.jpg)
ទិដ្ឋភាពអគារខ្ពស់ៗក្នុងរាជធានីភ្នំពេញ ដែលបាននិងកំពុងសាងសង់ជាបន្តបន្ទាប់។ ហុង មិនា
ភ្នំពេញៈ ធនាគារអភិវឌ្ឍន៍អាស៊ី (ADB) បានដំឡើងតួលេខការព្យាករកំណើនសេដ្ឋកិច្ចកម្ពុជាសម្រាប់ឆ្នាំ ២០២០ ដោយផ្អែកលើភាពល្អប្រសើរជាងមុននៃផលិតកម្មវិស័យកសិកម្ម និងការកើនឡើងការនាំចេញផលិតផលមិនមែនសម្លៀកបំពាក់ដូចជា កង់ និងគ្រឿងអេឡិចត្រូនិកជាដើម។
បច្ចុប្បន្នភាពនៃទស្សនវិស័យអភិវឌ្ឍន៍អាស៊ី (ADO) សម្រាប់ឆ្នាំ ២០២០ ដែលជារបាយការណ៍សេដ្ឋកិច្ចពិសេសប្រចាំឆ្នាំរបស់ធនាគារអភិវឌ្ឍន៍អាស៊ី បានព្យាករពីការធ្លាក់ចុះនៃផលិតផលក្នុងស្រុកសរុបក្នុងឆ្នាំ ២០២០ ក្នុងរង្វង់ដក ៤,០ ភាគរយ ធៀបនឹងដក ៥,៥ ភាគរយ នៃការព្យាករកាលពីខែមិថុនា កន្លងមក។
ADO បង្ហាញថា ការធ្លាក់ចុះយ៉ាងខ្លាំងនៃការបញ្ជាទិញពីអឺរ៉ុប និងអាមេរិកខាងជើងបាននាំដល់ការបិទទ្វាររោងចក្រសម្លៀកបំពាក់ ទំនិញធ្វើដំណើរ និងស្បែកជើង (GTF) ប្រហែល ១/៣ ក្នុងឆមាសទី ១ ឆ្នាំ ២០២០។
ប៉ុន្តែកំណើននៃការផលិតកង់ និងគ្រឿងអេឡិចត្រូនិកបានជំរុញឱ្យការនាំចេញផលិតផលក្រៅពីទំនិញកាត់ដេររបស់កម្ពុជាកើនឡើង ៣០,៣ ភាគរយ ក្នុងឆមាសទី ១ នៃឆ្នាំ ២០២០ ធៀបនឹងរយៈពេលដូចគ្នាកាលពីឆ្នាំមុន។
កំណើនសរុបនៃផលិតផលឧស្សាហកម្មត្រូវបានព្យាករថានឹងកើនឡើង ៥,១ ភាគរយ ក្នុងឆ្នាំ ២០២០ ប្រសិនបើការនាំចេញសម្លៀកបំពាក់ ទំនិញធ្វើដំណើរ និងស្បែកជើង បន្តស្ទុះងើបឡើងវិញ។
លោកស្រី Sunniya Durrani-Jamal នាយិកាប្រចាំប្រទេសកម្ពុជារបស់ធនាគារអភិវឌ្ឍន៍អាស៊ីបានឲ្យដឹងថា ជំងឺរាតត្បាតបណ្ដាលមកពីវីរុសកូរ៉ូណាជាបញ្ហាប្រឈមពិភពលោកដែលមិនធ្លាប់មានពីមុនមក ប៉ុន្តែជាសំណាងល្អប្រទេសកម្ពុជាមិនមានវិបត្តិផ្នែកសុខាភិបាលនោះទេ។
លោកស្រីថ្លែងថា៖ «យើងរំពឹងថាកំណើនសេដ្ឋកិច្ចកម្ពុជានឹងស្ទុះងើបឡើងវិញដល់ ៥,៩ ភាគរយ ក្នុងឆ្នាំ ២០២១ ដោយសារតែកម្លាំងជំរុញនៃគោលនយោបាយគាំទ្ររបស់រដ្ឋាភិបាលក្នុងការជួយទៅដល់ជនក្រីក្រ និងការគាំទ្រផ្នែកហិរញ្ញប្បទានដល់សហគ្រាសធុនតូច និងមធ្យម»។
លោកស្រីបន្តថា៖ «វិធានការទាំងនេះរួមជាមួយនឹងការកែទម្រង់រចនាសម្ព័ន្ធចាំបាច់ និងកាត់បន្ថយផលប៉ះពាល់ដោយផ្ទាល់ និងប្រយោលពីកូវីដ ១៩ ទៅលើគ្រួសារ និងអាជីវកម្មនានា ហើយនឹងជួយឲ្យសេដ្ឋកិច្ចកម្ពុជាស្ទុះឡើងខ្លាំងជាងមុន បន្ទាប់ពីវិបត្តិកូវីដ១៩»។
ការនាំចេញកង់ពីកម្ពុជាមានតម្លៃសរុប ២៤១,៧ លានដុល្លារ ក្នុងអំឡុងឆមាសទី១ ឆ្នាំ ២០២០។ នេះបើយោងតាមទិន្នន័យបានពីអគ្គនាយកដ្ឋានគយ និងរដ្ឋាករកម្ពុជា។
ជាងពាក់កណ្ដាលនៅក្នុងចំណោមកង់ចំនួន ១,១ លានគ្រឿង ដែលបាននាំចេញក្នុងអំឡុងឆមាសទី១ ឆ្នាំ ២០២០ ត្រូវបាននាំទៅទីផ្សារអឺរ៉ុប។ ទិសដៅផ្សេងទៀតសម្រាប់ទីផ្សារកង់ រួមមានអាមេរិក ចក្រភពអង់គ្លេស និងជប៉ុន។ នេះបើតាមទិន្នន័យគយ។
ទិន្នន័យបន្តថា នៅក្នុងអំឡុងពេលនេះកម្ពុជាក៏បាននាំចូលកង់ ១៩២ ៣៩៧ គ្រឿង ស្មើនឹងតម្លៃ ៤,៣៤ លានដុល្លារ។
អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈលោក ហេង សួរ បានឲ្យដឹងនៅក្នុងសន្និសីទព័ត៌មានស្ដីពីវិធានការឆ្លើយតបជំងឺកូវីដ ១៩ របស់រដ្ឋាភិបាលដែលរៀបចំនៅក្រសួងសេដ្ឋកិច្ច និងហិរញ្ញវត្ថុកាលពីខែកក្កដាថា ការនាំចេញផលិតផលសម្លៀកបំពាក់ វាយនភណ្ឌ និងស្បែកជើងរបស់កម្ពុជាទៅទីផ្សារអន្តរជាតិនៅឆមាសទី១ ឆ្នាំនេះបានធ្លាក់ចុះ ៥,៤ ភាគរយ ធៀបនឹងជាង ៤ ពាន់លានដុល្លារ ក្នុងរយៈពេលដូចគ្នាកាលពីឆ្នាំមុន។
របាយការណ៍ធនាគារជាតិនៃកម្ពុជាឲ្យដឹងថា នៅឆមាសទី១ ឆ្នាំ ២០២០ ការនាំចេញសរុបរបស់កម្ពុជាមានតម្លៃជាង ៧,០១ ពាន់លានដុល្លារ កើនឡើងជិត ៣ ភាគរយ បើធៀបនឹងរយៈពេលដូចគ្នាកាលពីឆ្នាំមុន។ ការនាំចេញកង់បានកើនឡើង ១៨ ភាគរយ។
ADB កំពុងគាំទ្រការឆ្លើយតបនឹងការរីករាលដាលកូវីដ ១៩ របស់រដ្ឋាភិបាលកម្ពុជា និងបានផ្ដល់ហិរញ្ញប្បទានសម្បទានក្នុងទឹកប្រាក់ ២៥០ លានដុល្លារ ដើម្បីពង្រឹងប្រព័ន្ធសុខាភិបាល បង្កើនការការពារសង្គម និងគាំទ្រការស្ទុះងើបឡើងវិញនៃសេដ្ឋកិច្ច៕ LA
