួមចំណែកដល់លទ្ធភាពទទួលបានហិរញ្ញវត្ថុរបស់វិស័យ MSME តាមរយៈរដ្ឋាភិបាល។
លោកស្រីថ្លែងថា៖ «ជារឿយៗរដ្ឋាភិបាលជួយវិស័យឯកជនតាមរយៈការផ្ដល់ជំនួយបច្ចេកទេស និងសិក្ខាសាលាខ្លីៗ។ ខ្ញុំសង្ឃឹមថា គម្រោងនេះនឹងជួយពួកយើងកាន់តែច្រើន»។
ធនាគារ ADB បានឲ្យដឹងថា វិស័យហិរញ្ញវត្ថុរបស់កម្ពុជាកំពុងស្ថិតក្នុងដំណាក់កាលដំបូងនៃការអភិវឌ្ឍ ហើយត្រូវបានគ្របដណ្ដប់ដោយអនុវិស័យធនាគារ និងមីក្រូហិរញ្ញវត្ថុ។ ធនាគារនេះបានឲ្យដឹងថា ខណៈការងារជាច្រើនត្រូវបានសម្រេចលទ្ធភាពទទួលបានសេវាហិរញ្ញវត្ថុនៅតែមានកម្រិត ពិសេសនៅតាមតំបន់ជនបទ។
ធនាគារនេះបន្តថា លទ្ធភាពទទួលបានសេវាហិរញ្ញវត្ថុគ្រប់ៗគ្នាគឺទាបដោយមានប្រហែលតែ ៥៩ ភាគរយប៉ុណ្ណោះ នៃប្រជាជនពេញវ័យនៅក្នុងប្រទេសនេះដែលមានលទ្ធភាពទទួលបានសេវាហិរញ្ញវត្ថុផ្លូវការកាលពីឆ្នាំ ២០១៥។ លើសពីនេះទៅទៀតជិត ១ ភាគ ៣ នៃប្រជាជនមិនមានលទ្ធភាពទទួលបានសេវាហិរញ្ញវត្ថុនោះទេក្នុងទម្រង់ទាំងអស់។ កិច្ចខិតខំប្រឹងប្រែងក្នុងការបង្កើនលទ្ធភាពទទួលបានហិរញ្ញវត្ថុគ្រប់ៗគ្នាត្រូវបានរារាំងដោយកម្រិតទាបនៃការយល់ដឹងផ្នែកហិរញ្ញវត្ថុរបស់ប្រជាជនកម្ពុជា៕LA
