ភ្នំពេញៈ ទីភ្នាក់ងារអភិវឌ្ឍន៍បារាំង(AFD)បានផ្តល់ហិរញ្ញប្បទានជាង២៤លានដុល្លារសម្រាប់គម្រោងសេវាទឹកស្អាត និងអគ្គិសនីនៅកម្ពុជា។
កម្ចី នេះត្រូវបានផ្តល់តាមរយៈធនាគារពាណិជ្ជក្រៅប្រទេសនៃ កម្ពុជា (FTB) ដើម្បីផ្តល់កម្ចីដល់វិស័យឯកជនដែលផ្គត់ផ្គង់សេវាទឹកស្អាត និងអគ្គិសនីទៅដល់ប្រជាជននៅតាមទីជនបទ។
ពិធីចុះហត្ថលេខា លើកិច្ចព្រមព្រៀងហិរញ្ញប្បទានរវាងAFD និង FTB បានធ្វើឡើងកាលពីម្សិលមិញនៅក្រសួងសេដ្ឋកិច្ច និងហិរញ្ញវត្ថុ។
ហិរញ្ញប្បទានត្រូវបានបែងចែកជា៣ មានកម្ចីសម្បទានរយៈពេលវែងជំនួយឥតសំណង និងការធានាទូទាត់។
ក្នុង នោះទឹកប្រាក់ចំនួន១៥លានដុល្លារនឹងផ្តល់ទៅឲ្យ FTB ដើម្បីបន្តផ្តល់ជាកម្ចី។ ទឹកប្រាក់ចំនួន៥លានដុល្លារ ជាប្រាក់ធានាកម្ចីដែលនឹងជួយកាត់បន្ថយលក្ខខណ្ឌចាំបាច់មួយ ចំនួនដែលទាមទារដោយធនាគារ ហើយ៤,២លានដុល្លារទៀតដែលជាជំនួយឥតសំណងនឹងត្រូវប្រើប្រាស់ជាការ គាំទ្រដល់ផ្នែកបច្ចេកទេសដើម្បីពង្រឹងសមត្ថភាពអង្គភាពផ្គត់ផ្គង់ទឹកស្អាត និងអគ្គិសនី។
លោក André Pouillés-Duplaix នាយកទីភ្នាក់ងារតំបន់ កម្ពុជា-ឡាវបានឲ្យដឹងក្នុងពិធីចុះកិច្ចព្រមព្រៀងថា ក្នុងចំណោមប្រជាជនកម្ពុជាសរុប គឺមានតែ៣០ភាគរយប៉ុណ្ណោះដែលមានបណ្តាញអគ្គិសនីប្រើប្រាស់ ហើយពី៣០ទៅ៦០ភាគរយប៉ុណ្ណោះដែលមានទឹកស្អាតប្រើប្រាស់។
លោក ថ្លែងថា៖ «ការអភិវឌ្ឍតំបន់ជនបទមានសារៈសំខាន់ក្នុងការជួយលើកកម្ពស់ កម្រិតជីវភាពប្រជាពលរដ្ឋ នាំឲ្យមានកំណើនសេដ្ឋកិច្ចដោយនិរន្តរភាព និងការផ្សារភ្ជាប់សេដ្ឋកិច្ច និងសង្គម»។
លោកបានបន្តថា ដើម្បីដោះស្រាយបញ្ហាលំបាកនៃលទ្ធភាពទទួលបានទឹកស្អាត និងអគ្គិសនីសម្រាប់ប្រជាជននៅជនបទ គឺទាមទារការចូលរួមពីតួអង្គសំខាន់ៗដែលមានរដ្ឋាភិបាល វិស័យឯកជន អ្នកចុះអនុវត្តផ្ទាល់ និងជំនួយហិរញ្ញវត្ថុ ដែលបំពេញគ្នាទៅវិញទៅមកដែល AFD បាននិងកំពុងផ្តល់កម្ចីដើម្បីលុបបំបាត់ឧបសគ្គក្នុងការទទួលបាន ហិរញ្ញប្បទានពីធនាគារសម្រាប់អង្គភាពឯកជន។
លោក ហ្គី អានវ៉ានិត អគ្គនាយក FTB បាននិយាយក្នុងពិធីចុះហត្ថលេខានោះថា ហិរញ្ញប្បទាន នេះនឹងសម្រួលដល់អង្គភាពឯកជនផ្គត់ផ្គង់ សេវាទឹកស្អាត និងអគ្គិសនីនៅតាមជនបទក្នុងការទទួលបានកម្ចី។ លោកបន្តថា៖ «អង្គភាពឯកជនផ្គត់ផ្គង់ សេវាទឹកស្អាត និងអគ្គិសនីនៅពេលនេះអាចទទួលបានកម្ចីក្នុងរយៈពេលវែងរហូតដល់ ១០ឆ្នាំ ជាមួយការប្រាក់ទាប ការសម្រួលដល់ទ្រព្យបញ្ចាំ ហើយពួកគាត់ក៏នឹងអាចទទួលបានជំនួយបច្ចេកទេសទៀតផង»។
លោក អ៊ុន យុទ្ធី ប្រធានក្រុមការងារផ្នែករ៉ែ និងថាមពល និយាយថា កន្លងមក ធនាគារពាណិជ្ជមិនបានយកចិត្តទុកដាក់ពីសក្តានុពលក្នុងវិស័យ ទឹកស្អាត និងអគ្គិសនីនេះទេ ដោយបានលើកឡើងថា ការទទួលបានប្រាក់កម្ចីពីធនាគារពាណិជ្ជផ្សេងៗ មានការលំបាក និងមានការប្រាក់ខ្ពស់។ លោកថា កម្ចីសម្រាប់អង្គភាពឯកជនផ្គត់ផ្គង់ សេវាទឹកស្អាត និងអគ្គិសនីលើកនេះជាជំហានដ៏សំខាន់មួយក្នុងការជំរុញឲ្យមានសកម្មភាព សេដ្ឋកិច្ចតាមតំបន់ជនបទកម្ពុជា។
លោកថ្លែងថា៖ «យើងដឹងហើយថាទឹក និងអគ្គិសនី ជាតម្រូវការចាំបាច់ណាស់សម្រាប់ប្រជាជន ជាពិសេសសម្រាប់សហគ្រាសតូច និងមធ្យម។ ពេលណាមានទឹក និងអគ្គិសនីទៅដល់ នោះនឹងមានការពង្រីកសកម្មភាពសេដ្ឋកិច្ចនៅតំបន់នោះ»។ ប្រជាជន ៥០ ០០០ គ្រួសារត្រូវគេរំពឹងថានឹងទទួលបាននូវប្រយោជន៍ពីគម្រោងហិរញ្ញប្បទាននេះ។
លោក អូន ព័ន្ធមុន្នីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុឲ្យដឹងថា AFD ជាដៃគូអភិវឌ្ឍន៍សំខាន់សម្រាប់កម្ពុជា៖«សាធារណរដ្ឋបារាំង តាមរយៈ AFD ចាប់តាំងពីឆ្នាំ១៩៩៣ បានផ្តល់ហិរញ្ញប្បទានឥត សំណងប្រមាណ១២១ លានអឺរ៉ូ ដើម្បីចូលរួមស្តារ និងអភិវឌ្ឍហេដ្ឋារចនាសម្ព័ន្ធសេដ្ឋកិច្ច និងសង្គមកិច្ចនៅកម្ពុជា»៕
