ភ្នំពេញៈ ក្រុមហ៊ុនអាកាសចរណ៍ឯកជនក្នុងស្រុក Aero Cambodia ទំនងជាបើកការហោះហើរជាលក្ខណៈជួល (chartered flight) នៅចុងឆ្នាំនេះនៅពេលក្រុមហ៊ុនទទួលបានការយល់ព្រមពីរដ្ឋាភិបាល។
លោក Brian Naswall អគ្គនាយកក្រុមហ៊ុន Aero Cambodia ឲ្យដឹងថា ក្រុមហ៊ុនកំពុងតែរៀបចំដាក់ពាក្យសុំលិខិតបញ្ជាក់ប្រតិបត្តិការហោះហើររបស់ខ្លួនពីរដ្ឋលេខាធិការដ្ឋានអាកាសចរណ៍ស៊ីវិល SSCA ហើយសង្ឃឹមថានឹងទទួលបាននៅចុងឆ្នាំនេះ។
លោកបន្តថាលិខិតបញ្ជាក់នេះនឹងផ្ដល់ឲ្យយន្តហោះផ្ទុកបានរហូតដល់ ៥ ៧០០ គីឡូនៅពេលហោះឡើងឬអ្នកដំណើរប្រមាណ១៩នាក់។ លោកថ្លែងថា៖ «យើងសង្ឃឹមថានឹងទៅកន្លែងណាដែលក្រុមហ៊ុនអាកាសចរណ៍អង្គរអ៊ែរមិនទាន់មាន។ ទិសដៅមានសក្ដានុពលជាច្រើនរួមមានកោះកុង បាត់ដំបង និងរតនគិរី»។
លោកបន្ថែមថាអេកូទេសចរណ៍នៅខេត្តរតនគិរីមានទំហំធំប៉ុន្តែផ្លូវធ្វើដំណើរមិនមានលក្ខណៈស្រួលទេ។ ការធ្វើដំណើរតាមអាកាសគឺលឿនជាងដោយហោះហើរពីភ្នំពេញទៅរតនគិរីប្រើពេលមួយម៉ោងដប់ប្រាំនាទី។
លោកបន្ថែមថាអាកាសចរណ៍ Aero Cambodia សង្ឃឹមថានឹងបើកដំណើរការផ្លូវហោះហើរភ្នំពេញ-ព្រះសីហនុផងដែរប្រសិនបើគ្មានក្រុមហ៊ុនអាកាសចរណ៍ណាមួយដំណើរការ។ កាលពីដើមឆ្នាំនេះភ្នំពេញ ប៉ុស្ដិ៍បានរាយការណ៍ថាអាកាសចរណ៍អង្គរអ៊ែរនឹងចាប់ផ្ដើមហោះហើរលើផ្លូវដូចគ្នានេះនៅខែមេសា។
លោកបន្ថែមថា៖ «យើងនឹងចាប់ផ្ដើមជើងហោះហើរលក្ខណៈ chartered flight នេះប្រសិនបើអតិថិជនរបស់យើងត្រូវការបន្ថែមយើងអាចចាប់ផ្ដើមធ្វើការហោះហើរលក្ខណៈទៀងទាត់ផងដែរ»។ ជាធម្មតាក្រុមហ៊ុនអាកាសចរណ៍ប្រើលក្ខណៈchartered flight ដើម្បីសាកល្បងតម្រូវការទីផ្សារសម្រាប់ផ្លូវហោះហើរថ្មីនេះ។
លោកបន្តថាទិសដៅបន្តរបស់ក្រុមហ៊ុននេះនឹងផ្អែកលើថាតើវាអាចទប់ទល់ថ្លៃឈ្នួលព្រលានបាននិងថាតើការធ្វើតេស្ដរបស់ខ្លួនទទួលបានជោគជ័យឬអត់នោះ?
កាលពីដើមឆ្នាំនេះការហោះហើរសាកល្បងត្រូវបានប្រតិបត្តិដោយជោគជ័យនៅក្រុងព្រះសីហនុកោះកុងនិងបណ្ដាកោះជុំវិញកោះរ៉ុង ដែលដំណើរការដោយយន្តហោះ Cessna 208 Caravan មាន១២កៅអីអាចចុះចតក្នុងទឹកក៏បាននិងលើគោកក៏បាន។ លោកបន្តថាបើមានយន្តហោះប្រភេទនេះក្រុមហ៊ុនបើកជើងហោះហើរជាច្រើនទិសដៅទៀត។លោកបន្តថា ម៉ូដែលនេះគឺជាម៉ូដែលមួយក្នុងចំណោមយន្តហោះ៦គ្រឿងដែលក្រុមហ៊ុន Aero Cambodia សង្ឃឹមថានឹងនាំចូលមកប្រើដែលរួមមានប្រភេទយន្តហោះតូចៗផងដែរដូចជាប្រភេទយន្តហោះ Cessna 150 មានកៅអីពីរ។
ក្រុមហ៊ុន Aero Cambodia ត្រូវបង្កើតឡើងក្នុងឆ្នាំ២០១០មានវិនិយោគិនមកពីប្រទេសជាច្រើនរួមមានកម្ពុជា អូស្ត្រាលី កាណាដា និងអាមេរិក។នេះបើតាមលោក Naswell ជាពលរដ្ឋអាមេរិកដែលមានប័ណ្ណជាអ្នកបើកបរយន្តហោះ។
លោកបន្តថា៖ «ការស្វែងរកវិនិយោគិនក្រៅពីកម្ពុជាគឺជាបញ្ហាដ៏ធំបំផុតពីព្រោះពួកគេភាគច្រើនមិនបានស្គាល់ពីប្រទេសនេះទេ។ លោកបន្ថែមថាលោកកំពុងព្យាយាមបង្កើតរចនាសម្ព័ន្ធថ្លៃឈ្នួលផ្សេងៗគ្នាសម្រាប់យន្តហោះតូចៗ ជាមួយរដ្ឋាភិបាលដែលអាចទទួលបានប្រយោជន៍»។
លោកបន្តថាអ្នកដំណើរម្នាក់ៗត្រូវចំណាយច្រើនជាមួយយន្តហោះតូចនេះ ដូច្នេះក្រុមហ៊ុនកំពុងព្យាយាមរក្សាតម្លៃទាប។
ក្រុមហ៊ុន Aero Cambodia អាចជាក្រុមហ៊ុនអាកាសចរណ៍ក្នុងស្រុកទី៤របស់កម្ពុជា។
បច្ចុប្បន្នមានអាកាសចរណ៍កម្ពុជាអង្គរអ៊ែរ ក្រុមហ៊ុន Skywing Airlines និងទន្លេសាបអ៊ែរឡាញប្រតិបត្តិការទាំងជើងហោះហើរទៀងទាត់និងជាលក្ខណៈchartered flights។ នេះបើតាមលោក សយ សុខាន់ អនុរដ្ឋលេខាធិការរបស់ SSCA ។
លោក អេង សួស្ដី អនុរដ្ឋលេខាធិការរបស់ SSCA ឲ្យដឹងថាខណៈមានព្រលានយន្តហោះស្ទើរតែគ្រប់ខេត្តក្នុងប្រទេសកម្ពុជាមានព្រលានយន្តហោះតែបួនប៉ុណ្ណោះដែលប្រើបានក្នុងពេលបច្ចុប្បន្ននេះ។ ព្រលានយន្តហោះក្នុងស្រុកមានបាត់ដំបង ស្ទឹងត្រែង រតនគិរី និងកោះកុង។
លោកហូ វណ្ឌី សហប្រធានក្រុមការងារទេសចរណ៍វិស័យឯកជនរដ្ឋាភិបាលបានថ្លែងថាជើងហោះហើរដែលបានគ្រោងរបស់ក្រុមហ៊ុន Aero Cambodia នឹងជំរុញវិស័យទេសចរណ៍ឲ្យកាន់តែរីកចម្រើន។ លោកបានបន្តថា៖
« ទេសចរចំណាយពេលខ្លីនៅទីនេះប៉ុន្តែពួកគេចង់ឃើញកន្លែងជាច្រើន»។លោកសង្ឃឹមថាជើងហោះហើរលក្ខណៈជួលនៅទីនេះត្រូវធ្វើយ៉ាងណាខិតខំជំរុញកិច្ចប្រឹងប្រែងរបស់ខ្លួនដោយសារតែមិនមានមនុស្សច្រើនទេដែលដឹងអំពីជើងហោះហើរនេះ៕ PB
