ភ្នំពេញៈ ក្រុមហ៊ុន Asia Green Biotechnology Corp.(AGB) និងវិទ្យាស្ថានជាតិកសិកម្ម ព្រែកលៀបនៅទីក្រុងភ្នំពេញបានចុះអនុស្សរណៈនៃការយោគយល់គ្នា (MoU) ដើម្បីសហការក្នុងការអនុវត្តផែនការអភិវឌ្ឍន៍អាជីវកម្មដែលជាប់ទាក់ទងនឹងការវាយតម្លៃ និងការអនុវត្តបច្ចេកទេសផលិតគ្រាប់ពូជ និងការដាំដុះដែលជាប់ទាក់ទងនឹងដំណាំក្រចៅ និងដំណាំផ្សេងទៀតជាមួយនឹងការប្រើប្រាស់ជាឱសថ និងអត្ថប្រយោជន៍ផ្សេងទៀត។
ក្រុមហ៊ុន AGB បានប្រកាសថា ការសម្រេចបាន MoU នេះត្រូវបានធ្វើឡើងកាលពីថ្ងៃទី ៨ ខែមីនា ក្នុងការបន្តការអនុវត្តនូវផែនការអាជីវកម្មរបស់ខ្លួននៅតំបន់អាស៊ីអាគ្នេយ៍ជាមួយនឹងការអនុវត្ត MoU នេះដោយលើកឡើងថា វិទ្យាស្ថានជាតិកសិកម្មព្រែកលៀបនឹងដើរតួនាទីឈានមុខគេក្នុងការស្រាវជ្រាវ និងការអភិវឌ្ឍពូជក្រចៅ និងពូជផ្សេងទៀតដែលប្រើប្រាស់ គ្រាប់ពូជជាមរតកកម្ពុជា និងពូជផ្សេងៗទៀតដែលបានផ្ដល់ ដោយក្រុមហ៊ុន AGB និងដៃគូនានាដើម្បីទទួលបានពូជសមរម្យ ដែលត្រូវបានប្រើប្រាស់សម្រាប់ជីវឥន្ធនៈ អាហារជំនួយសុខភាព និងគោលបំណងវេជ្ជសាស្ដ្រ។
ក្រុមហ៊ុនបានឱ្យដឹងថា៖ «ដៃគូជាច្រើនមានបំណងសិក្សាប្រព័ន្ធ និងបច្ចេកទេសដាំដុះសម្រាប់ការផលិត និងការប្រើប្រាស់ក្រចៅនៅក្នុងឧស្សាហកម្មនៅកម្ពុជាដោយមានគោលបំណងអនុវត្តចំណេះដឹងដែលទទួលបានដោយផ្ទាល់ក្នុងការអនុវត្តកសិកម្មបច្ចុប្បន្ន ដែលបានប្រើប្រាស់នៅកម្ពុជា»។
លោក David Pinkman អគ្គនាយកក្រុមហ៊ុន AGB បានឱ្យដឹងថា ការអនុវត្តកិច្ចព្រមព្រៀងជាមួយសាលាព្រែកលៀប គឺជំហានដ៏សំខាន់មួយឆ្ពោះទៅមុខ សម្រាប់ជីវបច្ចេកវិទ្យាអាស៊ីបៃតង ខណៈដែលក្រុមហ៊ុនកំពុងធ្វើឱ្យសម្រេចនូវការបង្កើតកម្មវិធីស្រាវជ្រាវ និងការអភិវឌ្ឍប្រកបដោយប្រសិទ្ធភាពនៅកម្ពុជា ចាប់ពីការបញ្ចប់ការបោះផ្សាយលក់មូលបត្រកម្មសិទ្ធិលើកដំបូងជាសាធារណៈ (IPO) របស់ក្រុមហ៊ុន។
លោក David បន្ត៖ «ជាមួយជំហានដែលត្រូវបានបំពេញបន្ថែមតាមរយៈការពិភាក្សាបន្តបានគាំទ្រដោយក្រុមហ៊ុនជាមួយអាជ្ញាធរពាក់ព័ន្ធនានានៅកម្ពុជា យើងនឹងចាប់ផ្ដើមផ្តួចផ្ដើមការប្រើប្រាស់ និងការវាយតម្លៃពូជមួយចំនួននៃដំណាំក្រចៅដែលអាចត្រួសត្រាយផ្លូវសម្រាប់ការបង្កើតកសិកម្មថ្មី និងសំខាន់ ហើយជាប់ទាក់ទងនឹងឧស្សាហកម្មកែច្នៃនៅក្នុងតំបន់»។
លោកលើកឡើងថា៖ «ពិតហើយ យើងរីករាយ និងរំភើបដែលបានរកឃើញដៃគូស្រាវជ្រាវថ្មីមួយជាមួយវិទ្យាស្ថាននេះ ខណៈដែលវិទ្យាស្ថាននេះរក្សាការជំរុញទឹកចិត្តស្រដៀងគ្នា សម្រាប់ការអភិវឌ្ឍឧស្សាហកម្មក្រចៅឱ្យរីកចម្រើន និងជាវិជ្ជមាននៅកម្ពុជា។ ជាមួយនឹងសមត្ថភាពបចេ្ចកទេស និងភាពជាក់ស្ដែងនៃក្រុមរបស់យើងរៀងៗខ្លួន មិនគ្រាន់តែការបំពេញបន្ថែមឱ្យគ្នាប៉ុណ្ណោះទេ ប៉ុន្តែថែមទាំងផ្ដល់មូលដ្ឋានដ៏រឹងមាំសម្រាប់កម្មវិធីស្រាវជ្រាវ និងអភិវឌ្ឍន៍ដែលផ្ដោតសំខាន់លើដំណាំក្រចៅ។ យើងទន្ទឹងរង់ចាំក្នុងការធ្វើទំនាក់ទំនងអាជីវកម្មរយៈពេលវែង និងប្រកបដោយផ្លែផ្កាជាមួយវិទ្យាស្ថាននេះ»។
ជំហានបន្ទាប់ ភាគីពាក់ព័ន្ធនឹងកំណត់លើការកម្រិតថវិកា ការបង្កើតការស្រាវជ្រាវ និងពិធីសារដែលជាប់ទាក់ទង និងទំនាក់ទំនងជាមួយនាយកដ្ឋានរបស់រដ្ឋាភិបាលផ្សេងទៀតសម្រាប់ធាតុចូលលើដំណើរការនេះ។ វិទ្យាស្ថានជាតិព្រែកលៀបចូលរួមក្នុងសកម្មភាពស្រាវជ្រាវ អភិវឌ្ឍន៍ និងប្រតិបត្តិការ៕LA