.jpg)
ធនាគារអភិវឌ្ឍន៍អាស៊ី (ADB) បានអនុម័តកម្ចីចំនួន ៧០ លានដុល្លារ ដើម្បីបង្កើនសមត្ថភាពកសិពាណិជ្ជកម្មក្នុងខេត្តចំនួន ៦ នៅកម្ពុជា ទាក់ទងនឹងការកែច្នៃផលិតកម្មកសិកម្មសំខាន់ៗ ដូចជា ដំឡូងមី ស្វាយចន្ទី ស្វាយ បន្លែ និងមាន់។ ហេង ជីវ័ន
ភ្នំពេញ៖ ធនាគារអភិវឌ្ឍន៍អាស៊ី (ADB) បានអនុម័តកម្ចីចំនួន ៧០ លានដុល្លារ ដើម្បីបង្កើនសមត្ថភាពកសិពាណិជ្ជកម្មក្នុងខេត្តចំនួន ៦ នៅកម្ពុជា ទាក់ទងនឹងការកែច្នៃផលិតកម្មកសិកម្មសំខាន់ៗ ដូចជា ដំឡូងមី ស្វាយចន្ទី ស្វាយ បន្លែ និងមាន់។ នេះបើតាមសេចក្ដីប្រកាសព័ត៌មានកាលពីថ្ងៃទី ២៧ ខែវិច្ឆិកា។
សេចក្ដីប្រកាសព័ត៌មានឱ្យដឹងថា គម្រោងលើកកម្ពស់សមត្ថភាពប្រកួតប្រជែងចង្វាក់តម្លៃកសិកម្ម និងសុវត្ថិភាពមានគោលបំណងផ្ដល់អត្ថប្រយោជន៍ប្រហែល ២៣០ សហករណ៍កសិកម្ម និងកសិពាណិជ្ជកម្ម ៥០ នៅខេត្តកំពង់ចាម កំពង់ធំ ឧត្តរមានជ័យ ព្រះវិហារ សៀមរាប ត្បូងឃ្មុំ។
លោកស្រី Takeshi Ueda សេដ្ឋវិទូធនធានធម្មជាតិ និងកសិកម្មនៅ ADB បានឱ្យដឹងថា កសិកម្មអាចរួមចំណែកដល់កំណើនសេដ្ឋកិច្ចកម្ពុជា និងការធ្វើពិពិធកម្ម បើសហគ្រាសធុនតូច និងមធ្យមក្នុងស្រុកអាចបង្កើនសមត្ថភាពក្នុងការកែច្នៃផលិតផលកសិកម្មតម្លៃខ្ពស់ និងមានទីផ្សារធំទូលាយ។
លោកស្រីថ្លែងថា៖ «ការវិនិយោគឯកជនលើកសិកម្ម រួមនឹងលទ្ធភាពកាន់តែប្រសើរក្នុងការទទួលបានឥណទាន និងផលិតផលមិនទាន់កែច្នៃមានគុណភាពខ្ពស់ នឹងជួយឱ្យកសិពាណិជ្ជកម្មកម្ពុជាបញ្ចេញនូវសក្ដានុពលកំណើនរបស់ខ្លួន បង្កើតការងារ និងធ្វើឱ្យប្រសើរឡើងជីវភាពរស់នៅរបស់ប្រជាជននៅតាមជនបទ»។
គម្រោងនេះនឹងជួយសម្រួលដល់លទ្ធភាពនៅក្នុងការទទួលបានឥណទានសម្រាប់កសិកម្ម និងកសិពាណិជ្ជកម្ម។
គម្រោងនេះក៏នឹងគាំទ្រដល់គំនិតផ្តួចផ្ដើម ដើម្បីពង្រឹងសុវត្ថិភាព និងគុណភាពស្បៀងអាហារក្នុងចង្វាក់តម្លៃសម្រាប់ដំឡូងមី ស្វាយចន្ទី ស្វាយ បន្លែ និងមាន់។ វាក៏នឹងជួយទៅដល់សហករណ៍កសិកម្មទទួលយកការអនុវត្តកសិកម្មល្អ និងធ្វើឱ្យប្រសើរឡើងមន្ទីរពិសោធន៍ធ្វើតេស្ដសុវត្ថិភាពស្បៀងអាហារ ដើម្បីទទួលបានការទទួលស្គាល់ជាអន្តរជាតិ។
គម្រោងនេះ នឹងគាំទ្រដល់ការស្រាវជ្រាវ និងការអភិវឌ្ឍពូជដំណាំកសិកម្ម និងពូជមាន់ទា តាមរយៈការជួយសហករណ៍កសិកម្មឱ្យទទួលបានទិន្នផលខ្ពស់ ភាពធន់នឹងគ្រោះរាំងស្ងួត គ្រាប់ពូជដំណាំដែលធន់នឹងជំងឺ និងសម្ភារដាំដុះផ្សេងៗទៀត។
លើសពីនេះ គម្រោងក៏នឹងជួយកែលម្អផ្លូវជនបទប្រវែង ១១០ គីឡូម៉ែត្រ និងជួយតភ្ជាប់រវាងប្រជាកសិករជាមួយនឹងទីផ្សារក្នុងតំបន់របស់គម្រោងផងដែរ៕ LA
